कञ्चनपुर– कञ्चनपुरको पुनर्वास नगरपालिका–११, गौरिफण्टा नाकामा भारतले एकपक्षीय रुपमा नाली निर्माण तथा तारजाली बनाउने काम सुरु गरेको छ।
नेपाल पक्षले विरोध गरेपछि गत शुक्रबारदेखि रोकिएको सो निर्माण कार्य शनिबारदेखि सुरु गरिएको जनाइएको छ। विवादित सीमामा हुन लागेको सुरक्षा नालीको निर्माण कार्य अघि बढाउँदा एसडिएम पलिया सुंदू सुधाकरण, गौरी फण्टा कोतवाल रेन्जर मनोज श्रीवास्तव, प्रहरी एमके मौर्य, कमांडो सन्त प्रकाश त्रिपाठी, जमुना प्रसाद फा, रेस्ट गार्ड कृपाशंकर रमेश पांडे, राजाराम तिवारी तथा एसएसबी इन्स्पेक्टर अभय यादवसहित अन्य सुरक्षा निकायको सहभागिता थियो।
भारतीयले कञ्चनपुरको सीमा स्तम्भ १५३/१७१ नम्बरमा डोजर लगाएर सो क्षेत्रमा दुई किलोमिटर लामो नाली तथा तारजाली गर्न लागेको हो।
झण्डै १ सय ५० मिटरसम्म निर्माण कार्य अघि बढाउँदा नेपाल पक्षले विरोध गरेपछि अर्को व्यवस्था नभएसम्म गत शुक्रबारदेखि सो कार्य रोकेको थियो।
शनिबारदेखि पुनः डोजरसहित नाली निर्माण गर्ने कार्य अघि बढेको हो। गौरी फंटा खीरी दुधवा नेशनल पार्कका डिप्टी डायरेक्टर महावीर कौजलगिको आदेश बमोजिम सो कार्य अघि बढेको जनाइएको छ।
कौजलगिले बिहीबार सो क्षेत्रको निरिक्षण गर्दै ‘काम अघि बढाउन’ निर्देशन दिएका थिए। उनले निर्देशन दिँदै भनेको थिए, ‘यो हाम्रै सीमाभित्र निर्माण भइरहेको छ। यदि नेपाली पक्षलाई आपत्ति छ भने पत्र पठाउनुहोस्।’
शुक्रबार बसेको बैठकले सर्वपक्षीय बैठकबाट यसको निकास निकाल्ने सहमति गरे पनि बैठक नबस्दै डिप्टी डायरेक्टरको निर्देशनमा नेपाल पक्षलाई जानकारी नै नदिई निर्माण कार्य अघि बढाएको छ।
कञ्चनपुर सहायक प्रमुख जिल्ला अधिकारी शंकर विष्टले भारत वा नेपालले सीमामा कुनै पनि भौतिक संरचना निर्माण गर्दा दुवै पक्षलाई जानकारी दिएर मात्र काम गर्नुपर्ने बताए।
भारतीय सीमा सुरक्षा बलका अधिकारी अभय यादवले तस्करी, लागूऔषध ओसारपसार तथा अपराधिक क्रियाकलाप रोक्न नाली तथा तारजाली निर्माण गरिन लागेको बताए।
उनले भने, ‘सिमा मिच्ने तथा नेपाली पक्षलाई दुःख दिने हाम्रो उद्देश्य होइन।’ भारतीय सुरक्षा अधिकारी यादवले आफूहरुले भारतको भूमिमा नै नाली तथा तारजाली निर्माण कार्य गरिरहेको पुनः दोहोर्याएका थिए।
दुधवा नेशनल पार्कका फरेस्टर मनोज कुमारले जंगली जनावरहरु सिधै नेपालतर्फ जानबाट रोक्न तथा सीमावर्ती क्षेत्रमा हुने आपराधिक कृयाकलाप नियन्त्रणका लागि नाली तथा तारजाली निर्माण कार्य अघि बढाइएको बताए।
उनले अन्तर्राष्ट्रिय जैविक मार्गमा कुनै पनि किसिमको अवरोध नपुर्याइने बताए। दुधवा राष्ट्रिय निकुञ्ज तथा नेपालको लालझाडी वन र शुक्लाफाँटा वन्यजन्तु आरक्ष जोडिएकाले एकअर्का ठाउँका वन्यजन्तु ओहोरदोहोर गर्दै आएका छन्।
वन संरक्षणकर्मी राजबहादुर ऐरले अन्तर्राष्ट्रिय जैविक मार्ग भएकाले तारजाली निर्माण गर्न नहुने बताए।
भारतले पुनः नाली निर्माण कार्य अघि बढाएपछि त्यसक्षेत्रका स्थानीयहरूले विरोध जनाएका छन्। उनीहरुले भारतले सीमा मिच्ने उद्देश्यले सो कार्य अघि बढाएको आरोप लगाएका छन्।
४ वर्षअघि पनि भारतीय पक्षले यसरी नै नेपाली भूमिका नाली खनेको थियो। स्थानीयको विरोधपछि पुरिएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791537260-1791790325.jpeg)
-1786602170.png)
