बुटवल- प्रदेश ५ प्रदेश सभा गठन एक वर्ष पूरा भएको अवसरमा बुटवलमा प्रदेश दिवस मनाइएको छ। तर गठन भएको एक वर्ष बितिसक्दा पनि प्रदेशसभाले राजधानी र नाम टुंगो लगाउन सकेको छैन।
सो अवसरमा आयोजित कार्यक्रममा प्रदेश प्रमुख उमकान्त झा र मुख्य मन्त्री शंकर पोखरेलले सम्बोधन गरेका छन्।
प्रदेशसभा सचिवालयले आयोजना गरेको सो कार्यक्रममा सम्बोधन गर्दै प्रदेश प्रमुख झाले जनताको चाहना र आकांक्षा पूरा गर्ने दिशामा प्रदेशसभाले महत्वपूर्ण भूमिका निर्वाह गरेको बताए। उनले प्रदेश सभाका सांसदले जनताको चाहना पूरा गर्ने र जनताको गुनासो गाउँमै गएर सुन्ने वातावरण प्रदेशसभामार्फत् जनताका प्रतिनिधिले गरिरहेको बताएका थिए।
कार्यक्रममा मुख्यमन्त्री शंकर पोखरेलले प्रदेशको राजधानी सबैलाई पायक पर्ने स्थानमा बनाइने बताएका थिए। प्रदेश राजधानी कहाँ बनाउने भन्दा पनि आगामी सन्ततिलाई मान्य हुने तथा भविष्यलाई पनि ध्यान दिएर भूगोल, साधन स्रोत र संरचनाको हिसाबले पनि उपयुक्त हुने स्थानमा राखिनु पर्नेमा जोड दिए।
मुख्यमन्त्री पोखरेलले भने– 'हामी सबैले सुन्दर राजधानीको कल्पना गरौं, जहाँ राजधानी बनाउँदा आगामी पुस्ताले पनि गर्व गरोस्, ढिलो भयो भनेर पछुताउनु पर्दैन।'
उनले एक वर्षको अवधीमा १६ वटा विधेयक पारित भएको र जारी प्रदेशसभाको अधिवेशनलाई विधेयक अधिवेशनको रुपमा सरकारले लिएको भन्दै प्रदेशसभालाई सबल बनाउन सांसदले सत्ता र प्रतिपक्षको भावना त्याग्नु पर्नेमा जोड दिए।
कार्यक्रममा सभामुख पूर्णबहादुर घर्तीले प्रदेशसभाको एक वर्षको अवधिमा आइपुग्दा प्रदेशसभा बलियो बनाउन सबैको सहयोगको अपेक्षा गरे। सभामुख घर्तीले शून्यको अवस्थावाट सुरु भएको प्रदेशसभाले संघीयता कार्यान्वयन गर्न महत्वपूर्ण भूमिका निर्वाह गरेको दावी गरेका थिए।
प्रमुख प्रतिपक्षी दलका नेता बलदेव शर्मा पोखरेलले एक वर्षको अवधिमा हुनुपर्ने जति काम नभएको भन्दै चिन्ता प्रकट गरे। प्रदेशको राजधानी र नामको टुंगो लाग्न नसकेको भन्दै जनतामा खासै आशा जगाउन नसकिएकोले अब गम्भीर हुने समय आएको उल्लेख गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
