काठमाडौं– नेपाली कांग्रेसले भ्रातृ संगठन नेपाल विद्यार्थी संघलाई निष्क्रिय बनाएको छ।
माघ १० गते बसेको केन्द्रीय कार्यसमितिको बैठकमा नेविसंघको कार्यकाल बढाउने वा तदर्थ समिति गठन गर्ने निर्णय हुने बताइएको थियो। उक्त बैठकमा संघको विषयले प्रवेश नै पाएन। गत सोमबार बसेको बैठकको छलफलका एजेण्डामा नेविसंघ भए पनि कुनै निर्णय हुन सकेन।
माघ १० र १४ मा बसेको केन्द्रीय कार्य समितिको बैठक सरकारको विरोधमा केन्द्रित भएको थियो।
माघ २ मा कार्यकाल सकिएको वर्तमान कार्यसमितिको लागि माघ १० मा निर्णय हुने पार्टी सभापति शेर बहादुर देउवाले विद्यार्थी नेताहरूलाई जानकारी गराएका थिए।
पुसको अन्तिम साता देउवालाई भेटेका विद्यार्थी नेताहरुलाई उनले केन्द्रीय कार्यसमितिको माघ १० सम्म गतिविधी नरोक्न निर्देशन दिएका थिए।
पुसको अन्तिम साता तोकिएको १२औं महाधिवेशनका लागि १६ जिल्लामा मात्रै अधिवेशन भएको थियो। पछिल्लो पटक बढाइएको दुई महिनामा महाधिवेशनको कार्यतालिका कार्यान्वयन हुन सकेको थिएन।
दुई महिना बढाइएको कार्यअवधिमा महाधिवेशन हुन नसकेपछि पार्टीले तदर्थ समिति गठन गर्ने तयारी गरेको छ। पार्टी सभापति देउवा समूहका नेताहरू र वरिष्ठ नेता रामचन्द्र पौडेल पक्ष तदर्थ समितिको पक्षमा देखिएपछि नेविसंघ तदर्थ समिति मार्फत सञ्चालन हुने देखिएको छ। तदर्थ समितिले १२औं महाधिवेशनको कार्यादेश प्राप्त गर्नेछ।
माउ पार्टीका अधिकांश नेताहरु र स्वयं संघका सदस्यहरू पनि वर्तमान समिति विघटनको पक्षमा रहेकाले तदर्थ समिति बन्ने सम्भवना बढेको हो। संघको विधानमा १२औं महाधिवेशनदेखि उमेर हद ३२ वर्ष कायम हुने व्यवस्था छ।
पार्टीले तदर्थ समिति भने ३२ वर्ष उमेर हदबन्दी कायम नगरी बनाउने संकेत गरेको छ। संघले पारित गरेको विधान विपरित ३२ वर्ष उमेर पार गरेकालाई संघको नेतृत्व चयन गरेमा संघ र पार्टीभित्रै विवाद हु्ने भएको छ।
पार्टीको तेश्रो धारका रुपमा रहेको कृष्ण प्रसाद सिटौला समूहले वर्तमान कार्य समितिलाई नै केही अवधि थपेर १२औं महाधिवेशन गर्ने वातावरण बनाइदिनुपर्ने पक्षमा छ।
संघका महामन्त्री कुन्दनराज काफ्ले तदर्थ समितिमा ३२ वर्षे उमेरहद लागू भए मात्रै स्विकार्ने पक्षमा छन्। पार्टी नेतृत्वले आफू नजिक रहेका विद्यार्थी नेताहरूलाई जिम्मेवारी ल्याउनकै लागि तदर्थ समितिको प्रपञ्च गरेको उनले आरोप लगाए। उनले भने, ‘३२ वर्षे उमेर हदबन्दी कायम नगरी तदर्थ समिति गठन गरिए समानान्तर कार्यसमिति गठन हुन्छ।’
संघको नेतृत्वमा आफूलाई रोक्न नै पार्टीमा तयारी भएको उनले बताए। महाधिवेशन गर्नका लागि पार्टीले सहज वातावरण नबनाएका कारण तोकिएको समयमा १२औं महाधिवेशन हुन नसकेको उनले स्पष्टिकरण दिए।
महाधिवेशन हुने वातावरण नबनाउनु र तदर्थ समितिमा बनाउने तयारीले संगठनमा उनलाई रोक्ने प्रयास भएको भएको काफ्लेको बुझाइ छ। उनले भने, ‘मलाई रोक्नकै लागि तदर्थ समिति गठन गर्ने तयारी भएको छ। ३२ वर्ष उमेर पार गरेकालाई संगठनको नेतृत्व दिए देशभर समनान्तर कार्य समिति गठन हुन्छ।’
१२औं महाधिवेशन हुन नसकेपछि संघका अध्यक्ष नैनसिंह महर पक्षका सात पदाधिकारीले पार्टी सभापति शेर बहादुर देउवालाई राजीनामा बुझाएका छन्।
त्यस्तै वरिष्ठ नेता रामचन्द्र पौडेल पक्षका ४५ केन्द्रीय सदस्यले पौडेललाई राजीनामा बुझाएका छन्। संघबाट राजीनामा दिएका पुष्प शाहीले वर्तमान कार्य समितिले १२औं महाधिवेशन गर्नै नसक्ने ठोकुवा गरे।
पौडेल नजिक रहेका विद्यार्थी नेता मनोजमणी आचार्यले वर्तमान कार्यसमिति असफल भएको बताए। असफल कार्यसमितिलाई समयावधि बढाउन नहुने उनको तर्क छ। उनले भने, ‘पार्टीले गरेको निर्णय स्विकार्य हुन्छ।’
बुधबार गरिएको पत्रकार सम्मेलनमा प्रवक्ता विश्व प्रकाश शर्माले माघ २३ को बैठकले सघको बारेमा आवश्यक निर्णय गर्ने बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1771592819.png)
