काडमाडौं– आगामी पुस १५ गतेदेखि वैदेशिक रोजगारीमा जाने कामदारले व्यक्तिगत र पुनः श्रम स्वीकृति लिनका लागि काठमाडौं धाउनुपर्ने बाध्यता अन्त्य हुने भएको छ।
सरकारले प्रदेशस्तरबाटै वैदेशिक रोजगारमा जाने कामदारका हकमा व्यक्तिगत र पुनः श्रम स्वीकृति जारी गर्ने भएको श्रम रोजगार तथा सामाजिक सुरक्षा मन्त्रालयले जानकारी दिएको छ।
श्रम मन्त्रालयले ६ वटा प्रदेशस्तरीय श्रम कार्यालयमा वैदेशिक रोजगार इकाइ गठन गरी व्यक्तिगत र पुनः श्रम स्वीकृति जारी गर्न लागेको मन्त्रालयका सचिव महेशप्रसाद दाहालले जानकारी दिए। विराटनगर, धनुषा, पोखरा, बुटवल, सुर्खेत र धनगढीका श्रम कार्यालयबाट नै श्रम स्वीकृति जारी गर्ने उनको भनाइ छ।
मन्त्रालयले हालसम्म काठमाडौंस्थित वैदेशिक रोजगार विभागको कार्यालयबाट मात्र श्रम स्वीकृति जारी गर्दै आएको छ। सरकारले संघीय संरचनाअनुसार गत असोज देखि नै प्रदेशमा श्रम कार्यालय स्थापना गरेर श्रम स्वीकृति जारी गर्ने योजना चालू आर्थिक वर्षको बजेट भाषणमा उल्लेख गरेको थियाे।
मन्त्रालयका अनुसार श्रम स्वीकृति जारी गर्न सबै प्रदेशमा पूर्वाधारहरु तयारी अवस्था रहेका छन्। सुर्खेतमा श्रम, रोजगार तथा सामाजिक सुरक्षा मन्त्री गोर्कण विष्टले गत महिनामात्रै श्रम कार्यालयको उद्घाटन गरिसकेका छन्।
देश संघीय संरचनामा गएको बताउँदै सचिव दाहालले काठमाडौंका सम्पूर्ण सेवा प्रदेशसम्म पुर्याइएको बताए। ‘हाल काठमाडौंको ताहाचलमा श्रम इजाजत लिन ठूलो भीड लाग्दा सेवाग्राहीलाई सास्ती छ। अब यस्तो समस्याको अन्त्य हुन्छ। सहज रुपमा सेवाग्राहीले श्रम स्वीकृति लिन सक्छन्।’, उनले भने, ‘कार्यालयहरुमा टोकनसहितको सहज श्रम स्वीकृति लिने व्यवस्था मिलाउने योजना मन्त्रालयको छ।’
सरकारले वैदेशिक रोजगार ऐन संशोधन गरेपछि नेपाली दूतावासबाटै पुनः श्रम स्वीकृति दिने तयारी गरिरहेको मन्त्रालयले जानकारी दिएको छ। ऐनलाई संशोधन गर्न मन्त्रिपरिषद्ले स्वीकृत गरिसकेको श्रम मन्त्रालयले जनाएको छ। ऐन संसदबाट पारित भएपछि पुनः श्रम स्वीकृति पनि विदेशस्थित कूटनीतिक नियोगमार्फत जारी हुने श्रम मन्त्रालयको भनाइ छ।
अब बिमा र कल्याणकारी कोषबापतको रकम पनि प्रदेशबाट बुझाउन मिल्नेछ। हाल दैनिक श्रम स्वीकृति लिनेको भीड श्रम कार्यालयमा लाग्ने गरेको छ। दैनिक श्रम स्वीकृतिका लागि ४ हजार सेवाग्राही श्रम कार्यालय धाउने गरेका छन्। श्रम कार्यालयका अनुसार दैनिक करीब २ हजार ५ सय जनालाई श्रम स्वीकृति वितरण हुँदै आएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
