काठमाडौं– जनकपुरधाममा सम्पन्न नेपाल जेसिजको ४५औं राष्ट्रिय महाधिवेशनबाट अध्यक्षमा महेश पौडेल निर्वाचित भएका छन्। नेपाल जेसिज २०१९ का लागि सोमबार अबेर साँझ विद्युतीय भोटिङ मेसिनबाट सम्पन्न मतदानमा ९ सय २१ मत प्राप्त गर्दै इटहरी जेसिजका पौडेल अध्यक्षमा निर्वाचित भएका हुन्।
अध्यक्ष पदकै लागि उम्मेदवारी दिएका बागलुङ जेसिजका सुदीपराज भण्डारी २ सय ४१ मत ल्याएर यस वर्षको उपविजेता बनेका छन्। जेसिज परम्परामा विजेता र उपविजेताबीच कुनै विभेद नहुने र यसमा सबैको जित मात्र हुने गरेको महाधिवेशन निर्देशक सन्तोष साहले बताए।
गत वर्ष केही मतको अन्तरले पौडेल विजेता बन्न सकेका थिएनन्। सोमबार मध्यरातमै समापन समारोहको आयोजना गरी यस वर्षको राष्ट्रिय महाधिवेशन सम्पन्न भएको जनकपुर जेसिजका अध्यक्ष जितेन्द्र महासेठले बताए।
नयाँ कार्यसमितिको कार्यकारिणी उपाध्यक्षहरूमा रबिन पोखरेल, श्यामसुन्दर पौडेल (मिलन), रमेशचन्द्र भुसाल र अमिस ढकाल विजयी भएका छन्। पौडेल विराटनगर जेसीज र ढकाल गछिया जेसीजका प्रतिनिधि हुन्।
त्यस्तै, उपाध्यक्षहरूमा लालमणि भुसाल, इनु थापा, गोकुल सापकोटा, मोहनलाल डाँगी, रूकमणी सिग्देल, हरिकुमार शर्मा चयन भएका छन्। भोजराज चापागाई, कमल भण्डारी, सुमनकृष्ण श्रेण्ठ, अर्जुन अधिकारी, कृष्णप्रसाद अर्याल र दिनेश बोहरा पनि उपाध्यक्षमा निर्वाचित भएका छन्।
महाधिवेशनमा अध्यक्षका लागि २ जना, कार्यकारिणी उपाध्यक्षमा ८ जना र उपाध्यक्षमा २० जना प्रतिस्पर्धी रहेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
