काठमाडौं– भौतिक पूर्वाधार तथा यातायातमन्त्री रघुवीर महासेठले सडक विभागको काम कारबाहीप्रति असन्तुष्टि व्यक्त गरेका छन्।
मन्त्री महासेठले इमानदार ढंगले काम नगर्ने सडक विभाग, सडक बोर्ड लगायतका संस्थामाथि कडा कारबाही गर्ने चेतावनी पनि दिए। उनले सडक विभागकै कारण काठमाडौंका सडकमा जनताको अपेक्षाअनुसार सुधार आउन नसकेको पनि स्पष्ट पारेका छन्।
स्रोत र साधनको दुरुपयोग नभएको भए काठमाडौंका सडक व्यवस्थित भइसकेको हुने मन्त्री महासेठको भनाइ छ।
आइतबार काठमाडौंमा आयोजित सडक बोर्ड, नेपालको १६औं वार्षिक साधारणसभामा बोल्दै उनले आगामी चैत्र महिनाभित्र काठमाडौंको सडकलाई व्यवस्थित बनाउने गरी सडक विभाग, सडक बोर्ड, नेपाललगायतका संस्थाहरुलाई सरकारले गतिशील बनाइरहेको दाबी पनि गरे।
मन्त्री महासेठले संवैधानिक व्यवस्था अनुकूल हुने गरी सडक ऐन संशोधनको कामलाई अघि बढाइएको पनि स्पष्ट पारे। उनले सडकको उचित व्यवस्थापन गर्न आवश्यक बजेटको व्यवस्था गरिदिन प्रधानमन्त्री केपी शर्मा ओलीलाई आग्रह गरिएको पनि जानकारी दिए।
मन्त्री महासेठले कानुन र संरचना निर्माणमा धेरै समय दिनु परेकाले सरकारले जनताको अपेक्षाअनुसार काम गर्न नसकेको स्पष्टीकरण पनि दिए। उनले सडकको कामलाई प्रभावकारी बनाउन प्रदेश र स्थानीय तहमा पनि सडक बोर्ड, नेपालको कार्यालय स्थापना गर्ने तयारी भइरहेको बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
