काठमाडौं– थाइल्याण्डमा भइरहेको महिला टी–२० स्मास क्रिकेट प्रतियोगिता नेपालले लगातार दोस्रो खेलमा जित हात पारेको छ।
आइतबार भएको खेलमा नेपालले मलेसियालाई ६ विकेटले पराजित गरेको हो। मलेसियाले दिएको ६२ रनको लक्ष्य नेपालले १६.२ ओभरमा ४ विकेटको क्षतिमा पार गर्यो।
नेपालका लागि रोमा थापाले नटआउट २० रनको योगदान गरिन्। उनले २४ बलमा १ चौका हिर्काइन्। ममताकुमारी चौधरी ९ रनमा अविजित रहे। उनले १५ बल खेलिन्। त्यसअघि सरिता मगर रन नै जोड्न नपाइ रनआउट भइन्। कजल श्रेष्ठ ६ रनमा आउट भइन् भने सीता रानामगरले १६ रन बटुलिन्। रनआउट हुनुअघि उनले ३६ बलमा १ चौका प्रहार गरिन्। इन्दु बर्मा ३ रनमा आउट भइन्।
त्यअघि टस जितेर पहिले ब्याटिङ गरेको मलेसिया ३ बल खेल्न बाँकी छदा ६१ रनमा अलआउट भयो। मलेसियाका लागि युश्रीना याकोबले ११ रन र जीन यीले १२ रनको योगदान दिए। अन्य खेलाडीले दोहोरो अंकमा रन बटुल्न सकेनन्।
बलिङमा नेपालकी सरिता मगरले ४ विकेट लिइन्। उनले ३.३ ओभरमा ११ रन खर्चिइन्। कविता कुँवर, इन्दू बर्मा र नेरी थापाले समान १-१ विकेट लिए।
यसअघि नेपालले समूह ‘ए’ को खेलमा नेपालले चीनलाई १० विकेटको फराकिलो अन्तरले पराजित थियो।
नेपाली टोलीमा १४ सदस्यीय खेलाडीसहित मुख्य प्रशिक्षक विनोद दास, म्यानेजर अमृता पौडेल र फिजियो सकुना डानी सहभागी छन्।
रुविना क्षेत्री (वेलवासे)को कप्तानीमा रहेको नेपाली टोलीमा सीता राना मगर (उपकप्तान), करुणा भण्डारी, सरिता मगर, नेरी थापा, इन्दु बर्मा, सोनु खड्का, आरती विडारी, काजल श्रेष्ठ, रोमा थापा, कविता कुँवर, डोली भट्ट, ममताकुमारी चौधरी र विन्दु रावल छन्।
उक्त प्रतियोगितामा विभिन्न १० टोलीको सहभगिता रहेको छ। सहभागी टोलीलाई दुई समूहमा विभाजन गरिएको छ । समूह ‘ए’ मा नेपालसहित चीन, संयुक्त अरब इमिरेट्स (युएई), मलेसिया र थाइल्याण्ड छन् भने समूह ‘बी’ मा हङ्कङ, थाइल्याण्ड, इण्डोनेसिया, भूटान र म्यानमार छन्।
नेपालले आफ्नो तेस्रो खेल ३० गते संयुक्त अरब इमिरेट्स (युएई)सँग खेल्ने छ भने अन्तिम खेल माघ २ गते थाइल्याण्डसँग प्रतिस्पर्धा गर्नेछ। समूहका शीर्ष दुई टोलीले सेमिफाइनलमा स्थान बनाउनेछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
