राजविराज– प्रहरी ऐन लागू भएसँगै सप्तकोशी नगरपालिका–१, फत्तेपुरस्थित स्थापना भएको प्रहरी चौकी सरकारी बेवास्ताका कारण उपस्वास्थ्य चौकीमा भर्ना भएको भन्दै स्थानीयले व्यंग्य गरेका छन्।
सरकारी बेवास्ताका कारण कार्यालय राख्ने स्थान अभाव हुँदा प्रहरी चौकी स्वास्थ्य संस्थाको भवनमा राख्नु परेको विषयमा उनीहरूले व्यंग्य गरेका हुन्।
‘समुदाय–प्रहरी साझेदारी कार्यक्रम’ अन्तर्गत इलाका प्रहरी कार्यालय कञ्चनपुरले आयोजना गरेको नागरिक सुनुवाइ कार्यक्रममा उपस्थित सिडिओ सुरेन्द्र पौडेल तथा एसपी राजेन्द्र विष्टलाई लक्षित गर्दै स्थानीयले प्रहरी चौकीलाई इलाका प्रहरी कार्यालयमा स्तरोन्नती गर्न आग्रह गरे।
‘सुरक्षा संवेदनशीलताका कारण २०१२ सालमै स्थापना भएको प्रहरी चौकी अहिलेसम्म पनि स्तरोन्नती भएन,’ स्थानीय रमण कर्णले भन,े ‘हुँदा–हुँदा अब त सुरक्षा गर्नुपर्ने प्रहरी स्वास्थ्य चौकीमा भर्ना भएका छन्।’
दशकौंपछि स्थापना भएका प्रहरी चौकी इलाका प्रहरी कार्यालयमा स्तरोन्नती भइसक्दा पनि फत्तेपुर प्रहरी चौकी इलाका बन्न नसकेको, भएका प्रहरीलाई पनि साधन, श्रोत र सञ्चारबिहीन बनाएको लगायतका विषयमा स्थानीयले गुनासो गरे। २५ हजारभन्दा बढी जनसंख्या भएको सप्तकोशी नगरपालिकाको सुरक्षाका लागि १०÷१२ जना प्रहरी अपर्याप्त भएको र भौगोलिक हिसाकले पनि थोरै प्रहरीले सुरक्षा दिन नसकेको उनीहरुले बताए।
‘चौकीमा न सवारी साधन छ, नत सञ्चार सेट,’ गोविन्द खत्रीले भने, ‘नगरपालिकाको एक छेउमा भएको प्रहरी ८÷१० किलोमिटर हिँडेर अर्को छेउमा पुग्नुपर्छ। त्यो पनि डराउँदै–डराउँदै जानुपर्ने अवस्था छ। प्रहरीलाई यसरी अपाङ्ग बनाएर राखेपछि कसरी हुन्छ जनताको सुरक्षा?’
लामो समयसम्म सिँचाइको भवनमा रहेको प्रहरी चौकी पछिल्लो समय स्वास्थ्य चौकीको वर्थिङ सेन्टरमा सरेको छ। स्वास्थ्य चौकीले पटक–पटक भवन खाली गर्न आग्रह गर्दा पनि प्रहरीको आफनो भवन अधुरो भएकाले सर्न नसकिएको सइ अमिरी यादवले बताए।
सिडिओ पौडेल र एसपी विष्टले भने सुरक्षा समितिको बैठकको निर्णयअनुसार चौकीलाई इलाकामा स्तरोन्नती गर्न यसअघि नै सिफारिस गरिसकिएको जानकारी दिँदै अधुरो भवन पूर्ण गरी प्रहरीलाई आफ्नो भवनमा सर्ने वातावरण तयार गरिदिन नगरपालिकाका मेयर उत्तम कुमार गौतमसँग आग्रह गरे।
प्रहरी चौकी भवन निर्माण समितिका संयोजक अशोक कुमार चौधरीले रकम अभावमा भवनको फिनिसिङको काम रोकिएको बताए। ‘५÷६ लाख रुपैयाँको व्यवस्था गर्न सके बाँकी काम सकिन्छ,’ उनले भने, ‘धरै काम त चन्दा उठाएरै गरियो, बाँकी चाँहि कतैबाट व्यवस्था गर्न सके प्रहरीलाई आफनै भवनमा सार्न सकिन्छ।’
कार्यक्रममा कोशीटप्पु वन्यजन्तु आरक्षबाट निस्ने हात्ती, बँदेल, अर्ना, भालुलगायतका जंगली जनावरको आतंक, लागुऔषधको दुब्र्यसनी, खानेपानी र विद्युतको समस्यालगायतका विषयमा सर्वसाधारणले गुनासो गरेका थिए।
सर्वसाधारणको जिज्ञासा र गुनासोका विषयमा सिडिओ पौडेल, एसपी विष्ट, शसस्त्र प्रहरी बल सीमा सुरक्षा कार्यालयका एसपी खेमबहादुर थापा मगर, डिभिजन वन अधिकृत धिरेन्द्रप्रसाद सिंहलगायतले जवाफ दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
