डडेल्धुरा– डडेल्धुरा जिल्लाको भित्रमधेशमा पर्ने परशुराम नगरपालिका–५ मा परशुराम धार्मिक, पर्यटन महामहोत्सव–२०७५ आयोजना हुने भएको छ।
पौष ३०देखि माघ ८ गतेसम्म महामहोत्सवको नगरद्धारा आयोजना गर्न लागिएको नगर प्रमुख तथा महामहोत्सवका संयोजक भीम बहादुर साउँदले बताए।
महोत्सवमा महास्नान, गंगा आरती, मकर महास्नान, योग विज्ञान शिविर, नित्य पुजन, संगीतमय श्रीमद्भागवत सप्ताह ज्ञान–महायज्ञ, देउरा दर्शन लगायत दिवा कार्यक्रम र रात्री कार्यक्रम प्रस्तुत हुने आयोजक समितिले जनाएको छ।
परशुराम तीर्थको धार्मिक महत्व
‘सबै तीर्थ पटक–पटक परशुराम एक पटक’ स्कन्द पुराणको मानसखण्डमा उल्लेखित उक्त बचनले नै परशुराम तीर्थको धार्मिक महत्व दर्शाउँछ।
भगवानका दश अवतार मध्ये परशुराम अवतार भएको उक्त धाम डडेलधुराको परशुराम नगरपालीका–५ महाकाली किनारमा अवस्थित छ।
स्कन्द पुराणमा उल्लेख भएअनुसार नजिकै रहेको पूर्णागीरी मन्दिर सतीदेवीको पूर्ण अंग पतनपछि भगवान शिवले यही धाममा लामो कालखण्ड तपस्या गरेका हुन्।
पछि ईश्वरीय अवतारका लागि भूमीमा परशुराम अवतार भएको हो। महाकाली (श्यामा) नदीको किनारामा रहेको चुनढंगा मा बसेर भगवान शिव र विभिन्न ऋषिहरुले तपस्या गरेको पुराणमा उल्लेख छ।
एकातिर चुरे पर्वत श्रृंखला र अर्कोतिर महाभारत पर्वतसँगै भारतको पूर्णागीरी पर्वतको मध्य भागमा रहेको परशुराम धाम डडेलधुरा सदरमुकामदेखि १ सय किलोमिटर र कंचनपुरबाट ३९ किलोमिटरको दुरीमा छ।
धार्मिक पर्यटनका दृष्टीकोणले परशुराम धाम हिन्दूहरुको पवित्र धार्मिक स्थल भएपनि अन्य पर्यटका दृष्टीकोणले पनि त्यो उत्तिकै महत्त्व राख्ने स्थानीय धमेन्द्र नेपाली बताउँछन्।
सरकारको चरम उपेक्षाले यस धामको महत्व ओझेलमा परेझैं लाग्छ।
तर, स्थानीय सरकार आएपछि भने साँस्कृतिक पर्यटकीय क्षेत्र घोषणा गरी सडक ग्राबेलको काम भइरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
