काठमाडौं– नेपाल कम्युनिष्ट पार्टी (नेकपा)का अध्यक्ष प्रचण्डले अब समृद्धिको बाटो हुँदै समाजवादी क्रान्तिको नयाँ बाटोमा तिर जान लागेको बताएका छन्।
नेत्रविक्रम चन्द ‘विप्लव’ नेतृत्वको समूहबाट नेकपामा प्रवेश गर्ने नेता तथा कार्यकर्ताहरुलाई सोमबार दिउँसो आफ्नो निवास खुमलटारमा आयोजित पार्टी प्रवेश कार्यक्रममा स्वागत गर्दै प्रचण्डले यस्तो बताएका हुन्।
प्रचण्डले भने– ‘हामी नयाँ बाटोमा भए पनि हामीले हाम्रा आदर्श र उद्देश्य छोडेको भने होइन। उद्देश्य प्राप्तिका निम्ति हामीले कहिले उकालो चढ्नुपर्ने हुन्छ भने कहिले ओरालो झर्नुपर्ने हुन्छ। र, त्यसरी मात्र शिखरमा पुगिन्छ। राजनीति र समाज पनि शिखर चढे जस्तै हो।’
अध्यक्ष प्रचण्डले विद्रोह र शान्तिपूर्ण आन्दोलनलाई समायोजन गरेर र क्रान्तिकारी पार्टी र संसदवादी पार्टीहरुबीच समझदारी गराएर गणतन्त्र र समावेशिता सम्भव भएको बताए। प्राप्त उपलब्धी सानो र सजिलो गरी नभई हजारौको बलिदानबाट भएको उनको भनाइ थियो।
उनले भने– 'समाजवादको यात्रा महान् गम्भीर र लामो यात्रा हो। यसका लागि व्यापक एकताको खाँचो पर्छ। हिजो जुन सपना देखेर हामी हिँडेका थियौं ती सबै शक्ति एकपल्ट एकजुट हुन जरुरी छ। तपाईंहरु आउनुभएको छ, एउटा इटा थप्ने काम भएको छ।’
कार्यक्रममा विप्लव नेतृत्वको विद्यार्थी संगठनका केन्द्रीय सचिवालय सदस्य राजन राईको नेतृत्वमा २२ जना नेता तथा कार्यकर्ताहरुलाई प्रचण्डले अबिर र खादा लगाइ पार्टीमा प्रवेश गराएका थिए। पार्टी प्रवेश गर्दै सचिवालय सदस्य राईले अध्यक्ष प्रचण्डको नेतृत्वमा नै समाजवादी क्रान्ति सम्पन्न हुने विश्वास सहित पार्टीमा प्रवेश गरेको बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791358722.jpg)
-1786602170.png)
