वासिङ्टन– अमेरिकी सांसदहरूले राष्ट्रपति डोनाल्ड ट्रम्पका कान्छा छोरा एवम् आजीवन व्यावसायिक सहयोगी डोनाल्ड ट्रम्प जुनियरसहित ६० व्यक्ति तथा संस्थासँग रहेका कागजातको अनुसन्धान गर्ने भएका छन्।
राष्ट्रपति ट्रम्पले आफ्नो पदीय शक्तिको दुरुपयोग गरेको आशंकामा सांसदहरूले औपचारिक छानबिन गर्न लागेका हुन्।
अमेरिकी संसदको न्यायिक समितिका अध्यक्ष जेरी नाड्लरले अमेरिकी एबिसी टेलिभिजनसँग कुरा गर्दै डोनाल्ड ट्रम्प जुनियर र अलेन वाइसेलबर्ग समेतका ६० व्यक्ति तथा संस्थामाथि संसदले छानबिन गर्न लागेको जनकारी दिए।
संसदमा विपक्षी डेमोक्र्याटिक पार्टीका वरिष्ठ सदस्य समेत रहेका नाड्लरले अनुसन्धान मुख्यतः न्यायमा अबरोध, भ्रष्टाचार र शक्तिको दुरुपयोगमा केन्द्रित हुने बताए। हाल अमेरिकी संसदमा विपक्षी डेमोक्र्याटिक पार्टीको बहुमत छ।
सन् २०१६ को अमेरिकी राष्ट्रपति चुनावमा रुससँग साँठगाँठ गरेको आरोपमा राष्ट्रपति ट्रम्पका विषयमा विशेष अनुसन्धाता रोबर्ट मुलरको समितिले पनि छानबिन गरिरहेको छ।
धेरैजसो विश्लेषकहरूले राष्ट्रपति ट्रम्पविरुद्ध धेरैवटा संघीय तथा राज्यस्तरमा भइरहेका अनुसन्धान पनि राष्ट्रपति ट्रम्पका लागि टाउको दुखाइको विषय बनेको जनाएका छन्। यी अनुसन्धानहरू खासगरी ट्रम्पका व्यवसायहरू तथा परोपकारी कार्यहरूका साथै कर छलीमा केन्द्रित भएका छन्।
तर ट्रम्पले लगातार संघर्ष गरिरहहेका छन्, र ट्विटरमार्फत निरन्तर विपक्षीमाथि तारो बनाइरहहेका छन्। 'म निर्दोष व्यक्ति हुँ तर ज्यादै खराब, विरोधाभाषी तथा भ्रष्ट व्यक्तिहरूले म विरुद्ध अत्याचार गरिएको छ,' उद्दले ट्विट गर्दै पटकपटक भनेका छन्।
ट्रम्पका पूर्व निजी वकिल माइकल कोहेनले पनि बुधबार संसदीय समिति समक्ष लामो बयान दिएका छन्। सांसदहरूले हालसम्म सार्वजनिक नभएका अरु तथ्यहरु बताउन र अमेरिकी जनतालाई वास्तविक कुरा भन्न कोहेनमाथि अनुरोध गरेका थिए।
सांसद नाड्लरले कोहेनको कुराबाट पनि राष्ट्रपति ट्रम्पले न्यायमा अबरोध गरेको देखिएको बताए। यसअघि ट्रम्पकै दबाबमा प्रथम राष्ट्रिय सुरक्षा सल्लाहकार माइक फ्लाइनले समेत रुसी संलग्नता बारेमा आफूले झुटो बयान दिएको अमेरिकी संघीय जाँच ब्यूरो (एफबीआई) समक्ष स्वीकारेका थिए।
ट्रम्पले रुसी अनुसन्धानमै विवाद भएपछि मे २०१७ मा एफबीआईका प्रमुख जेम्स कोमेलाई पनि एकाएक बर्खास्त गरेका थिए।
राष्ट्रपति ट्रम्पले एनबिसीसँगको एक अन्तर्वार्तामा रुसी अनुसन्धान प्रकरणमा जेम्स कोमेको भूमिकाबाट आफू असन्तुष्ट भएको बताएका थिए।
'कोहेनले राष्ट्रपतिमाथि विभिन्न शंकास्पद तथ्यहरू उजागर गरेका छन्। यी कार्यहरू राष्ट्रपति हुनुअघि र भएपछि पनि भएका छन्,' नाड्लरले बताए। 'तैपनि अझै ठोस प्रमाण भेटिइसकेको छैन। तर, हामी उपयुक्त अनुसन्धान प्रारम्भ गर्दैछौं।'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
