जनकपुरधाम- प्रदेश २ का प्रदेश प्रमुख रत्नेश्वरलाल कायस्थ र महालेखापरीक्षक टंकमणि शर्माबीच भेटवार्ता भएको छ।
बिहीबार बिहान भएको सो भेटवार्ताका क्रममा लेखापरीक्षणको कामलाई कसरी प्रभावकारी रुपमा सम्पन्न गर्न सकिन्छ भन्ने विषयमा छलफल भएको प्रदेश प्रमुखका प्रेस सल्लाहकार ब्रम्हानन्द ठाकुरले बताए।
भेटवार्ताका क्रममा संवैधानिक निकायबाट भएको अनुगमन अत्यन्तै सराहनीय रहेको प्रदेश प्रमुखको भनाइ थियो। सो भेटमा महालेखापरीक्षक शर्माले आफू संघ, प्रदेश र स्थानीय तहसँग आवश्यक छलफलका लागि ७ वटै प्रदेशको भ्रमणमा निस्केको बताए।
महालेखापरीक्षक शर्माले अहिले प्रदेश १ र २ मा ३ वटा टोलीद्धारा अनुगमनको कार्य भईरहेको र यस वर्ष ६ हजार कार्यालयको लेखापरीक्षण गर्नुपर्ने जानकारी दिए। एउटा जिल्लामा लेखापरीक्षण गर्न सामान्यतया ४५ दिन लाग्ने उनको भनाइ थियो।
उनले देश ३ तहमा गइसक्दा पनि नेपालमा एउटा मात्र महालेखापरीक्षक हुने व्यवस्था रहेको सुनाउँदै कार्य गर्न कठिनाई भएको भन्दै अब सबै प्रदेशमै महालेखापरीक्षकको कार्यालयहरु सञ्चालनमा ल्याइने प्रष्ट पारे।
शर्माले प्रदेश भित्रका लेखाको प्रतिवेदन बनाई माननीय प्रदेश प्रमुखलाई बुझाउने, त्यसपछि मुख्यमन्त्री हुँदै प्रदेशसभामा प्रस्तुत गरिने योजना ल्याउन लागिएकाे जानकारी दिए। भेटका क्रममा उनले स्थानीय तहमा बढी समस्या देखिएको बताए।
महालेखापरीक्षक शर्माले प्रदेशका सभामुखसँग पनि भेटघाट गर्ने कार्यक्रम छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
