वीरगञ्ज– प्रदेश २ ट्राफिक प्रहरी कार्यालय पथलैया बाराले चालू आर्थिक वर्षको २०७५÷२०७६ को साउनदेखि मङ्सिरसम्ममा ६ करोड ७१ लाख ५१ हजार ५ रुपैयाँ राजश्व उठाएको छ। राजश्वबापत असुल भएको रकममध्ये क्षमताभन्दा बढी सामान लोड गर्ने २७ हजार ८ सय ५१ सवारी साधनलाई कारबाही गर्दा मात्रै २ करोड २२ लाख ६८ हजार राजश्व असुल भएको छ।
उक्त शीर्षकमा राजश्व असुली भएको अन्य प्रदेशभन्दा प्रदेश २ अगाडि रहेको सो कार्यालयका प्रहरी उपरीक्षक किरण बज्राचार्यले बताए।
प्रदेश २ मा बढ्दो जनसङ्ख्या, सवारी साधनको चाप तथा सडक सञ्जालको अवस्था चुनौतीपूर्ण रहे पनि प्रदेश २ ट्राफिक प्रहरी कार्यालय पथलैयाले क्षमताभन्दा बढी सामान बोक्ने सवारी साधनलाई कारबाहीको दायरामा ल्याउन, सवारी दुर्घटना न्यूनीकरण गर्न सक्रिय रहेकाले चालू आवको पाँच महिनामा ६५ प्रतिशतले राजश्व वृद्धि गरेको छ।
चालू आवको मङ्सिर समान्तसम्ममा ४ सय ८८ सवारी दुर्घटना भई १ सय २६ पुरुष, ३१ महिला, २२ बालबालिका गरी १ सय ७९ जनाको मुत्यु भएको छ भने २ सय ४६ सख्त घाइते भएका छन्।
चालू आवको असार मसान्तसम्ममा ट्रक, बस, कार, जिप, भ्यान, ट्याक्टर, मोटरसाइकल, टेम्पोबाट जरिवानाबापत ६ करोड ७१ लाख ५१ हजार ५ सय रुपैयाँ असुल भएको बताइएको छ।
यसैगरी अघिल्लो आव २०७४/०७५ को असार मसान्तसम्ममा २ सय ८८ सवारी दुर्घटना भएकोमा ८३ को मुत्यु भएको थियो भने १ सय ७० सख्त घाइते भएका थिए। सो अवधिमा विभिन्न सवारी साधनबाट कारबाहीस्वरुप ४ करोड ७ लाख ३३ हजार राजश्व सङ्कलन भएको थियो।
प्रदेश २ मा जुन प्रकारले सडक सञ्जालको सङ्ख्या बढी रहेको छ त्यसअनुरुप ट्राफिक जनशक्ति नभए पनि दुर्घटना न्यूनीकरण गर्न विभिन्न प्रकारको चेतनामूलक कार्यक्रम गर्दै आएको प्रहरी उपरीक्षक बज्राचार्यको भनाइ छ। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
