काठमाडौं– निजी विमानबाट जनकपुर विमानस्थल ओर्लिएका भारतको उत्तर प्रदेशका मुख्यमन्त्री आदित्यनाथ योगी साढे ५ घण्टा बिताएर फर्किएका छन्। बिहानको झन्डै साढे १० बजे विमानस्थलमा ओर्लिएका उनी बेलुका सवा ४ बजे फर्किएका थिए।
जनकपुरमा उनले जानकी मन्दिरमा पूजाआजा, दिवाभोज तथा बाह्रबिघामा भएको रामसीताको स्वयंवर समारोहमा समय बिताएका थिए।
विवाह पञ्चमीमा सयौं जन्तीको नेतृत्व गरेर बुधबार जनकपुर आएका योगीलाई विमानस्थलमा संस्कृति पर्यटन तथा नागरिक उड्डयनमन्त्री रवीन्द्र अधिकारी र प्रदेश २ का मुख्यमन्त्री लालबाबु राउतले स्वागत गरेका थिए। योगीलाई स्वागत गर्नका लागि नेपालका लागि भारतीय राजदूत मन्जिवसिंह पुरी पनि विमानस्थल पुगेका थिए।
विमानस्थलबाट योगी जानकी मन्दिर पुगेका थिए। त्यहाँ उनले आधा घण्टा जति पूजा गरेका थिए।
तस्बिर : नविन पाैडेल
पूजाआजा पछि उनी 'मधेस भवन'मा पुगेका थिए। यो भवनमा प्रदेशका सबै मन्त्रालयहरु रहेका छन्। त्यहाँ उनलाई मुख्यमन्त्री राउतले मिथिला परम्पराअनुसार स्वागत गरेका थिए।
त्यहाँ आयोजित सम्मान समारोहमा मुख्यमन्त्री राउतले योगीलाई स्वागत गर्दै अभिनन्दन पत्र प्रदान गरेका थिए। समारोहमा संस्कृति पर्यटन तथा नागरिक उड्डयनमन्त्री रवीन्द्र अधिकारी, राष्ट्रिय जनता पार्टीका अध्यक्षहरु राजेन्द्र महतो, महन्थ ठाकुर, राष्ट्रियसभा सदस्य कोमल ओली लगायतको सहभागिता थियो।
त्यसपछि उनलाई मुख्यमन्त्री कार्यालयमा दिवाभोज गराइएको थियो। त्यहाँ उनलाई ३६ प्रकारका व्यञ्जनको प्रवन्ध गरिएको थियो। १ हजार १ मूर्ते साधुसन्तको भण्डारामा योगी सहभागी भएका थिए।
जिरा राइस, दाल फ्राइ, मटर पनिर, मिक्स भेज, गोभी फ्राइ, कचौरीरपालक पुरी, सादा रोटी, खिर, गाजरको हलुवा, सुजी हलुवा, अमिति, बुनिया, पेडा, काला जामून, ३ प्रकार रसभरी, तछुवा (पकौडा), नेपाली अँचार, राइता, पापड, सलाद, दही, राजभोग, बदाम कतली, काजु कतली, मुङ दालके हलुवा, लालमोहन, बदाम रोल, गुलाव जामुन, क्रिम जेरी, मटर पनिर, मलाइ कोपता, बेसन गांता सब्जी कोबी मटर सब्जी लगायतका परिकारहरु रहेको थियो।
त्यसपछि भने उनी बाह्रबिघामा भएको रामसीताको स्वयंवर समारोहमा सहभागी भएका थिए। उनीसँगै भारतबाट जन्ती आएका साधुसन्त पनि स्वयंवरमा सहभागी भएका थिए। त्यहाँ आयोजित नागरिक अभिनन्दन समारोहलाई उनले सम्बोधन गरेका थिए।
उच्च सुरक्षा
योगीको सुरक्षा संवेदनशीलतालाई ख्याल गरेर जनकपुरमा सुरक्षा व्यवस्था कडा पारिएको थियो। उनको सुरक्षाका लागि भारतबाट करिब दुई दर्जन सुरक्षाकर्मी आएका बताइएका छन्।
