काठमाडौं– भारतको उडिसामा जारी हिरो गोल्डकपको आफ्नो दोस्रो खेलमा नेपाली महिला टिमले घरेलु टिम भारतलाई हराउँदै इतिहास बनाएको छ।
सोमबार राति भएको खेलमा नेपालले भारतमाथि २–१ को जित निकालेको थियो। नेपालको जितमा दुवै गोल सावित्रा भण्डारीले गरेकी थिइन्। महिला फुटबलको सिरियर प्रतिस्पर्धा नेपालले भारतमाथि जित हात पारेको यो पहिलो पटक हो।यसअघि भारतसँग लगातार पराजित भइरहेको नेपाललाई जितले राहत मिलेको छ।
नेपालका प्रशिक्षक हरि खड्काले आफ्नो सपना पूरा भएको बताएका छन्। 'जिम्मेवारी सम्हालेदेखि नै मेरो र टिमको सपना भारतलाई हराउने थियो। त्यो सपना पूरा भएको छ,' खड्काले खेलपछि भने।
खेलमा नेपालले सुरुवाती १० मिनेटमै २ गोल गरेको थियो। सावित्राले खेलको पाँचौ र सातौं मिनेटमा गोल गर्दा नेपाल सहज अवस्थामा देखिएको थियो। 'भारत जहिले पनि बलियो टिम हो,' प्रशिक्षक खड्काले भने, 'आज हाम्रो रणनीतिले काम गर्यो। हाम्रो रणनीति १० मिनेटभित्र गोल गर्ने थियो। त्यहि रणनीतिअनुसार गोल भयो।'
उनले खेलाडीले आफ्नो जिम्मेवारी पूरा गरेकोमा पनि खुसी व्यक्त गरे। उनले भने,' खेलाडीले दिएको जिम्मावारी शतप्रतिशत पूरा गरे त्यो पनि कुनै गल्ती नगरी।'
भारतलाई खेलमा दबाब दिइरहन नसक्नु भने नेपालको कमजोर पक्ष भएको खड्काको भनाइ छ। 'हामीले खेल अवधिभर भारतलाई दबाबमा भने राख्न सकेनौं,' उनले भने,'भारतको बलियो पक्ष टिम कम्बिनेस हो। उनीहरुको बल स्विच गर्ने तरिका पनि राम्रो छ। जब उनीहरुले मौका पाए, डिफेन्डरलाई बिट गरेर प्रहार गरिरहे।'
नेपालले प्रतियोगितालाई आगामी महिना विराटनगरमा हुने महिला साफ च्याम्पियनसिपको तयारीको रुपमा लिएको छ। भारतसँग जित हात पारेसँगै साफ च्याम्पियनसिप जित्ने नेपालको लक्ष्यमा थप उर्जा समेत मिलेको छ। यद्यपी जारी प्रतियोगिताको पहिलो खेलमा भने नेपाल पराजित भएको थियो। नेपाललाई म्यानमारले ३–० गोलले हराएको थियो।
'मैले प्रतियोगिता सुरु हुनअघि नै हामी प्रतियोगिताको कमजोर टिम भनेको थिएँ। तर हाम्रो फाइटिङ स्पिरिट र जितको भावना भने कमजोर थिएन। जसले गर्दा हामीले भारतलाई हराउन सक्यौं,' प्रशिक्षक खड्का भन्छन्।
नेपालले अब समूहको अन्तिम खेलमा बुधबार इरानसँग भिड्नेछ। इरानविरुद्ध पनि जितका लागि खेल्ने प्रशिक्षक खड्काको भनाइ छ।
प्रतियोगितामा एक/एक जित निकालेको भारत र म्यानमारसहित नेपालको पनि समान तीन अङ्क भएको छ। अर्को टिली इरानले अंक जोड्न सकेको छैन। नेपालले अन्तिम खेलमा इरानलाई हराए फाइनलमा पुग्नेछ। राउण्ड रोविन आधारमा हुने खेलमा शीर्ष दुई टिमले फाइनल खेल्ने छन्।
भिडियो :
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787821305.jpg)
-1786602170.png)
