काठमाडौं – नेपाल उद्योग वाणिज्य महासंघले कृषि उद्यम केन्द्रको नाममा भएको करोडौँ रुपैयाँको अनियमितता लुकाउन कै लागि हतार–हतारमा छानबिन समिति गठन गरेको छ। अनियमितताको विषयमा विवाद चुलिँदै गएपछि महासंघकी अध्यक्ष भवानी राणाले कोषाध्यक्ष ज्ञानेन्द्रलाल प्रधानलाई हिजो मात्र राजीनामा दिन लगाएकी थिइन्। यद्यपी प्रधानको राजीनामा स्विकृत हुने औपचारिक प्रक्रिया पूरा भइसकेको छैन।
अध्यक्ष राणाले आफ्नो अगुवाइमा पदाधिकारीले गर्दै आएको भ्रष्टाचारबाट उम्कन महासंघकै वरिष्ठ सदस्य शकुन्तलाल हिराचनको संयोजकत्वमा समिति गठन गरेकी हुन्। ‘महासंघले गठन गरेको छानबिन सदस्यको कुनै औचित्य छैन’, महासंघका एक पदाधिकारीले नेपाल लाइभसँग भने, ‘भष्टाचार लुकाउने प्रयत्नस्वरुप यो समिति गठन भएको छ। तर, पनि यो कदम राणाका लागि सहज छैन।’
गठन भएको समितिले के आधारमा आफ्नै संस्थाभित्र भएको अनियमितताको छानबिन गर्ने गर्छ त्यो नै शंकाको विषय भएको जानकारहरुको दाबी छ। ‘आफैं धामी, आफैं बोक्सी भनेको यही हो’, महासंघ एक सदस्यले हाँस्दै भने, ‘केन्द्रको बजेटमाथि हालिमुहाली गर्नेमध्येबाटै छानबिन समिति बनाइएको छ। त्यसले कस्तो निष्कर्ष निकाल्ला?’
छानबिन समिति महासंघभन्दा बाहिरका विज्ञलाई राखिएको भए त्यो समितिको विश्वसनियता हुने उनको भनाइ छ। यद्यपि, केन्द्रमा भएको आर्थिक अनियमितताबारे अख्तियार दुरुपयोग अनुसन्धान आयोगले पनि छानबिन सुरु गरिसकेको छ। महासंघले आइतबारमात्रै केन्द्रको रकममा आर्थिक हिनामिना भएको भन्दै बाहिर आएको सूचनालाई लिएर पदाधिकारी बैठक राखेको थियो। बैठकमा राणाले केन्द्रको सूचना पत्रकारलाई दिएको र अख्तियारमा उजुरी गरेको भन्दै कोषाध्यक्षलाई राजीनामा दिन बाध्य पारेकी थिइन्।
‘अध्यक्ष राणाले अनियमितता लुकाउनैका लागि यस्तो खेल खेलिन् जुन खेल उनलाई नै महंगो पर्ने देखिन्छ’, महासंघभित्र अनियमितताको विपक्षमा रहेका एक सदस्यले नेपाल लाइभसँग भने, ‘कोषाध्यक्षको राजीनामा लिएर भ्रष्टाचार लुक्छ र?’
कृषि उद्यम केन्द्रको घोटाला सम्बन्धमा नेपाल लाइभले शृंखलाबद्ध रुपमा प्रकाशन गरेका विशेष सामग्री:
पहिलाे शृंखला : उद्योग वाणिज्य महासंघको कृषि उद्यम केन्द्रमा वार्षिक करोडौं हिनामिना, अध्यक्ष राणा पनि मुछिइन्
दाेस्राे शृंखला : कृषि उद्यम केन्द्रमा घोटाला : खर्च देखाउन नक्कली बिल बनाउँदै महासंघ पदाधिकारी
तेस्राे शृंखला : कृषि उद्यम केन्द्रको घोटालामा अख्तियारले थाल्याे छानबिन
चौथो शृंखला : घोटाला लुकाउन कोषाध्यक्षलाई जबरजस्ती राजीनामा गराइन् अध्यक्ष भवानी राणाले
पाँचौं शृंखला : कृषि उद्यम केन्द्रको घोटाला छानविन गर्न समिति गठन
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
