बुटवल– प्रदेश ५ को भुमि व्यवस्था, कृषि तथा सहकारी मन्त्रालय र बुटवल उद्योग वाणिज्य संघको संयुक्त आयोजनामा बुटवलमा जारी कृषि मेलामा कृषि गोष्ठी, वक्तृत्वकला र अन्य विभिन्न प्रतियोगिता सम्पन्न भएका छन्।
मेलास्थल बुटवलमण्डपमा बुधबार कृषि व्यवसायीकरणका लागि संरक्षित कृषि प्रविधि कार्यक्रम विषयक गोष्ठी, कृषि केन्द्रित विद्यालयस्तरीय वक्तृत्वकला र दोहोरी गीत प्रतियोगिता सम्पन्न भएका हुन्।
गोष्ठीमा प्रदेशमा कृषिको सम्भावना, अवसर र चुनौती विषयमा वरिष्ठ कृषि विकास अधिकृत विनोद घिमिरेले कृषिको व्यवसायीकरणका लागि संरक्षित कृषि प्रविधि विषयमा कार्यपत्र प्रस्तुत गरेका थिए।
युवा व्यवसायी मदन पौडेलले प्रदेश ५ का पशुपन्छिपालनको संभावना र अवस्था र व्यवसायी प्रेमसागर पौडेल र इश्वर पौडेलले माटो बिना तरकारी खेती (हाइडोफोनिक्स)का सम्बन्धमा छुट्टाछुट्टै कार्यपत्र पेस गरेका थिए।
उनीहरुले प्रदेश नम्बर ५ मा कृषिको राम्रो संभावना रहेको र सरकारले पनि कृषिलाई विशेष प्राथमिकता दिएको अवस्थामा कृषिमा लगानी र श्रम गरेर उचित लाभ लिन युवालाई आग्रह गरे।
वरिष्ठ कृषि विकास अधिकृत विनोद घिमिरेले प्रदेश सरकारले अघि सारेको कृषि स्मार्ट गाउँ कार्यक्रम, करार खेती, कौसी खेती लगायतका विशेष कार्यक्रममा सहभागी भएमा किसानलाई सरकारले विभिन्न सहयोग गर्ने जानकारी गराए।
संघका अध्यक्ष तथा मेलाका संयोजक खिमबहादुर हमालको सभापतित्व र पशुपन्छि तथा मत्स्य विकास निर्देशनालयका निर्देशक युगल किशोर तिवारीको प्रमुख आतिथ्यमा भएको कार्यक्रममा बुटवल उद्योग वाणिज्य संघका पूर्वअध्यक्ष नवराज श्रेष्ठ, कार्यक्रम संयोजक तथा संघका कार्यसमिति सदस्य सञ्जय जयसवाल, गोबिन्द पाण्डे लगायतले बोलेका थिए।
'बजारमुखी कृषिको आधार, समुन्नत नेपालको पूर्वाधार' विषयमा अन्तर विद्यालयस्तरीय वक्तृत्वकला प्रतियोगितामा न्यु होराइजनकी स्मारिका न्यौपाने प्रथम, सगरमाथा आवासीय माविकी प्रशंसा आचार्य द्विती र पामिर एकेडेमीकी प्रतीक्षा खराल तृतीय भएका छन्। विजयीलाई क्रमशः ५ हजार, ३ हजार र २ हजार नगद सहित पुरस्कृत गरिएको थियो।
मेलाकै अवसरमा बिहिबार बुटवल तथा आसपासका क्षेत्रमा वन्यजन्तुले पारेको प्रभाव र न्यूनीकरणका उपायका सम्बन्धमा अन्तर्क्रिया, दुग्धपान प्रतियोगिता, माछा मार्ने बल्छी प्रतियोगिता लगायतका कार्यक्रम हुने जानकारी दिइएको छ।
मेलामा किसानले आफ्ना खेतबारीको माटो ल्याई परीक्षण गरिरहेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
