काराकास– भेनेजुएलाका राष्ट्रपति निकोलस मदुरोले यहाँको राजनीतिक संकट समाधानको प्रयासस्वरुप समय अगावै निर्वाचनको प्रस्ताव गरेका छन्।
यहाँका विपक्षी आन्दोलनकारीले राष्ट्रपति निकोलस मदुरोका विरुद्धमा शनिबार बृहत प्रदर्शन गरेका थिए र उनीहरुले आन्दोलनलाई थप चर्काउने चेतावनी राष्ट्रपति मदुरोलाई दिएका थिए।
उक्त विरोध प्रदर्शनका क्रममा विपक्षीहरूले पनि यहाँ निर्वाचनको माग गरेका थिए। उनीहरुले राष्ट्रपति मदुरोलाई तत्कालै निष्पक्ष निर्वाचन गर्न माग गरेका थिए।
उनीहरुले गरेको सो निर्वाचनको मागपछि शनिबार नै राष्ट्रपति मदुरोले पनि समय अगावै निर्वाचन गर्न सकिने प्रस्ताव गरेका थिए।
राष्ट्रपति मदुरोले यहाँको राजनीतिक समस्याको समाधानका लागि निर्वाचन एक उत्तम उपाय हुनसक्ने बताएका समाचारमा जनाइएको छ।
उता आफैंले अन्तरिम राष्ट्रपति घोषणा गरेका र अमेरिकालगायतका देशको समर्थन पाएका विपक्षी नेता हुँवा गुएइदो समर्थकहरूले शुक्रबार व्यापक रुपमा प्रदर्शन गरेका थिए।
त्यसपछि शनिबार राष्ट्रपति मदुरोले सो निर्वाचनको प्रस्ताव गरेकाे समाचारमा जनाइएको छ। युरोपेली संघमा आवद्ध प्रमुख देशहरूले पनि नयाँ निर्वाचनको वातावरण बनाउन सकेमा वर्तमान समस्याको समाधान निस्किन सक्ने प्रस्ताव गरेका छन्।
विपक्षी नेता गुएइदोका समर्थक विदेशीहरूले पनि मदुरोलाई जतिसक्दो चाँडो निर्वाचन घोषणाका लागि गत हप्ता एक हप्ताको समय दिएका थिए।
यस परिस्थितिमा राष्ट्रपति मदुरोले निवाचन गर्न सकिने प्रस्ताव गरेबाट यहाँको राजनीतिक संकटको समाधान पनि निस्किन सक्ने अनुमान गरिएको छ।
यहाँको नेशनल एसेम्ब्लीको निर्वाचन सन् २०१७ मा भएको थियो। सो निर्वाचन भेनेजुएलामा संविधान निर्माणका लागि भन्दै भएको हो। यो संविधान सभाको निर्वाचन थियो र यसले संविधान निर्माण गर्ने भनिएको थियो।
तर, सो निर्वाचन विपक्षीहरूले बहिस्कार गरेका थिए। जसका कारण राष्ट्रपति मोदुरोका पक्षधरहरूको मात्र संसदमा प्रतिनधित्व भएको थियो।
त्यसैले पनि गुएइदोहरूले सो निर्वाचनबाट निर्वाचित सरकार वैधानिक नभएको दाबी गर्दै आएका हुन्।
अब नियमित रुपमा भएमा आगामी निर्वाचन् सन् २०२० मा हुनुपर्ने हो। तर, पनि सन् २०१७ को संविधान सभाको निर्वाचनको परिणाम विपक्षीहरूले स्वीकार नगरेका र अर्काे निर्वाचनको माग गरेकोले त्यस अगावै निर्वाचन गर्न सकिने राष्ट्रपति मदुरोले बताएका हुन्।
विपक्षीहरुले तत्काल निर्वाचनको वातावरण नबनाएमा मदुरोलाई सहयोग गर्न नसक्ने चेतावनी दिएकापछि उनको यो प्रस्ताव आएको अनुमान गरिएको छ।
भेनेजुएलामा पछिल्लो समयमा राजनीतिक संकट बढ्दो छ। यहाँको राष्ट्रियसभाका अध्यक्ष समेत रहेका गुएइदोले राष्ट्रपति मदुरोलाई अवैध दाबी गर्दै आएका छन्।
उनले केही दिन अगाडि आफैंलाई अन्तरिम राष्ट्रपतिका रुपमा घोषणा गरेका थिए। उनको यो कदमलाई अमेरिका र अरु केही विदेशीहरूले समर्थन गरेपछि यहाँको संकट बढेको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
