राजविराज– सप्तरीमा आज बिहान एक महिलाको हृदयघात कारण मृत्यु भएको छ।
विद्युतचुहावट नियन्त्रणका लागि प्रहरीसहित खटिएको विद्युत कर्मचारीको टोली राजगढ गाउँपालिका २, की ४० वर्षीया सवितादेवी झाको घरमा पुगेपछि हृदयघात भई उनको मृत्यु भएको प्रहरीले जनाएको छ।
विद्युत चोरी नियन्त्रणका नाममा राति ४ बजे नै घरमा पसेर प्रहरीसहितको टोलीले वादविवाद गर्न थालेपछि त्रसित भएर सवितालाई हृदयघात भएको उनका पति अनिल झाले बताए।
‘सुतिरहेको वेला हतियारसहित घरमा पसेर हप्काउन थाले,’ उनले भने,‘त्यही डरले बेहोस भएर उनी लडिन्।’
सविताको मृत्युपछि आक्रोसित बनेका स्थानीयले पोष्टमार्टमका लागि शव उठाउन दिएका छैनन्।
प्रहरीले घटनाको जिम्मेवारी लिएर परिवारलाई राहत र क्षतिपूर्ति दिने सम्झौता नभएसम्म शव उठाउन नदिने वडा अध्यक्ष ललितनारायण सिंहले बताए।
सप्तरीका एसपी राजेन्द्र विष्टले प्रहरीलाई देखेपछि त्राासका कारण घटना घटेको हुनसक्ने बताए।
स्थानीयका अनुसार सवितालाई यसअघि पनि हृदयघातको समस्या देखिएको देखिएको थियो।
पाहुना पनि पक्राउ
यसैगरी विद्युत चुहावट नियन्त्रण टोलीले कमलपुरबाट ९ जनालाई नियन्त्रणमा लिएको छ। हुकिङ गरी विद्युत प्रयोग गरेको पाइएपछि उनीहरूलाई पक्राउ गरिएको हो।
चोरी नियन्त्रणका क्रममा पाहुना आएका व्यक्तिलाई समेत टोलीले पक्राउ गरेको स्थानीयले आरोप लगाएका छन्।
भारतको जिरोगाबाट कमलदेव यादवको घरमा पाहुना आएका चन्दनयादवलाई समेत टोलीले पक्राउ गरेर लगेको वडा अध्यक्ष सिंहले जानकारी दिएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
