काठमाडौं-
मायालु तिमी टाढा भई दिनाले
छातीमा पिर बोकी हासेर के गरौं
मनका कुरा बोकेर के गरौं
जब अभिनेता भुवन केसी यिनै शब्दहरूमाथि सुर र तालमा गुञ्जिन थाले दर्शकदीर्घामा बसेका छोरा अनमोल केसी बुबाको गायनकला नियालिरहेका थिए। सँगै रहेका अन्य कलाकर्मी पनि उतिकै जिज्ञासु नजरमा मुस्कुराई रहेका थिए। उता भुवनको संगीतमय आवाजलाई आ-आफ्ना क्यामेरमा कैद गर्न सञ्चारकर्मीहरू पनि उतिकै चनाखो देखिन्थे।
यतिकैमा भुवनले भने,‘यो चाँहि नेपालको पहिलो म्युजिक भिडियोको गीत हो। यसमा शम्भूजित बास्कोटाले संगीत र निर्देशन दुबै गर्नुभएको थियो।’ भुवनको यो भनाइलाई पुष्टि गर्दै सञ्चारकर्मी नरेश भट्टराईले थपे,‘हो यो नेपालको फस्ट म्युजिक भिडियोको गीत हो। यसमा भुवन दाईकै स्वर र अभिनय तथा विजय उदयका शब्द छन्।’
गत मंसिर २७ गते अभिनेता भुवन केसी र उनकै छोरा अनमोल केसीको अभिनयमा निर्माण भएको फिल्म ‘क्याप्टेन’को पहिलो गीत सार्वजनिक कार्यक्रमा देखिएको माहोलको एक अंश हो यो। यही माहोलभित्र रहेर पंक्तिकारमा विभिन्न जिज्ञासाहरू सृजना भए। यस्ता जिज्ञासा आम मानिसहरुमा सृजना भइरहका छन्।
त्यसको एक हप्तापछि अभिनेता भुवन केसीसँग संयोगले काठमाडौंको कुमारी हलमा एक कार्यक्रममा पुनः भेट भयो। उनी बजारमा सार्वजनिक भएको आफ्नो गीतको प्रतिक्रिया लिन जासुसझैं तल्लीन थिए। यसै क्रममा भुवनले सांगीतिक यात्रा र आफ्नो पहिलो म्युजिक भिडियोमा गरेको अभिनयका सम्बन्धमा पंक्तिकारसँग विभिन्न किस्साहरू पोख्न थाले।
उनले मुस्कुराउदै भने, ‘उतिबेला हामीलाई म्युजिक भिडियो भनेको के हो, थाहै थिएन। गायकहरू रेडियो नेपालमा गाँउनु हुन्थ्यो। उहाँहरूलाई स्रोताले आवाजको भरमा चिन्नु पर्ने हुन्थ्यो। अन्य 'सिनियर' दाइहरू स्टेजमा गाँउनु हुन्थ्यो। उहाँहरुलाई देख्नेले चिन्ने गर्दथे। तर हामीलाई भने एउटा नयाँ चिज गरेर हेरौं न भनेर भिडियोको अवधारणा ल्याएका थियौं। सोही अवधारणा अनुसार हामी म्युजिक भिडियो बनायौं पनि। पछि निकै चर्चित पनि भयो।’
यति भनेर केही क्षण विश्राम लिएका उनी लामो समय रोकिएनन्। उनमा रोमाञ्चकता थपिँदै गएको देख्न सकिन्थ्यो। ‘त्यसअघिका घटना मेरो स्मरणमा छैनन्। यस किसिमको भिडियो नेपालमा मात्र नभएर भारतमा पनि शायदै कम मात्र बनेका थिए होला । तर पछि विस्तारै अन्य भिडियोहरू बजारमा आउन थाले। अनि मात्र थाहा भयो, हामीले बनाएको भिडियो त म्युजिक भिडियो पो रहेछ। जुन अहिले निकै प्रचलनमा छ। सबैले सजिलै थाहा पाउँछन्।’
भुवनलाई नेपालको पहिलो म्युजिक भिडियोमा अभिनय गरेको याद छ। तर उनलाई ठ्याक्कै मिति चाँहि स्मरण छैन। ‘यति नै साल भनेर याद त छैन। तर भयो होला ३० वर्षभन्दा बढी। किनकि उतिबेला म अनमोल जस्तै जवान थिएँ।’
चञ्चले स्वभावका भुवन उतिबेला निकै मेहनतका साथ लागि पर्ने गरेको सुनाउछन्। त्यसमा पनि एउटा गीतका लागि गरिएको अभिनयमा आफ्नो प्रस्तुती अव्वल बनाउने ध्याउन्नमा थिए उनि। काठमाडौं, भक्तपुर र विशेष गरि सल्लाघारी आसपासमा छायांकन गरिएको भिडियोलाई छायांकार जय सिंह शहले साथ दिएका थिए।
यसरी निर्माण भएको थियो पहिलो म्युजिक भिडियो
भुवनको अभिनयमा रहेको उक्त गीतका निर्देशक हुन् संगीतकार शम्भूजित बास्कोटा। उनैको अवधारणा र योजनामा निर्माण भएको थियो नेपालको पहिलो म्युजिक भिडियो। संगीतकार शम्भूजित सम्झन्छन्, ‘करिब २०४३/४४ सालको कुरा हो, म नेपाल टेलिभिजनमा ‘संगीत संगम’ नामक कार्यक्रम सञ्चालन गर्थें। कार्यक्रमको 'फरमेट' र 'कन्सेप्ट'अनुसार संगीत क्षेत्रमा आबद्ध व्यक्तित्वहरूका 'रेकर्डिङ स्टुडियो'मा 'लिप्सिङ' गरिएका भिडियोहरू प्रसारण गर्ने गथ्यौं। यसै शिलशिलामा भुवनसहित हाम्रो टिमले केही नयाँ गरेर टेलिभिजनमा भिडियो बजाऔं भनेर योजना बनायौं। सोही अनुसार भिडियो निर्माण भएको हो।’
भिडियो छायांकन सम्बन्धमा शम्भूजितले थपे,‘हामीसँग टेलिभिजनको क्यामेरा थियो। सोही क्यामेराले सुटिङ गर्यौं। गीतको भिडियोको पूरै छायांकन १ दिनमा पूरा भयो। नेपालमा म्युजिक भिडियोको सुरुवात गराएको थियो।’ भारतमा पनि सोभन्दा अघि खासै म्युजिक भिडियो नभएको संगीतकार बास्कोटाको दाबी छ।
संगीतकार बास्कोटाले भिडियो बनाए र टेलिभिजनमा प्रसारण पनि गरे। तर उनैलाई पनि थाहा थिएन कि यस प्रकारको भिडियोलाई बजारमा के भनिन्छ, भनेर। यस विषयमा बास्कोटा भन्छन्,‘यसपछि हामीले अन्य धेरै भिडियो बनायौं। बजारमा अन्य भिडियोहरु पनि आउन थाले। अनि बल्ल थाहा भयो, यस्ता भिडियोलाई त म्युजिक भिडियो भन्नुपर्ने रहेछ।’
यस्तो थियो पहिलो म्युजिक भिडियो
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
