-नारायण अधिकारी/रासस
चितवन- किसानले लगाएको तरकारी नबिकेपछि जोतेर नष्ट गर्ने क्रम जिल्लामा सुरु भएको छ। तरकारी टिप्ने र ढुवानी भाडासमेत नउठ्ने भएपछि अर्को खेती गर्नका लागि किसानले तरकारी नष्ट गर्न थालेका हुन्।
पछिल्लो समय किसानले तरकारीको मूल्य नपाएपछि पनि खेतबारी जोत्न थालेका छन्। सोमबार पूर्वी चितवनका चार किसानले एकसाथ तरकारी खेतीमा ट्याक्टर लगाएका छन्। आफूले उत्पादन गरेको तरकारी उत्पादनले बजारभाउ नपाएपछि खैरहनी नगपालिका–१ ज्यामिरेका इन्दिरा भुसाल, सूर्यप्रसाद भुसाल, नवराज भुसाल र कृष्ण सापकोटाले बन्दा र मुला खेतीमा ट्याक्टर लगाएका हुन्।
केही दिनअघि सोही नगरपालिका–६ तुलसीपुरका कृषक पुरन महतोले बन्दा जोतेर नष्ट गरेका थिए।
चार किसानकाे २४ कट्ठाभन्दा बढी क्षेत्रफलमा लगाएको बन्दा नष्ट गरिएकाे कृषक नवराज भुसालले बताए। बन्दाप्रति किलोग्राम १ रुपैयाँमा पनि नउठेपछि ट्याक्टर लगाएर नष्ट गरेको उनले जानकारी दिए। भुसालले १० कट्ठामा लगाएको बन्दामध्ये ७ कट्ठाको जेनतेन बिक्री भए पनि तीन कट्ठामा लगाएको बन्दा व्यापारीलाई सित्तैमा लैजान आग्रह गर्दासमेत लैजान नमानेको गुनासाे गरे।
यसैगरी अर्की किसान इन्दिरा भुसालले ६ कट्ठा, सूर्यप्रसाद भुसालको ४ कट्ठा र कृष्ण सापकाेटाको ११ कट्ठामा लगाइएको बन्दाकोभी ट्याक्टर लगाएर नष्ट गरिएकाे हो। चितवनकाे बजार क्षेत्रमा बन्दाकोभीको मूल्य प्रतिकेजी २० रुपैयाँकाे हाराहारी भए पनि धेरै उत्पादन भएपछि कृषकको तरकारी नउठेको हो।
सो क्षेत्रका तरकारी किसानको संस्था ग्रामीण ताजा तरकारी तथा फलफूल उत्पादक सहकारी संस्थाका अध्यक्ष पूर्णदत्त भुसालका अनुसार ३ सय ६५ कृषक सहकारीमा आबद्ध भएर तरकारी खेती गर्दै आएका छन्। उनका अनुसार १२ बिघा जतिमा लगाएको बन्दा नष्ट गरिसकिएको छ। अझै ६० बिघा जतिमा बन्दा रहेको उनले बताए।
गत वर्ष त्यस सहकारीका सदस्यले १ करोड रुपैयाँको बन्दा बिक्री गरेको भुसालले जानकारी दिए।
सो क्षेत्रमा लगाइएको बन्दासँगै मुला, भेन्टा, केराउलगायतले पनि मूल्य नपाएको उनकाे भनाइ छ। त्यहाँका कृषकले झन्डै ३ सय बिघामा तरकारी खेती गरेका छन्। खेती गर्दा खर्च बढी हुने तर मूल्य नपाएर जोत्नु पर्दाको पीडा किसानले व्यहोरिरहनुपरेको भुसालले गुनासाे गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
