राजविराज– प्रहरी कदमको विरोधमा बुधबार बिहानै सप्तरीको खडक नगरपालिकामा पूर्वपश्चिम राजमार्ग अवरुद्ध गरिएको छ। बिनाकारण प्रहरीले स्थानीयवासीलाई कुटपिट गरेको भन्दै कल्याणपुर चोकमा सडक अवरुद्ध गरिएको हो।
सवारी जाँचका नाममा प्रहरीले सर्वसाधारणलाई कुटपिट गरेको र घरमा राखेका सवारीसाधन पनि नियन्त्रणमा लिएपछि विरोध गरिएको स्थानीले बताएका छन्। स्थानीयको अवरोधका कारण बिहान ८ बजेदेखि करीब १ घन्टा राजमार्ग अवरुद्ध भएको थियो। ९ बजेपछि सडक सूचारु भएको प्रहरीले जनाएको छ।
मंगलबार राजमार्गमा सवारी जाँचका क्रममा बोदेवरसाइन नगरपालिका, पर्साही टोलका युवालाई प्रहरीले हातपात गरेको स्थानीयले बताए। चेकजाँचपछि छोडिएको चौधरीको स६प ९४७३ नम्बरको मोटरसाइकल घरबाटै नियन्त्रणमा लिएर प्रहरीले एकमाथि अर्को ज्यादती गरेको पीडित परिवारको आरोप छ।
इलाका प्रहरी कार्यालय, कल्याणपुरले ट्राफिकको चेक प्वाइन्टलाई छलेर भागेपछि चौधरीको मोटरसाइकल नियन्त्रणमा लिइएको जनाएको छ। मोटरसाइकल उनको घरबाट नियन्त्रणमा लिइएको स्वीकारे पनि कुटपिट भने नगरेको इलाका प्रहरी कार्यालय कल्याणपुरका प्रहरी निरीक्षक विष्णुप्रदीप बस्यालले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
