काठमाडौं– थाइल्यान्ड वुमन्स टी–२० स्म्यासमा सहभागी भएर नेपाली टिम आइतबार स्वदेश फर्किएको छ।
शनिबार भएको फाइनलमा थाइल्यान्डसँग ७० रनले पराजित हुँद नेपाल उपविजेतामा सीमित भएको थियो।
नेपालले प्रतियोगितालाई आगामी महिना थाइल्यान्डमै हुने आइसिसी महिला विश्वकप क्रिकेट एशिया छनोट प्रतियोगिताको तयारीको रुपमा लिएको छ।
छनोट खेल आगामी फागुन ६ देखि १५ गतेसम्म हुनेछ। छनोट प्रतियोगितामा नेपालसहित थाइल्याण्ड, युनाइटेड अरब ईमिरेटस् (युएई), मलेसिया, कुवेत, चीन र हङकङले प्रतिष्पर्धा गर्नेछन्। राउण्ड रोबिनको आधारमा हुने सो छनोटको विजेताले आइसिसी महिला टी–२० विश्वकप छनोट र आइसिसी महिला विश्वकप २०२० मा स्थान बनाउने छन्।
स्वदेश फर्किएपछि नेपालका प्रशिक्षक विनोद दासले नतिजा भन्दा पनि नेपालका लागि गल्ति पत्ता लगाउन थाइल्यान्ड वुमन्स टी–२० स्म्यास प्रतियोगिता राम्रो भएको बताए।
'हाम्रो टिममा प्रतिभाको कमि थिएन। फिटनेटमा पनि नेपाली राम्रो टिम ठहरियो। तर हामीमा म्याच एक्सपोजर र लिगको कमी देखियो,' दासले भने, 'विश्वकप छनोटका लागि हामी १५ दिनमा वर्कआउट गरेर सुधार गर्नेछौं।'
दासले थाइल्यान्डविरुद्धको फाइनल दबाबमा खेल्दा हारेको बताए। 'हामी प्रेसर थियौं। किनभने हामी उनीहरुसँगका पछिल्ला खेला हारिरहेको थियौं। त्यसैले नर्भस थियौं। आगामी म्याचमा हामीले यो गल्ति सुधार गर्नुपर्नेछ,' उनले भने, 'प्रतियोगिता हाम्रा लागि पाठ जस्तै भयो। हामीले सिक्नु पर्ने धेरै कुरा छन्।'
नेपाली टिमकी कप्तान रुबिना क्षेत्री पनि सन्तुष्ट देखिइन्।
'सबैले शतप्रतिशत दिए। समग्रमा प्रतियोगिता सन्तोषजनक रह्यो,' उनले भनिन्, 'अघिल्ला खेलमा हामीले सजिलो मान्यौं। थाइल्यान्ड भन्ने बित्तिकै केहि खेलाडीले दबाबमा खेले। यो परिस्थितिलाई हामी वर्कआउट गर्छौ र सुधार गर्ने कोसिस गर्छौ।'
उनले लगानीअनुसार नेपालको खेल राम्रो भएको पनि प्रतिक्रिया दिइन।
'महिला क्रिकेटलाई जुन प्राथमिकता राख्नु पर्ने त्यो छैन। १२ वर्षदेखि खेलिरहेका छौं। हामीलाई तलब सुविधा छैन। क्यान छैन। खेलकुद परिषद् र खेलकुद मन्त्रालय केहि गरेको छैन,' उनले भने, 'केहि नपाउदा पनि राम्रो गर्ने कोशिस गरिरहेका छौं। केहि सुविधा नहुँदा पनि हाम्रो प्रदर्शन यस्तो छ भने व्यवसायिक बनाउनु भयो भने अझ राम्रो नतिजा आउन सक्छ। यसमा सम्बन्धित निकायले ध्यान दिनुहुन्छ कि आसा गर्छु।'
विगत २ वर्षदेखि खेलाडीले आफूले आफैलाई तयारी अवस्थामा राख्दा थाइल्यान्डमा खेल्न सकेको पनि उनको भनाइ छ।
'खेलाडीले आफै तयारी गर्नु पर्ने स्थिति छ। अधिकांस खेलाडी आफ्नै प्रयासले बंगलादेश र भारत भ्रमण गरेका थिए। त्यसैले हामीले १५ दिनको प्रशिक्षणमै यस्तो राम्रो प्रदर्शन गर्न सक्यौं, ' रुबिनाको भनाइ थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1768395492.png)
