काठमाडौँ– नेपाली कांग्रेसको केन्द्रीय समिति बैठक रामचन्द्र पौडेल र कृष्णप्रसाद सिटौला पक्षले बहिष्कार गरेपछि अनिश्चितकालका लागि स्थिगित भएको छ। पौडेल र सिटौला पक्षको बहिष्कारका कारण मंगलबारका लागि बोलाइएको बैठक बस्न नसकेको हो।
बैठकका लागि सभापति शेरबहादुर देउवा पक्षका नेता मात्रै उपस्थित थिए। पार्टीको निर्णय प्रक्रियामा सभापति देउवाले एकलौटी गरेको भन्दै पौडेल र सिटौला पक्ष विरोध स्वरुप बैठक बहिष्कार गरेको हो।
बैठक पार्टी कार्यालय सानेपामा ११ बजे बोलाइएको थियो।
बैठकमा पुग्न सँधै ढिला गर्ने सपापति शेरबहादुर देउवा भने आज ११ बजेअघि नै पार्टी कार्यालय पुगेका थिए।
महासमिति बैठकको निर्णय विपरीत बहुमतको आधारमा आइतबार विधान पारित गरेपछि असन्तुष्ट बनेका पौडेल र सिटौला समूहका नेताहरु बैठकमा उपस्थित नभएका हुन्।
महासमितिको दुई तिहाइ बढी संख्याबाट उठाइएको आवाजलाई विधानमा नसमेटिएको भन्दै संस्थापन इतर समूहले असहमति जनाएको छ।
जिल्ला सभापतिहरु र बहुसंख्यक महासमिति सदस्यहरुले केन्द्रीय नेताहरु तल्लो तहबाट निर्वाचित भई महाधिवेशन प्रतिनिधि बन्नुपर्ने प्रस्ताव राखेका थिए।
तर, १० माघ देखि सुरु भएको केन्द्रीय समितिको बैठकले पुरानै व्यवस्थालाई कायम राखी विधान बहुमतमा पारित भएको थियो।
कांग्रेसको पुराना विधानमा केन्द्रीय पदाधिकारी, सदस्यहरु स्वतः महाधिवेशन प्रतिनिधि र महासमिति सदस्य हुने व्यवस्था छ।
सर्वसम्मत रुपमा विधान पारित गराउने प्रयासका लागि आइतबार नेताहरु आन्तरिक छलफलमा जुटेका थिए। त्यसअघि शनिबार देउवाले बरिष्ठ नेता रामचन्द्र पौडेललाई आफ्नै निवासमा बोलाई छलफल गरेका थिए।
आइतबार ५ घन्टा बसेको पूर्व निर्धारित बैठकमा सहमति हुन नसकेसँगै देउवाले बहुमतबाट पारित गर्नेगरी विधानलाई निर्णयार्थ पेस गरेका थिए।
देउवाको प्रस्तावमा इतर समूहका नेताहरुले आपत्ति जनाउँदै लिखित असहमति राखेका थिए।
फरक मत राख्नेहरुमा वरिष्ठ नेता पौडेलसहित कोषाध्यक्ष सीतादेवी यादव, नेताहरु कृष्णप्रसाद सिटौला, रामशरण महत, अर्जुननरसिंह केसी, बलबहादुर केसी, दिलेन्द्र प्रसाद बडु, चन्द्र भण्डारी, नविन्द्रराज जोशी, धनराज गुरुङ, गगन थापा, प्रदीप पौडेल, रामकृष्ण यादव, सरिता प्रसाईंलगायत छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
