एजेन्सी- अमेरिकी राष्ट्रपति डोनाल्ड ट्रम्पले चीनमा उत्पादित वस्तुमा अतिरिक्त भन्सार लगाएपछि सुरु भएको व्यापार युद्ध मत्थर हुने संकेत मिलेको छ।
विश्व व्यापारमा चीनले एक्लौटी मनोमानी गरेको र त्यसले अमेरिकाको अर्थतन्त्रमा नकारात्मक प्रभाव पारेको भन्दै केही महिनायता अमेरिकाले चिनियाँ समानामा अतिरिक्त भन्सार लगाएपछि चीनले पनि अमेरिकाबाट आयात हुने वस्तुमा अतिरिक्त कर लगाएको थियो। यसपछि अमेरिका र चीनबीच बढेको व्यापारिक तनावले विश्व अर्थतन्त्रलाई नकारात्मक प्रभाव पारेको भन्दै चिन्ता बढ्दै गइरहेको छ।
यसैबीच बुधबार चीनले अमेरिकाबाट आयात हुने सोयाबिन खरिदमा लगाउँदै आएको अतिरिक्त भन्सार घटाउने निर्णय गरेको छ। योसँगै अमेरिकी राष्ट्रपति डोनाल्ड ट्रम्प र चिनियाँ राष्ट्रपति सि जिनफिङ प्रशासनले एकअर्काका देशका समान आयातमा अतिरिक्त भन्सार लगाउन अख्तियार गरेको नीति परिर्वतन हुन सक्ने आँकलन गरिएको छ।
चीनको यो निर्णयसँगै अमेरिकाका सोयाबिन उत्पादक कृषकलाई राहत मिल्ने देखिएको छ। ठुलो मात्रामा सोयाबिन उत्पादन गर्ने अमेरिकी कृषकलाई ग्राहकको कमी भएको थियो।
अन्तर्राष्ट्रिय सञ्चार माध्यम रोयर्टससँग मंगलबार कुराकानी गर्दै अमेरिकी राष्ट्रपति ट्रम्पले चिनियाँहरूले अमेरिकाबाट ठुलो मात्रामा सोयाबिन खरिद गर्न थालिसकेको बताए। यस्तै चीनले पनि अमेरिकी अटोमोबाइल खरिद सुरु गर्ने दाबी ट्रम्पले गरेका छन्।
चीनले अमेरिकाबाट खरिद गर्ने १ दशमलव ५ मिलियन टन सोयाबिन खरिद प्रक्रिया सुरू गर्नु आफैंमा सम्बन्ध सुधारको प्रमाण भएको राष्ट्रपति ट्रम्पले बताएका छन्।
अर्जेटिनामा भएको जि–२० सम्मेलनको अवसरमा दुवै राष्ट्रका राष्ट्रपतिबीच भेटवार्ता भएको थियो।
सो भेटवार्तापछि दुवै देशले व्यापार युद्धका विषयमा कम्तिमा ९० दिनसम्म वार्ता प्रयास गर्ने सहमति भएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
