काठमाडौं– प्रमुख प्रतिपक्षी दल नेपाली कांग्रेसका सांसद डा मीनेन्द्र रिजालले मुलुकको आर्थिक अवस्थाका बारेमा सरकारले गलत तथ्यांक प्रस्तुत गरेर जनतालाई गुमराहमा राख्ने काम गरेको आरोप लगाएका छन्।
प्रतिनिधिसभाको आइतबारको बैठकको विशेष समयमा बोल्दै सांसद रिजालले केही दिन अगाडि प्रधानमन्त्रीबाट संसदमा सम्बोधनका क्रममा प्रस्तुत भएका जानकारी सबै गलत भएको दाबी गरेका हुन्। मुलुकको आर्थिक अवस्थाको बारेमा प्रधानमन्त्री केपी शर्मा ओलीद्धारा संसदमा सम्बोधनका क्रममा दिइएका तथ्यांक पुरै गलत भएको भन्दै उनले प्रधानमन्त्रीलाई अर्थ मन्त्रालयद्धारा गलत जानकारी दिइएको बताए।
प्रधानमन्त्रीले भने जस्तो मुलुकमा शान्ति सुरक्षा कायम नभएको, आर्थिक विकासका सूचकांकमा सकारात्मक परिर्वतन नदेखिएको भन्दै उनले यथार्थलाई स्वीकार गर्न प्रधानमन्त्रीलाई आग्रह गरे।
उनले भने, ‘काठमाडौं खाल्डोबाट देखिएन होला, त्यसैले झापामा भ्यु–टावर बनाउने भन्नुभएको छ। माफ गर्नुहोस् प्रधानामन्त्रीज्यू, खाँबो बांगो छ, तपाईंले देखेजस्तो देशको स्थिति छैन। झापाको भ्यु–टावरमा चढेपनि निर्मला बलात्कार र हत्याको टाटो परैबाट देखिन्छ। क्षमा गर्नुहोस् प्रधानमन्त्रीज्यू।’
उनले प्रधानमन्त्रीले राष्ट्रपतिको लागि सेवा र सुविधा बढाएर नया दरबार सिर्जना गर्न खोजेको आरोप पनि लगाए। नेता रिजालले भने, ‘सरकारको निर्णयबाट १८ करोडको गाडीमा डेढ अर्बको हेलिकोप्टरमा चढाउने र भोगविलासको जीवनमा पुरानो दरबार होइन नयाँ दरबार झन् बढी भोग र विलासको बिम्ब बनाएर लैजाने सरकारको निर्णयबाट संस्था बलियो हुँदैन। गणतन्त्र बलियो हुँदैन। जनताको आर्थिक अवस्था जस्तो छ, त्यही सुहाउँदो राष्ट्रपतिलाई सेवा गर्न चाहन्छ। नेपाली जनता नयाँ दरबार बनाउन चाहँदैन।’
उनले प्रधानमन्त्रीले भने भन्दा विपरित संवैधानिक संस्थालाई मातहतको विभागजस्तो बनाउने काम सरकारबाट भइरहेको आरोप लगाए।
‘बुद्धिजीवीलाई लखेटेर, थला पारेर, कर्मचारीलाई तर्साएर, पत्रकारको पेसागत स्वतन्त्रतामाथि आक्रमण गरेर, सत्याग्रहीको मानमर्दन गरेर, संवैधानिक अंगलाई निस्तेज बनाएर अनि संसद छलेर लोकतन्त्र बलियो हुँदैन’, रिजालले भने, ‘आयोगहरुलाई क्रियाशील नतुल्याउने अनि संघियता अझ बलियो बनाएको छु, भनेर झुट बोलेर संघीयता बलियो हुदैन संस्था बलियो बनाउनुपर्छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1774336446-1774337130.jpeg)
-1764146706.png)