योगीले जानकी मन्दिरमा पूजा गरुञ्जेल अन्य सर्वसाधारणलाई भने मन्दिर परिसरमा छिर्न दिइएको थिएन। बिहान ९ बजेदेखि लगाइएको निषेध दिउँसो २ बजेसम्म गरिएको निषेधका कारण धेरै सर्वसाधारणले हैरानी व्यहोर्नुपरेको थियो। नेपाल, भारत तथा तेस्रो देशबाट दर्शनका लागि जनकपुर आइपुगेका धेरैले अन्योलमा ५ घण्टा बिताएका थिए।
अघिल्ला वर्षहरुमा भन्दा विशेष सजावट गरिएको जानकी मन्दिर योगीको पूजाका कारण सुनसान हुन पुगेको थियो। कारण, सधैंका वर्षमा घुँइचो हुने जानकी मन्दिर परिसरमा अन्य सर्वसाधारण भने छिर्न पाएका थिएनन्।
प्रदेश प्रमुखसँग शिष्टाचार भेट
जनकपुर बसाइका क्रममा योगीले प्रदेश २ का प्रदेश प्रमुख रत्नेश्वरलाल कायस्थसँग शिष्टाचार भेट पनि गरेका छन्। भेटवार्तामा राजदूत मञ्जीवसिंह पुरी पनि सहभागी रहेको भारतीय विदेश मन्त्रालयले जनाएको छ।
त्यस्तै, उनले मुख्यमन्त्री राउतसँग पनि छोटो भेटवार्ता गरेका थिए। जानकी मन्दिरबाट मधेस भवन पुगेका योगीले त्यहीँ मुख्यमन्त्री राउतसहितका नेताहरुसँग भेटवार्ता गरेका हुन्।
'राम सीताको जीवन साझा सभ्यताको अंग'
योगीले जनकको भूमिको यात्रा गर्न पाएकोमा आफूलाई धन्य मानेका छन्। जानकी मन्दिरको आगन्तुक पुस्तिकामा उनले लेखेका छन्- 'विवाह पञ्चमीको पावन अवसरमा जनकपुरधाममा पूजा-अर्चना गर्ने र विदेहराज महाराज जनकको भूमिको यात्रा गर्ने अवसर मिलेकोमा स्वंयमलाई धन्य ठान्छु।'
उनले राम र सीताको दुई देशको धर्म संस्कृति र सभ्यताको अभिन्न भएको लेखेका छन्।
त्यस्तै उनले सीता बिना राम बिल्कुलै अधुरो रहेको बताएका छन्। योगीले बाह्रबिघा मैदानमा जनकपुरवासीलाई सम्बोधन गरेका थिए।
हिन्दुवादी नेता समेत मानिएका मुख्यमन्त्री योगीले जनकपुरधाममा पहिलो पटक आएको भन्दै जनकपुरधाममा अपनत्वको बोध भएको बताए। नेपाल र भारत भाइभाइ राष्ट्र भएको भन्दै बेटी रोटीको सम्बन्धलाई विवाह पञ्चमी महोत्सवले झन् सुमधुर बनाउन मदत गरेको औंल्याए।
आयोजित नागरिक अभिनन्दन समारोहलाई योगीले आफ्नो सम्बोधन नेपालीमा सुरु गरेका थिए। उनले भने, ‘म आज यहाँ सबै नेपालीम दाजुभाई, दिदीबहिनीहरुको लागि भारतको प्रधानमन्त्री नरेन्द्र मोदीको तर्फबाट हार्दिक बधाई र शुभकामना बोकेर आएको हुँ। तपाईंहरुको माँझमा म समस्त भारतवासीको दूतको रुपमा उपस्थित भएको छु।‘
