काठमाडौं- नेकपाका अध्यक्ष पुष्पकमल दाहाल प्रचण्डको काठमाडौंमा धुलो कम भएको भन्ने अभिव्यक्तिप्रति नयाँ शक्ति नेपालका संयोजक डा बाबुराम भट्टराईले व्यंग्य गरेका छन्।
बुधबार संसदमा सम्बोधन गर्दै प्रचण्डले काठमाडौंमा धुलोधुँवा कम हुँदै गएको बताएका थिए। संसदमै डा भट्टराईले भने, 'हिजो जनताको घरदैलोमा बसेर सुखदुःख भोगेर आएका मानिसहरु, कतै हामीहरु छोटै अवधिमा सत्तामा पुग्ने बित्तिकै, हामीले जनताका सपना, दुखहरु बिर्सेका त होइनौं? हाम्रा चस्माहरु फेरिएका त होइनन्?'
'हामीहरु रातारात आलिशान महलहरूमा बस्ने, चिल्ला सडकमा कुद्ने र अनि देख्ने– धुलो धुँवा कतै देखिनँ। यो सुहाउने कुरा हो', उनले प्रश्न गर्दै भने, 'सरकार म भोकै छु, खान पाइनँ भन्दा राजा त्रिभुवन भन्थे रे– दूध र भात पनि खान पाइनौ?'
उनले जताततै चिल्लो देख्नु भ्रममात्रै भएको बताए। 'कतै हाम्रा नेता साथीहरुले ती जनताको दुःख पसिना, ती यथार्थ, ती दूरावस्थालाई बिर्सेर सबैतिर चिल्लो देख्ने, सबैतिर हाँसीखुसी नै देख्ने भयो भने हाम्रो भ्रम हो कि यथार्थ हो', उनले भने, 'तर मेरो ब्रह्मले भन्छ स्थिति त्यस्तो छैन। जनताको जीवनस्तरमा खासै परिवर्तन भएको छैन।'
डा भट्टराईले आफू गाउँघर घुमिरहने भन्दै उनले सरकार बनेपछि पनि कुनै गुणात्मक परिवर्तन नआएको बताए। 'स्थिर सरकार बन्नुमात्रै ठूलो कुरा होइन', उनले भने, 'जनताले आफ्नो जीवनमा के कति परिवर्तन आयो, लोकतान्त्रिक मूल्यामान्यताले कति जरो गाड्यो, विधिको शासन कायम भयो कि भएन, सुशासन र शान्ति सुरक्षा कायम भयो कि भएन जनताले हेर्ने हो। मैले दुखसाथ भन्नुपर्छ, जनताले त्यसो भनेको पाइएन।'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
