काठमाडौं– संयुक्त अरब इमिरेट्स (युएई) सँगको एकदिवसीय र टी–२० शृङ्खलाका लागि नेपाली राष्ट्रिय क्रिकेट टोली आज त्यसतर्फ प्रस्थान गरेको छ। एकदिवसीय मान्यता पाएपछि नेपालको यो दोस्रो एकदिवसीय अन्तर्राष्ट्रिय सिरिज हुनेछ।
नेपालले माघ ११, १२ र १४ गते एकदिवसीय र माघ १७, १८ र २० मा टी–२० खेल्नेछ।
युएई उड्नुअघि नेपालका कप्तान पारस खड्काले युएईविरुद्धको सिरिज जित्न अवसर रहेको बताएका छन्। उनीसँग नेपालको तयारी र लक्ष्य बारे गरिएको कुराकानी:
दोस्रो पटक एकदिवसीय र टी–२० सिरिज खेल्दै छौं, तयारी कस्तो छ?
तयारी राम्रो भएको छ। १६ सदस्यीय टिम युएई जाँदै छौं। ३ खेलको एकदिवसीय सिरिज भएको कारणले हामी वरीयतामा पनि आउनेछौं। भविष्यमा हरेक एकदिवसीय खेलको अंक जोडिने भएका कारणले हामीलाई ठूलो अवसर छ।
अर्कोतर्फ हाम्रा लागि खासै अन्तर्राष्ट्रिय खेल छैनन्। दोस्रोपटक सिरिज खेल्न जाँदै छौं। राम्रो खेल्ने आशा छ।
प्रत्येक खेल महत्वपूर्ण छ। अब नेपालले ४ वर्षसम्म यस्तै सिरिज खेल्ने हो। टिमलाई माथिल्लो स्तरमा पुर्याउनका लागि प्रत्येक खेलको महत्व हुन्छ।
हाम्रो नतिजा विश्वका सबै देशले हेर्छन्। त्यसैले हामीले आगामी २ वा ३ वर्षमा टेस्ट राष्ट्रसँग खेल खेल्नका लगि अहिलेदेखि नै राम्रो प्रदर्शन गर्नुपर्छ। जसले गर्दा बलिया राष्ट्रसँग पनि खेल्ने अवसर सिर्जना हुन्छ।
शरद भेषावकर नहुँदा टिममा कस्तो असर पर्छ?
एक अनुवभी खेलाडी टिममा छैनन्। तर पनि टिममा अरु राम्रा खेलाडी छन्। व्यक्ति टिममा आउने र जाने भइरहन्छ।
टिममा पर्नका लागि प्रतिस्पर्धा बढिरहनु महत्वपूर्ण कुरा हो। नयाँ खेलाडी पनि टिममा आएका छन्। हाम्रो टिममा युवा खेलाडीको बाहुल्य छ। युवा खेलाडी सिक्ने प्रक्रियामा छन्। केही वर्षमा यी खेलाडी उत्कृष्ट हुने आशा छ।
घरेलु क्रिकेटमा राम्रो खेलेकाले युवा खेलाडीले टिममा स्थान पाएका छन्। टिममा पर्न स्वस्थ प्रतिस्पर्धा हुँदा टिमलाई नै फाइदा पुग्छ। हामीले अवसर दिएका खेलाडीले प्रमाणित गर्छन् भन्ने आशा छ।
नेपालको टिम कम्बिनेसन कस्तो छ?
एकदिवसीय र टी–२० गरी दुई सिरिज भएकाले फरक–फरक कम्बिनेसन हुनेछ। पहिलो रोजाइमा अवसर पाउने नयाँ र पुरानो सबैले आफ्नो जिम्मेवारी पूरा गर्नुपर्छ।
तपाईं ओपनिङ गर्नुस् वा मिडल अर्डर वा १० नम्बरमा खेल्नुस्, टिमलाई चाहिएको बेलमा रन बनाउनु महत्वपूर्ण कुरा हो। यदि मलाई ओपनिङको जिम्मेवारी दिए तयार छु।
कुनै खेलाडीलाई अर्को खेलाडीसँग तुलना गर्न मिल्दैन। खेलाडीले टिमका लागि कति योगदान दिन सक्छ भन्ने महत्वपूर्ण हुन्छ।
ओपनिङमा फेरि परिवर्तन हुने देखिएको छ। ओपनिङको विषयमा तपाईंको धारणा के हो?
