काठमाडौ- नेपाल कम्युनिस्ट पार्टी (नेकपा) का अध्यक्ष पुष्पकमल दाहाल ‘प्रचण्डले’ पार्टी एकतापछि ‘जनयुद्ध’का सहिदलाई सम्झने कार्यक्रम एकताबद्ध भएर आयोजना गर्नुलै निकै ठूलो अर्थ राख्ने बताएका छन्।
बुधबार जनयुद्ध दिवसका अवसरमा पार्टी कार्यलाय धुम्बाराहीमा जनआन्दोलन र जनयुद्धका सहिदहरुप्रति श्रद्धाञ्जली व्यक्त गर्न आयोजित कार्यक्रमलाई सम्बोधन गर्दै प्रचण्डले यस्तो बताएका हुन्। ‘जेठ ३ गते पार्टी एकताको घोषणा र आज जनयुद्धका सहिदलाई सम्झने कार्यक्रम एकताबद्ध रुपमा आयोजना गर्नुले निकै ठूलो अर्थ राखेको छ,’ प्रचण्डले भने।
कार्यक्रममा अर्का अध्यक्ष एवं प्रधानमन्त्री केपी शर्मा ओली भने उपस्थित भएनन्। सरकारले नयाँ कार्यक्रम घोषणा गर्ने कार्यक्रममा व्यस्त हुनुपरेकाले ओली कार्यक्रममा आउन नसकेको प्रचण्डले बताए।
उनले जनयुद्ध दिवस मनाउने कार्यक्रम दुवै अध्यक्षको सहमतिमा भएको प्रस्ट्याउँदै भने, 'यो निर्णय दुवै अध्यक्षले सहमति गरेर भएको छ। पार्टीमा यसले नयाँ एकताको अधार बनाएको छ।’
पार्टी एकता नहोला कि भन्ने चिन्तालाई गर्नेहरुलाई यसले निकै सकरात्मक सन्देश दिएको भन्दै प्रचण्डले केही दिनभित्रै पार्टी एकताको कामलाई टुंग्याएर अघि बढ्ने ऊर्जा पनि यसबाट प्राप्त भएको बताए।
कार्यक्रममा पूर्व एमालेका तर्फबाट सुवास नेम्वाङ, विष्णु पौडेल लगायतका नेताहरु उपस्थित थिए।
पूर्व नेकपा (माओवादी केन्द्र) को तत्कालीन पार्टी कार्यालय पेरिसडाँडा आयोजना गरेको कार्यक्रममा भने पूर्व एमाले नेताहरुको उपस्थिति देखिएको थिएन। उनलाई स्वागत गर्ने कार्यक्रममा पूर्व माओवादी कार्यकर्ता मात्रै थिए।
कार्यक्रमलाई सम्बोधन गर्दै प्रचण्डले कम्युनिस्ट आन्दोलनमा शान्तिपूर्ण संसदीय र सशस्त्र क्रान्तिका दुई धार पहिले रहेको भन्दै ती दुवै मिलेर अहिले संघीय लोकतान्त्रिक गणतन्त्र संस्थागत भएको बताए। ‘केही समय यी दुवै धारले एक-अर्कालाई निषेध गर्ने प्रयास नभएका होइनन्,’ उनको भनाइ छ, ‘यी दुईवटै धार सामन्तवाद विरुद्धका थिए। यी दुवै मिलेर नै यसले संघीय लोकतान्त्रिक गणतन्त्रलाई संस्थागत गर्ने अवस्था आयो ।’
‘संसारलाई आश्चार्यमा पार्ने काम गरिरहेका छौं’
प्रचण्डले आफूहरुले संसारलाई नै आश्चार्यमा पार्ने काम गरिरहेको पनि बताएका छन्।
‘नेपालमा के भइरहेको छ भनेर संसारले कान खोलेर, आँखा होलेर हेर्नुपर्ने अवस्था हामीले बनाएका छौं,’ प्रचण्डको भनाइ छ, ‘हामीले अलि कल्पना बाहिरको काम गरेका छौं। संसारलाई नै आश्चार्यकित पार्ने काम गरेका छौं ।’
सशस्त्र क्रान्तिलाई शान्तिपूर्ण रुपमा अवतरण गर्नु र लोकतान्त्रिक विधिबाटै निर्वाचित भएर कम्युनिस्ट पार्टीले दुई तिहाइको सकार बनाउनुलाई प्रचण्डले आश्चार्यका रुपमा व्याख्या गरे। ‘जताततै कम्युनिस्ट आन्दोलन रक्षात्मक भयो भनिएका बेला नेपालमा नयाँ रुपमा बलियो भएर अघि आएको छ,’ उनले भने, ‘हामी लोकतान्त्रिक तरिकाले अघि बढेर आएका छौं।’
प्रचण्डले पार्टी भित्रै फाटो ल्याउने, नेताहरुबीचको एकतालाई कमजोर पार्ने षड्यन्त्र पनि भएको भन्दै सबै एकताबद्ध भएर अघि बढ्नुपर्नेमा जोड दिए। ‘पार्टी एकता हामीलाई कसैले दया, माया गरेर भएको होइन,’ प्रचण्डले भने, ‘यो क्रान्ति र आन्दोलनका बलमा भएको हो। सबैले हेक्का राख्नैपर्ने विषय के हो भने हामी प्रतिक्रियावादीको ‘प्रभोकेसन’मा आउने छैनौं।’
प्रचण्डले विभिन्न समूहमा विभाजित कम्युनिस्ट पार्टीहरुलाई पनि गोलबन्द हुनका लागि पनि आह्वान गरे।
‘हामी सबैखाले विभ्रमलाई छाडेर नेपाललाई महान् बनाउन सबै एउटै केन्द्रमा गोलबन्द हौं,’ उनले थपे, ‘योभन्दा अर्को विकल्प छैन। यही बाटोबाट मात्रै हामी समाजवादतिर जान सक्छौं।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791965585.png)
-1791964075.png)
-1787821305.jpg)
-1786602170.png)