योगीले आफू जानकीको पवित्र स्थलमा पुगेर गौरवान्वित महसुुस गरिरहेको बताउँदै उनले दुनियाँको सबै हिन्दूहरुलाई आयोध्याधाम र जनकपुरधामको तिर्थाटन गर्ने अभिलाषा हुने बताए। उनले जानकी दर्शनको अवसर जुटाइदिएकोमा भारतीय प्रधानमन्त्री, नेपाल सरकार, प्रदेश २ सरकार र जानकी मन्दिर परिवारलाई विशेष धन्यवाद ज्ञापन गरे।
उनले विगत केही वर्षदेखि भारत र नेपाल समावेशी विकासको दिशामा स्पष्ट दृष्टिकोणको साथ अघि बढिरहेको बताउँदै भारतको आर्थिक प्रगतिको वास्तविक लाभ नेपालले प्राप्त गरोस् भन्ने हेतुले कनेक्टिभिटीमा बढोत्तरी आवश्यक रहेको बताए।
योगीले भारत र नेपालको केनेक्टीविटी सम्बन्धी परियोजनाहरुलाई अघि बढाएको बताउँदै यसले गर्दा दुबै देशको व्यापार तथा सर्वसाधारणको सुगम आवागमनप्रति हाम्रो साझा प्रतिबद्धतालाई दर्शाएको बताए। उनले दुवै देशको प्रधानमन्त्रीले कृषि क्षेत्रमा नयाँ सहभागिताबारे घोषणा गरेको बताउँदै विभिन्न परियोजनाहरुको माध्यमले कृषि विज्ञान र प्रविधि, कृषि उत्पादन तथा एग्रो प्रोसेसिङमा आपसी सहयोगमा बढोत्तरी गर्ने बताए।
मुख्यमन्त्री योगीले भारत सरकारको दिशानिर्देशमा आफ्नो राज्य उत्तर प्रदेशले नेपालको संघीय सरकार र प्रदेश २ सरकारसँग सहकार्य गर्न तयार रहेको प्रतिबद्धता व्यक्त गरे।
उनले दुवै देशको पर्यटन क्षेत्रको सम्भवानालाई मध्यनजर गर्दै यसको सदुपयोग गर्नको लागि रामायण सर्किट र बुद्धिष्ट सर्किटको विकासमाथि सक्रियतापूर्वक कार्य गर्नुपर्ने बताए।
उनले जनकपुर र अयोध्याको दूरी घटाउन भारत सरकारले चार लेनको रामजानकी मार्ग निर्माण काम अगाडि बढाएको जानकारी दिए। जनकपुर र आयोध्याको पौराणिक सम्बन्ध रहेको बताउँदै योगीले भने, ’जानकी बिना रामको शक्ति सम्भव थिएन, आधा शक्ति त सीता थिइन्।’
त्रेता युगमा अयोध्याधाम र जनकपुरधाम मिलेपछि मात्रै राम राज्यको स्थापना भएको भन्दै उनले भने, ‘जानकी बिना रामको कल्पनासमेत हाम्रो संस्कृतिले गर्दैन।’
भारतीय प्रम नरेन्द्र मोदीले जनकपुर भ्रमणको क्रममा जनकपुरदेखि अयोध्याधामसम्मको लागि बस सेवा प्रारम्भ गरेका थिए। सो सेवालाई उत्तरप्रदेश सरकारले निरन्तरता दिइराख्ने प्रतिबद्धता उनले जनाए।
प्रदेश २ का मुख्यमन्त्री लालबाबु राउतले विवाह पञ्चमीमा उत्तर प्रदेशका मुख्यमन्त्री योगीको आगमनले दुई देशको सम्बन्ध थप प्रगाढ हुने बताए।
रंगभूमि मैदानमा विशेष सांस्कृतिक कार्यक्रम आयोजना गरिएको थियो। कार्यक्रममा योगीलाई जनकपुर उपमहानगरपालिकाले योगीलाई नागरिक अभिनन्दन गरेका थिए। जनकपुर उपमहानगरपालिकाका मेयर लाल किशोर साहले अभिनन्दन गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
