जनकपुर– जनकपुरधाम उपमहानगरपालिकाका केही वडाका वडाध्यक्षले नगर प्रमुखको विरोधमा धर्ना जारी राखेका छन्।
नगर प्रमुखसँग असन्तुष्ट वडाध्यक्षहरूले विकास निर्माणका काममा आफूहरूलाई पनि अधिकार दिनुपर्ने माग गर्दै धर्ना सुरु गरेका हुन्। निर्णय प्रक्रियामा नगर प्रमुख लालकिशोर साहले एकलौटी गरेको आरोप उनीहरूले लगाएका छन्।
लामो समयपछि स्थानीय जनताले जनप्रतिनिधि पाएको छ। तर, उनीहरूबीच नै विवाद बढ्दा स्थानीयहरू चिन्तित देखिन थालेका छन्। उपमहानगरपालिकाका प्रमुख साहसँग वडाध्यक्षहरू असन्तुष्टि छन्।
नगर प्रमुखको काम कारबाहीप्रति असन्तुष्ट बनेका १६ वडाध्यक्षले रिले अनसन सुरु गरेका छन्। जनकुपरमा जम्मा २५ वडा छन्।
आफूहरूले बुझाएको १६ बुँदे माग पूरा गर्नतर्फ उपमहानगरपालिकाले चासो नदेखाएपछि बाध्य भएर आन्दोलनमा उत्रेको वडा नम्बर ९ का अध्यक्ष परमेश्वर साहले बताए।
उनले नगरप्रमुख साह तानाशाही शैलीमा अगाडि बढेको आरोप लगाएका छन्। संवैधानिक व्यवस्थाअनुसार अधिकार प्रत्यायोजन, दैनिक कार्य, भैपरी आउने कार्यका लागि स्वायत्त व्यवस्था, वडा कार्यालयमा आवश्यक मानवीय, भौतिक, आर्थिक संशाेधनका स्वायत्त परिचालनको व्यवस्था हुनुपर्ने लगायतका माग वडाध्यक्षहरूले अघि सारेका छन्।
यसअघि आन्दोलित वाडाध्यक्षले उपमहानगरपालिकालाई माग पूरा गर्न माघ १३ सम्म अल्टिमेटम दिएका थिए। २५ मध्ये असन्तुष्ट १६ जना वडा अध्यक्षले सात दिने अल्टिमेटम दिँदै २५ पौषमा १६ बुँदे माग राख्दै उपमहानगरपालिकालाई ज्ञापन पत्र बुझाएका थिए।
माघ २१ देखि दैनिक १/१ घन्टा अवधि बढाउँदै २७ गते बिहान १० बजेदेखि ६ घन्टा धर्ना दिने कार्यक्रम उनीहरूले घोषणा गरेका छन्। यस अवधिमा समेत माग सम्बोधन नभए २८ गतेर २९ गते आफूहरु २४ घण्टे रिले अनसनमा बस्ने असन्तुष्ट वडा अध्यक्षहरूले जनाएका छन्।
यता वडा अध्यक्षहरुको आन्दोलनमा नेपाली कांग्रेस जनकपुरधाम उपमहानगरपािलका कमिटिले समेत एक्येवद्धता जनाएका छन। नगरप्रमुख एकलौटी रुपमा तानाशाही शैलीमा अगाडि बढेको जनकपुरधाम उपमहानगरपािलका नगर कमिटीका अध्यक्ष मनोज साहले बताए।
नगर विकासका लागि सबै मिलेर अगाडि बढनुपर्ने समयमा जनप्रतिनिधिहरूबीचको विवादले नगरबासीसमेत चिन्तित बनेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1776414047.png)
-1764146706.png)
