-वीरेन्द्र कर्ण/रासस
वीरगञ्ज- गण्डक नहरको संरचना पुरानो र जीर्ण भइसकेकाले जुनसुकै बेला भत्किन सक्ने सम्भावना रहेको छ।
करीब ४५ वर्ष अघि निर्माण भएको गण्डक नहरमा रहेको पुल, पुलेसा, कल्भर्ड तथा संरचनाको आवश्यक मर्मत सम्भार हुन नसक्दा ती संरचना जीर्ण बन्दै गएका हुन्।
प्रदेश २ को पर्सा, बारा एवम् रौतहट जिल्लाको दक्षिणी भेगको ३७ हजार ४ सय हेक्टर क्षेत्रफलमा सिँचाइ सुविधा उपलब्ध गराइ कृषि उत्पादकत्वमा अभिवृद्धि गर्न र त्यसबाट कृषकको जीवनस्तरमा परिवर्तन ल्याउने उद्देश्यले विसं २०३० जेठ २१ गते तत्कालीन प्रधानमन्त्री कीर्तिनिधि विष्टले उद्घाटन गरेका थिए।
भारत विहार राज्यको वाल्मिकीनगरमा निर्माण गरी पूर्वी मूलनहर (तिरहुत मूलनहर) को दोनशाखा नहरबाट पश्चिमी चम्पारणको इनर्वा गाउँ तथा पश्चिमी पर्साको जानकी टोलमा प्रवेश गरेको सो नहर हाल बारा जिल्लाको ११ नम्बर ब्लकसम्म ६० किलोमिटरमा पानी आउने गरेको छ।
कूल ८१ किलोमिटर लम्बाइको सो मूलनहर रौतहट जिल्ला हुँदै बागमती नदीमा मिसिने गरे पनि हाल जानकी टोलदेखि बाराको ११ नम्बर ब्लकसम्म मात्र पानी पुग्ने गरेको नारायणी सिँचाइ व्यवस्थापन कार्यालय, बहुअरी, वीरगञ्जले जनाएको छ।
विश्व बैंकको ऋण सहयोगमा निर्माण भएको सो नहर सन् १९७५ र १९७६ गरी दुई चरणमा नेपाल सरकारलाई हस्तानान्तरण गरिएको थियो। सो नहरमा रहेको पुल, पुलेसा, कल्भर्ड तथा संरचना अति पुराना र जीर्ण भइसकेकाले जुनसुकै बेला भत्किन सक्ने अनुमान प्राविधिकको छ। ८१ किलोमिटर लम्बाई भएको सो गण्डक नहरमा मूलशाखा नहर १७ वटा, शाखा नहर ५० वटा, उपशाखा नहर ४ सय ८ दशमलव ५ किलोमिटर, प्रशाखा नहर (टर्सरी) १ हजार ४ सय ६८ किलोमिटर, निकास नहर ३ सय ८ किलोमिटर तथा सो नहरमा ३ हजार ५ सय ७४ वटा पुल, पुलेसा र कल्भर्ड रहेका छन्।
नेपाल–भारतबीच भएको गण्डक सम्झाैताअनुसार भारत सरकारले सो नहरमा ८ सय ५० क्युसेक पानी उपलब्ध गराउनुपर्नेमा विगतका वर्षमा ५ सयदेखि ६ सय क्युसेक पानी मात्र उपलब्ध गराउँदै आएको छ। आर्थिक वर्ष २०७४/०७५ मा धानबालीका लागि ८ सय २९ क्युसेक पानी प्राप्त हुँदै आएको सो कार्यालयले जनाएको छ।
प्रत्येक वर्ष नदीले नहरक्षेत्र, संरचना कटान गरिरहेकाले बजेटको अभावमा सोको मर्मतसम्भार गर्न नसकिएकाले पुल, पुलेसा तथा कल्भर्ड जीर्ण हुँदै गएको छ। डिभिजन प्रमुख राजेन्द्रप्रसाद साहले भने, 'जीर्ण हुँदै गएको संरचनाको मर्मतसम्भारका लागि सङ्घीय सरकारले बजेटको व्यवस्थापन गर्नुपर्छ।'
सो कार्यालयले वृहत योजनाअन्तर्गत रहेको ४ करोड रुपैयाँ बजेटमध्येबाट नहरको मर्मतसम्भार गरिए पनि जीर्ण रहेको पुल, पुलेसा तथा कल्भर्डको मर्मतसम्भार गर्ने कार्य बजेट अभावका कारण अगाडि बढ्न नसकेको प्रमुख साहको भनाइ छ।
कतिपय ठाउँमा किसानले कुलो मासेर खेत बनाएको, नहरको डिलमा रहेका हरियो रुख कटान गरी डिल अतिक्रमण गरेर घरटहरा बनाएको, फोहरमैला नहरमा फ्याँक्ने गरेकाले साइफन जाम हुने गरेका कारण नहर जीर्ण हुँदै गएको छ।
नहरका संरचना हलुका सवारीका लागि बनाइए पनि ठूला सवारी साधनको आवतजावत भइरहने भएकाले दिनदिनै ती संरचना जीर्ण बन्दै गएको समस्या यथावत रहेको देखिन्छ। यसैगरी वीरगञ्ज ठोरी गण्डक नहरको सिक्टा नदीको पुलसमेत जीर्ण बन्दै गएको छ।
जगरनाथपुर गाउँपालिकाको मसिहानी क्षेत्रमा पर्ने उक्त पुलमा सवारी साधन आवतजावत गर्ने भएकाले पुलको दुवैतर्फको आरसिसी पर्खाल जीर्ण बनिसकेको, पुलको सतह ठाउँ-ठाउँमा चर्किएको, पर्खालका स्तम्भ भाँचिएको, पुलको भित्ता हल्का दबाबमा हल्लिने गरेको छ।
सो जीर्ण रहेको पुल, पुलेसा कल्भर्डलगायतका पुराना संरचना समयमै मर्मतसम्भार नगरिए जुनसुकै बेला दुर्घटना हुने सम्भावना रहेको पश्चिमी पर्सावासीको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
