वासिङ्टन- अमेरिकी राष्ट्रपति डोनाल्ड ट्रम्पले चिनियाँ राष्ट्रपति सी चिन फिङसँग व्यापार सम्झौता गर्ने उद्देश्यले अर्को महिना अमेरिका र चीनबीच शिखर सम्मेलन हुने बताएका छन्।
चिनियाँ वार्ता टोलीसँग वासिङ्टनमा भएको पछिल्लो दुई दिन लामो वार्ता ‘निकै सकारात्मक’ भएको बताउँदै यसलाई आइतबारसम्म लम्ब्याइएको बताए।
अमेरिका–चीनबीच देखिँदै आएको व्यापार विवादलाई अन्त्य गर्ने प्रयासस्वरूप दुई देशका अधिकारीहरूले विश्वका दुई अर्थतन्त्रबीच व्यापार विषयमा देखिएको गहिरो तनावलाई समाधान गर्ने प्रयासमा भएका वार्ता सकारात्मक बन्दै गएको बताइएको हो।
अमेरिकी राष्ट्रपति ट्रम्प र चिनियाँ राष्ट्रपति सीबीच अर्जेन्टिनाको राजधानी ब्युनर्स आयर्समा व्यापार विवादलाई मार्च १ पहिलेसम्म समाधान गर्न आफ्नो तहबाट पहल गर्ने सहमति बनेको थियो। वार्ताले सकारात्मक दिशा नलिएमा अमेरिकाले मार्च १ देखि लागू हुनेगरी थप चिनियाँ सामानको मूल्यमा करवृद्धि गर्ने बताएको थियो।
बिहीबार सुरू भएको वार्तामा अमेरिकी व्यापार प्रतिनिधि रोबर्ट लाइथिजरको नेतृत्वमा अमेरिकी ट्रिजरी सेक्रेटरी स्टेभेन मनुचिनसहितको प्रतिनिधिमण्डल बेइजिङमा छ भने चिनियाँ उपप्रधानमन्त्री तथा राष्ट्रपति सीका विशेष प्रतिनिधि लिउ हेसहितको टोलीले चीनको प्रतिनिधित्व गरेको छ। उनीहरूबीच यस पहिले विभिन्न ६ चरणमा छलफल भइसकेको छ।
सहमतिअनुसार आगामी हप्ता अर्थात् मार्च १ मा अमेरिकाले दुई खर्ब मूल्य बराबरको चिनियाँ सामानमा कर वृद्धि गर्ने बताइएको भएपनि राष्ट्रपति ट्रम्पले उक्त निर्णयलाई केही पछि सार्ने बताएका हुन्।
ट्रम्पले भने, 'हामी धेरै टाढा होइन छिट्टै नै व्यापार विवादबारे छलफलका लागि भेट गर्दैछौँ। सम्बवतः सी र मबीचको वार्ता यही मार्च महिनाभित्रै गर्ने सम्भावना छ।'
चीनका राष्ट्रपति सीले पनि आफ्नो वार्ता टोलीमार्फत अमेरिकी राष्ट्रपति ट्रम्पलाई लेखेको पत्रमा व्यापार विवादबारे सहमतिका लागि सकारात्मक निकाशको सम्भावना देखिएको उल्लेख गरेका अमेरिकी राष्ट्रपति कार्यालय स्रोतले जनाएको छ।
सीको पत्रलाई उद्धृत गर्दै एक चिनियाँ टेलिभिजनले पनि भनेको छ, 'म अमेरिकी राष्ट्रपतिसँग विभिन्न तहबाट निकटमा बसेर व्यापार विवादलाई सल्टाउन तयार छु।'
दूई ठूला अर्थतन्त्रबीचको विवादले उनीहरूका अलावा विश्वको अर्थतन्त्रमा कुनै न कुनै रूपमा प्रभाव परेको र यसलाई सल्टाउन चीन र अमेरिका दुवैलाई अन्तर्राष्ट्रिय समुदायको पनि दबाब रहेको छ।
'मलाई लाग्छ व्यापार सम्झौता हुने निकै राम्रो अवसर बनेको छ,' ट्रम्पले ह्वाइट हाउसमा सञ्चारकर्मीसँगको कुराकानीमा भने।
यसैबीच अन्तर्राष्ट्रिय मुद्रा कोष प्रमुख क्रिश्टिन लागार्डले अमेरिका–चीनबीचको व्यापार विवादका कारण विश्वको आर्थिक वृद्धिलाई प्रभावित पार्नेसक्ने ‘प्रमुख खतरा’ भएको चेतावनी दिएका छन्।
गत वर्षको जुलाईपछि दुबैपक्षबाट गरिएका कर वृद्धिबाट करिब तीन खर्ब ६० करोड अमेरिकी डलर मूल्य बराबरको सामानको मूल्य वृद्धि हुँदा यसको प्रभाव विश्वव्यापी बनेको छ।
करवृद्धिका कारण विश्वव्यापी व्यापारमा सामान्य प्रभाव परेको बताइए पनि यसका कारण विश्वका स्टक बजारमा व्यवसायिक विश्वास गुम्दा भएको अप्रत्यक्ष क्षति अगन्य भएको लागार्डले बताए।
व्यापार युद्धको मिश्रित प्रभाव देखिएको बताउँदै अन्तर्राष्ट्रिय मुद्रा कोषले सन् २०१९ का लागि विश्वव्यापी आर्थिक वृद्धिदरबारे प्रक्षेपण घटाएको छ। रासस/एएफपी
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
