धनगढी- धनगढी उपमहानगरपालिका छेउमा छ, बाल उद्यान। जहाँ भित्तामा ठूलो अक्षरमा लेखिएको छ, ‘शान्ति बाल उद्यान’।
तर, यो बाल उद्यानमा बालबालिका सहजै प्रवेश पाउँदैनन्।
बालबालिकाकै लागि भने बगैंचा, पिरामिड योग धाम, परीको मूर्ति, चिप्लेटी, पिङ लगायत निर्माण रहेको भए पनि उनीहरु टाढैबाट हेरेर चित्त बुझाउँछन्। बालबालिकाहरुलाई स्वच्छ, मनोरन्जनका साथै आध्यात्मिक र नैतिक शिक्षा प्रदान गर्ने मुख्य उद्देश्य बाल उद्यान स्थापना भए पनि उनीहरु यहाँ मन फुकाएर रमाउन पाउँदैनन्।
धनगढी उपमहानगरपालिकाको स्वामित्वमा रहेको यो उद्यानलाई व्यवस्थित गर्न २०७० सालमा नगरपालिकाले धनगढीस्थित ब्रह्मकुमारी ईश्वरीय विश्वविद्यालयलाई दिने निर्णय गरेको थियो। निर्णय गरेको झन्डै तीन वर्षपछि (२०७३ फागुन) सो उद्यान सञ्चालनमा ल्याइयो। तर, सञ्चालनमा आएदेखि नै बालबालिकालाई आफूखुसी उद्यानमा जान रोक लगाइएको छ।
ओमशान्तिमा आबद्ध धनगढी उपमहानगरपालिकाका नायव सुब्बा हेमराज भण्डारी भन्छन्, 'दैनिक बिहान ६ देखि ७ बजेसम्म ध्यान गर्नका लागि खुल्ला हुन्छ।'
उनको भनाइ अनुसार बाल उद्यान अहिले ध्यान केन्द्र बनिरहेको छ।
'चिल्ड्रेन पार्क'का नाममा २०४२ सालमा उद्यान स्थापना भएको थियो। तत्कालीन पञ्चायती व्यवस्थामा उद्यानमा महोत्सव मनाइने गरिन्थ्यो। बालबालिकालाई मनोरन्जन गराउनका लागि तत्कालीन नगर पञ्चायतले बाल उद्यानको स्थापना गरेको पाइन्छ। त्यस समय बालबालिकालाई खेल्न चिप्लेटी, झुला र अन्य खेल सामग्रीको व्यवस्था गरिएको थियो। बालबालिकाहरु फुर्सदका समयमा सो पार्कमा बिहानबेलुकै खेल्न जाने गरेका थिए।
२०४६ सालको आन्दोलनपछि धनगढी नगरपालिका स्थापना भयो। नगरपालिका भएपछि उद्यान व्यवस्थापनमा कसैको ध्यान नजाँदा भएका संरचना पनि जीर्ण बन्दै गए। नगरपालिकाले व्यवस्थित गर्न नसकेपछि बालबालिकाका लागि बनेको उद्यान गौचरणमा परिणत भएको स्थानीयहरु बताउँछन्। ‘त्यहाँ भएका संरचना नष्ट हुन थाले। बालबालिका लागि खेल्ने सामग्री पनि असुरक्षित भए। खेल्ने वातावरण नै भएन,’ नासु भण्डारीले भने।
दुई हजार एक सय ४८ वर्ग मिटरमा फैलिएको सो उद्यानको अहिले चारैतिर विभिन्न प्रजातिका फूल, शान्तिको प्रतीकको मूर्ति, एउटा ध्यानकोठा लगायत बनाएर ब्रह्मकुमारीले व्यवस्थित गरेको छ।
‘ब्रहमकुमारीलाई उद्यानलाई व्यवस्थित गर्न जिम्मेवारी दिने उपमहानगरपालिकाको आफ्नो निर्णय भएको हो,’ नायव सुब्बा भण्डारीले भने, ‘कुनै सूचना जारी गरेर वा ठेक्का दिएर सम्झौता गरिएको होइन।’
ब्रह्मकुमारी ईश्वरिय विश्वविद्यालयकी हिरा दिदी भने सातैदिन बिहानदेखि साँझसम्म उद्यान सञ्चालनमा ल्याउन चाहिरहेको बताउँछिन्। ‘बालबालिकाहरुले त्यहाँ भएका बोटबिरुवा चुँड्ने, भौतिक संरचनामा असर पुर्याउने लगायतका काम गर्छन्। त्यसैले नियन्त्रण गरिएको हो।’
जनशक्ति अभावले संरचना र बोटविरुवालाई जोगाउन नसकिएको उनको भनाइ छ। ‘हामीसँग जनशक्ति राख्ने आम्दानी पनि छैन,’ उनले भनिन्।
धनगढी उपमहानगरपालिकालाई बालमैत्री नगर घोषणा गर्न हरेक वडामा एक पार्क, बालमैत्री खानेपानी, भौतिक संरचनाहरु बनाउने रणनीति रहेको छ। सोही अनुरुप धनगढी वडा नम्बर १ मा बाल उद्यान सञ्चालनमा ल्याइएको धनगढी उपमहानगरपालिकाका सामुदायिक शाखा अधिकृत टंक विष्टले बताए। उनी भन्छन्, 'तर बाल उद्यानलाई बिहानदेखि साँझसम्मै खोल्नु जरुरी छ।'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
