काठमाडौं–अन्तर्राष्ट्रिय क्रिकेट काउन्सिल (आइसिसी) महिला विश्वकप छनोटअन्तर्गत एसिया छनोट प्रतियोगितामा नेपालले तेस्रो जित हात पारेको छ।
नेपालले आइतबार बैंककमा भएको खेलमा हङकङलाई ४ विकेटले हराएको हो। हङकङले दिएको ६३ रनको लक्ष्य नेपालले ६ विकेटको क्षतिमा १८.३ ओभरमा पार गर्यो।
नेपालका लागि अप्सरी बेगमले २४ रन जोडिन्। उनले ३५ बलमा ३ चौका हिर्काइन्। सरिता मगरले पनि नटआउट १६ रन जोडेपछि नेपालले लक्ष्य भेट्टाएको हो। त्यसअघि ओपनरद्वय काजल श्रेष्ठ ४ र सीता रानामगर खाता नै नखोली आउट भएपछि नेपालले खराब सुरुवात गरेको थियो। लगत्तै इन्दु बर्मा पनि ४ रनमा आउट भइन् भने कप्तान रुबिना क्षेत्री बेलवासेले ६ रन भन्दा बढी जोड्न सकिन्। रोमा थापा २ रनमा आउट भइन् भने नेरी थापा १ रनमा अविजित रहिन्।
त्यसअघि टस जितेर पहिले ब्याटिङ गरेको हङकङले ८विकेटको क्षतिमा ६२ रन जोडेको थियो। हङकङका लागि लापलाफले सबैभन्दा ब९ १९ रन जोडिन्। नेपालकी सीता रानामगरबाट बोल्ड हुनुअघि नउले २४ बलमा १ चौका हिर्काइन्। यस्तै दासवानीले १६ रन बटुलिन् भने बेला पुनले ११ रनको योगदान दिइन्। अन्य खेलाडीले दोहोरो अंकमा रन बटुल्न सकेनन्।
बलिङमा नेपालकी नेरी थापाले ६ विकेट लिइन्। उनले ४ ओभरमा ८ रन मात्र खर्चिएकी थिइन्। नेरीले पहिला पाँच खेलाडीलाई आफ्नो सिकार बनाउन हङकङको ब्याटिङ लाइनअफ ध्वस्त भएको थियो। सीता रानामगरको नाममा पनि २ विकेट रह्यो।
यसअघि नेपालले खेलेका तीन मध्ये दुई खेलमा जित हात पारेको थियो। जितपछि पनि नेपाल अंक तालिकाको चौथो स्थानमा उक्लिएको छ। नेपालको ४ खेलबाट ६ अंक भएको छ। तेस्रो स्थानको चीनको पनि ६ अंक नै छ। शीर्ष स्थानको आयोजक थाइल्यान्डको ४ खेबलाट ८ अंक र दोस्रो स्थानको युएईको ५ खेलबाट ८ अंक छ।
तेस्रो खेलमा नेपालले दोस्रो स्थानको युएईलाई ७ विकेटले हराएको थियो। यसअघि नेपालले पहिलो खेलमा मलेसियालाई ३४ रनले हराएको थियो। दोस्रो खेलमा भने नेपाललाई आयोजक थाइल्यान्डले ५७ रनले पराजित गरेको थियो।
अब नेपालले भोलि सोमबार चीन र फागुन १५ गते कुवेतसँग प्रतिस्पर्धा गर्नेछ। छनोटमा नेपालसहित सात राष्ट्रले प्रतिस्पर्धा गरिरहेका छन्। छनोटमा नेपाल, थाइल्याण्ड, युएई, मलेसिया, कुवेत, चीन र हङकङले खेलिरहेका छन्। राउण्ड रोबिनका आधारमा हुने छनोटको विजेता आइसिसी महिला टी–२० विश्वकपको ग्लोबल छनोटमा पुग्नेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
