पर्सा : वीरगञ्जमा आयोजित दोस्रो टुबोर्ग विशाल मेमोरियल गोल्डकप फुटबलको उपाधि त्रिभुवन आर्मी क्लबले जितेको छ।
नारायणी रङ्गशालामा शनिबार भएको फाइनल खेलमा हिमालयन शेर्पा क्लबलाई सडन डेथमा २–१ ले पराजित गर्दै आर्मीले उपाधि जितेको हो। निर्धारित ९० मिनेटको खेलमा दुवै टोलीले १–१ गोल गरेपछि खेल ट्राइबेकरमा धकेलिएको थियो। ट्राइबेकरमा पनि दुवै टिमबाट ४–४ गोलको बराबरी भएपछि खेलको अन्तिम निर्णय सडन डेथबाट गरिएको थियो।
सडन डेथमा हिमालयन शेर्पाका आशीष गुरुङले प्रहार गरेको बल आर्मीका गोलरक्षक विकेश कुथुले उत्कृष्ट बचाउ गरेपछि आर्मीले सडन डेथमा २–१ ले उपाधि विजेता बन्न सफल भएको हो। प्रथम विशाल गोल्ड कपको उपाधिसमेत आर्मीले नै जितेको थियो।
उपाधि विजेता आर्मीले नगद रु पाँच लाख ५५ हजार ५५५ र ट्रफी हात पारेको छ। उपविजेता हिमालयन शेर्पाले रु दुई लाख ७७ हजार ७७७ प्राप्त गरेको छ। प्रतियोगिताको सर्वोत्कृष्ट खेलाडी हिमालयन शेर्पाका स्ट्राइकर विश्वास श्रेष्ठ घोषित भए। प्रतियोगितामा चार गोल गर्न सफल उनलाई १५५ सिसीको जिक्सर मोटरसाइकल प्रदान गरिएको छ।
प्रतियोगिताको समापन समारोहमा पर्सा क्षेत्र नं १ का सांसद प्रदीप यादवले विजेता र उपविजेता टिमका खेलाडीलाई ट्रफी र मेडल प्रदान गरेका थिए। गत पुस २८ गतेदेखि आयोजित प्रतियोगितामा नेपाल र भारतका गरी आठ टिमको सहभागिता थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
