वासिङ्टन- अमेरिकी राष्ट्रपति डोनाल्ड ट्रम्प तथा अमेरिका भ्रमणमा रहेका कोलम्बियाका राष्ट्रपति इभान डुकले भेनेजुयलाका विषयमा सहकार्य गरेर अघि बढ्ने निर्णय गरेका छन्।
दुई नेताबीच भेनेजुयलाका विषयमा सहकार्यको महत्व र दुईपक्षीय सम्बन्धलाई मजबुत पार्ने सहमति भएको अमेरिकी सञ्चारमाध्यमले बताइएका छन्।
भेटपछि पत्रकारलाई दिइएको संयुक्त प्रतिक्रियामा राष्ट्रपति ट्रम्पले भेनेजुयलाको अवस्थालाई ‘हलचलपूर्ण’ भनेका छन्। यस्तो परिस्थितिमा भेनेजुयला (मदुरो) ले मानवीय सहयोग अस्वीकार गर्नु ‘भयङ्कर गल्ती’ भएको ट्रम्पको भनाइ छ।
ट्रम्पले कोलम्बियाका राष्ट्रपतिसँगको आफ्नो बैठक भेनेजुयलाबारेको छलफलमा समर्पित बनेको बताए भने डुकले वासिङ्टन र बोगोटाबीच भेनेजुयलाबारे छलफल जारी रहने धारणा राखे।
भेनेजुयलाका राष्ट्रपति निकोलस मदुरोले कक्बोडियाका नेता डुक र अमेरिकी राष्ट्रपति ट्रम्पबीच भएको बुधबारको बैठकलाई ‘भेनेजुयला विरोधीको भोज’को संज्ञा दिएका छन्।
भेनेजुयलाबारे आगामी नीतिमा ट्रम्प अस्पष्ट देखिएका छन्। के भेनेजुयलामा सैनिक समाधान विकल्प हो भन्नेबारे सञ्चारकर्मीको प्रश्नमा ट्रम्पले भने, 'धेरै विकल्पहरू छन् र हामी सबै विकल्पलाई हेरिरहेका छौं।'
बुधबारै अमेरिकी प्रतिनिधिसभाको विदेश मामिला हेर्ने समितिलाई दिएको प्रतिक्रियामा भेनेजुयलाका लागि अमेरिकी विशेष प्रतिनिधि एलिअट अब्राम्सले भेनेजुयलामा अमेरिकाको सैनिक विकल्पको प्रयोग नहुने स्पष्ट पारेका थिए।
'यतिबेला हामीले विकल्पहरूलाई टेबलमा छन् भनेर भनेका छौँ। किनकी समस्याको समाधान सधैँ वार्ताबाट नै हुने गर्छ,' अब्राम्सले भने। संसदको विदेश मामिला समितिका अध्यक्ष एलिअट एन्जेलले पनि सोही छलफलमा भने, 'भेनेजुयलामा अमेरिकी सैनिक हस्तक्षेप विकल्प होइन।'
मङ्गलबार रूसी विदेशमन्त्री सर्गेइ लाभरोभले अमेरिकी विदेशमन्त्रीसँगको टेलिफोन वार्तामा भेनेजुयलामा शक्तिको प्रयोग वा अन्य किसिमको अमेरिकी हस्तक्षेपको विरोध गरेका थिए।
रूसले संयुक्त राष्ट्रसंघ सुरक्षा परिषद्मा अमेरिकी प्रस्तावको विरूद्ध भेनेजुयला सङ्कट समाधानार्थ वार्ताको लागि सङ्कल्प प्रस्ताव पेस गर्ने तयारी गरेको लाभरोभले बताए।
यसैबीच भेनेजुयलाका विदेशमन्त्री जर्ज अरेइजाले दुई दिन पहिले भेनेजुयलामा आन्दोलनरत पक्षसित कुनै पूर्व सर्तविना नै वार्तामा बस्न र राजनीतिक सङ्कट टार्न आफ्नो सरकार तयार रहेको बताएका थिए।
अमेरिकी ट्रम्प प्रशासनले भेनेजुयलाका विपक्षी नेता हुँवा गुएइदो, जसले केही समय पहिले आफूलाई ‘अन्तरिम राष्ट्रपति’ का रूपमा घोषणा गरेका थिए, लाई मान्यता दिएका थिए। निर्वाचनबाट भेनेजुयलाको राष्ट्रपति निर्वाचित मदुरोले नयाँ कार्यकालको सपथ लिएको दुई सातापछि विकसित नयाँ राजनीतिक समिकरणका कारण भनेजुयलाले विश्वको ध्यान खिचेको छ।
वासिङ्टनको समर्थन गुइएदोलाई रहेपछि मदुरोले अमेरिकासँगको कूटनीतिक तथा राजनीतिक सम्बन्धलाई थप कडा पारेको बताएका थिए। उनले भेनेजुयलामा कार्यरत अमेरिकी कूटनीतिज्ञ तथा महावाणिज्यदूतलाई ७२ घण्टाभित्र देश छोड्न निर्देशन दिएका थिए। रासस/सिन्ह्वा
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
