काठमाडौं- प्रमुख प्रतिपक्ष दल नेपाली कांग्रेसले सरकारविरुद्ध संसद् र सडक आन्दोलनलाई एकसाथ अघि बढाउने भएको छ।
नेपाली कांग्रेस संसदीय दलको बुधबार बसेको बैठकले सरकार एकपछि अर्को जनविरोधी काममा लागिरहेको निष्कर्ष निकाल्दै त्यसविरुद्ध संसद र सडक आन्दोलनलाई एकसाथ अघि बढाउने निर्णय गरेको हो।
संघीय संसदको हिउँदे अधिवेशन सुरु हुनु केहीबेरअघि सम्पन्न संसदीय दलको बैठकले जनसरोकारका विषयलाई लिएर सरकारविरुद्ध सडक आन्दोलनलाई समेत बल पुर्याउने गरी संघीय संसदमा कुरो उठाउने निर्णय गरेको हो।
सरकारले जनविरोधी काम गरिरहेकाले त्यसविरुद्ध सडक आन्दोलनलाई समेत बल पुर्याउने गरी सदनमा कुरा उठाउने पार्टीका संसदीय दलका प्रमुख सचेतक बालकृष्ण खाँडले जानकारी दिए।
बैठकले सरकारले ‘कर्मचारी समायोजन अध्यादेश’ संसद छलेर ल्याएकोमा पनि आपत्ति जनाएको छ। त्यसैगरी निर्मला पन्तको हत्यारालाई अझै पक्राउ गर्न नसकेको, जनतालाई करको मारमा पार्ने काम सरकारले गरिरहेको कांग्रेसले आरोप लगाएको छ।
संसदको हिउँदै अधिवेशनमा जनसरोकारको विषयलाई सम्बोधन गर्न सरकारलाई दबाब दिने पनि प्रमुख सचेतक खाँडले जानकारी दिए। राष्ट्रियता, लोकतन्त्रको संरक्षणका लागि सरकारविरुद्ध जस्तासुकै कदम चाल्न पनि पार्टी बाध्य हुने कांग्रेस संसदीय दलको बैठकको निष्कर्ष छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
