जनकपुर– वीरगञ्जमा प्रहरीविरुद्ध व्यापारीले गरेको प्रदर्शनका क्रममा ७ जना पक्राउ परेका छन्। प्रहरीको लाठी चार्जबाट तीन जना पत्रकार समेत घाइते भएका छन्।
भारत तस्करी गर्न लागिएको भन्दै प्रहरीले केराउ सहितको ट्रक पक्राउ गरेपछि ट्रक छुटाउन भन्दै वीरगन्ज पोखरिया सडक खण्डको बिन्दवासिनीमा बिहीबार व्यापारीहरुले प्रदर्शन गरेका हुन्।
पर्सा प्रहरीले बिलविजक भएको केराउसहित ट्रक पक्राउ गरेको भन्दै बिन्दवासिनी गाउँपालिकाका व्यापारीले प्रदर्शन गरेका हुन्। वीरगञ्ज–पोखरिया सडकखण्ड अन्तर्गत तिलावे पुलमा व्यापारीले टायर बाली सडकमा अवरोधसहित प्रदर्शन गरिरहेका बेला प्रहरीले हस्तक्षेप गरी लाठीचार्ज गरेको थियो।
प्रहरीले व्यापारी रञ्जन तिवारी, निरञ्जन तिवारी, शंकरपुकार तिवारी, सोनालाल साह, रवि गुप्ता, दामोदर तिवारी, सन्तोष गुप्ता र नवलकिशोर साहलाई पक्राउ गरेको छ। उनीहरुलाई जिल्ला प्रहरी कार्यालय पर्साको हिरासतमा राखेर आवश्यक अनुसन्धान भइरहेकोे प्रहरी नायव उपरीक्षक अनन्तराम शर्माले बताए।
त्यसैगरी प्रदर्शनको समाचार संकलन गरिरहेका पत्रकार श्याम कुशवाहा, आरवन साह र दीपक चौरसियामाथि पनि प्रहरीले लाठी प्रहार गरेको छ।
प्रहरीले गरेको लाठी प्रहारले पत्रकार कुशवाहाको मुखमा चोट लागेको छ। भिडियो किन खिचेको भन्दै प्रहरीले लाठी चार्ज गरेपछि आफूहरु घाइते भएको पत्रकार कुशवाहाले बताए। प्रहरीले आरवन साहको क्यामरामा पनि क्षति पुर्याएको छ।
बिहान ११ बजेदेखि तिलावे पुलमा व्यापारीहरुले टायर बाली प्रदर्शन गरी सडक अवरोध गरेका कारण ३ घन्टा वीरगञ्ज–पोखरिया सडकखण्ड अवरुद्ध भएको थियो ।
वीरगञ्जको रामगढवास्थित सरिना इन्टरप्राइजेजबाट पर्साको विन्दवासिनी गाउँपालिका– ४ को सन्दीप सप्लायर्सले खरिद गरेको २५ टन केराउ ना४ख १२२ नम्बरको ट्रकमा विन्दवासिनी लैजाँदै गरेको अवस्थामा बुधबार बेलुका साढे आठ बजे वडा प्रहरी कार्यालय श्रीपुरले तिलावे पुलबाट नियन्त्रणमा लिएको थियो।
प्रहरीले ट्रक तिलावे पुल हुँदै अमरपट्टी नाकाबाट भारततिर केराउ तस्करी गर्न लागेकाले ट्रक नियन्त्रणमा लिएको जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