ओपनिङको विषयमा धेरै प्रश्न खडा भएका छन्। ओपनिङ गर्न सजिलो कुरा होइन। हामीले अघिल्ला प्रतियोगितामा ओपनिङमा जोडीलाई धेरै परिक्षण गर्यौं। त्यतिबेला हामीलाई नजिता दिनैपर्ने दबाब हुन्थ्यो।
अब जसले ओपनिङ गरे पनि आफ्नो जिम्मेवारी पूरा गर्छन् भन्ने लाग्छ।
ओपनर रन हानोस् वा नहानोस्, तर टिमले जित्नु पर्छ। यो स्तरमा ब्याटिङ, बलिङ र फिल्डिङ गरी तीनै क्षेत्रमा राम्रो खेल्नुपर्छ। अहिले ब्याटिङ मात्र राम्रो गरेर वा बलिङ मात्र राम्रो गरेर मात्र प्रतिस्पर्धा गर्न सकिँदैन।
ओपनिङ र ब्याटिङमा जहिले पनि प्रश्न उठ्ने गरेका छन्। हामीले सुधार गर्नैपर्छ। क्षमताअनुसार राम्रो ब्याटिङ गर्नेछौं। हामीलाई पनि ब्याटिङमा एकैप्रकारको खेल देखाउन मन छ। अहिलेदेखि नै हामी तयारी गरिरहेका छौं।
तपाईं नै ओपनिङमा आउने सम्भावना कति छ?
सायद आउन पनि सक्छु। कस्तो परिस्थिति आउछ हेर्दैछौं। यदि मलाई ओपनिङको जिम्मेवारी दिइन्छ भने म चुनौती लिन तयार छु।
हामीले ब्याटिङमा सुधार अवश्य गर्नुपर्छ। त्यसका लागि समय लाग्छ। रातारात राम्रो हुन सक्दैन। धेरै मेहनतको जरुरी छ।
अहिलेसम्म मिडल अर्डलमा खेलिरहेको छु। पछिल्लो चार वर्षदेखि नम्बर ३ मा ब्याटिङ गरिरहेको छु। ३ बाट १ मा गएर भूमिका निर्वाह गर्न पनि तयार छु।
महत्वपूर्ण कुरा रन बनाउनु हो। तपाईं ओपनिङ गर्नुस् वा मिडल अर्डर वा १० नम्बरमा खेल्नुस्, टिमलाई चाहिएको बेलमा रन बनाउनु महत्वपूर्ण कुरा हो। यदि मलाई ओपनिङको जिम्मेवारी दिए तयार छु।
यसपटक पनि नेपालको बलियो पक्ष बलिङ नै हो?
अब हामीले ब्याटिङ कमजोर र बलिङ बलियो भनेर बस्न मिल्दैन। हामीले टिमलाई कसरी राम्रो बनाउनेतर्फ लाग्नुपर्छ।
हामीले ब्याटिङमा सुधार अवश्य गर्नुपर्छ। त्यसका लागि समय लाग्छ। रातारात राम्रो हुन सक्दैन। धेरै मेहनतको जरुरी छ।
यदि ब्याट्सम्यानले रन हान्दैन भने बलर र फिल्डरले कभर गर्नैपर्छ। बलिङ र फिल्डिङमा राम्रो हुन नसकेको दिन ब्याट्सम्यानले राम्रो खेल्नुपर्छ। हामी यहि मानसिकता लिएर अगाडि बढ्नुपर्छ। अब नेपालको ब्याटिङ कमजोर छ भन्ने बहस बन्द गर्नु पर्छ। हामीले तीनै क्षेत्रमा राम्रो गर्यौ भने मात्र अघि बढ्न सक्छौं।
युएईका तत्कालीन कप्तान रोहान मुस्ताफासहित ३ खेलाडी कारबाहीमा छन्। त्यसले नेपाललाई सजिलो हुन्छ कि?
युएई राम्रो टिम हो। किनभने युएई राष्ट्रिय टिममा नयाँ भएपनि नियमित क्रिकेट खेलिरहेका खेलाडी हुन्छन्। क्रिकेटका लागि उनीहरु नयाँ हुँदैनन्। किनकी त्यहाँको खेल वातावारण राम्रो हुन्छ।
पछिल्ला वर्षको नेपाल र युएईबीचको हेड टु हेड नजिता हेर्ने हो भने पनि राम्रो प्रतिस्पर्धा भइरहेको देखिन्छ। त्यसैले हामीलाई पहिलो एकदिवसीय सिरिज जित्ने अवसर छ। त्यसैले क्षमता प्रयोग गरेर राम्रो खेल्नुपर्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1775575666.png)
-1764146706.png)
