काठमाडौं- माओवादीसँग वाम गठबन्धन गरेपछि एमाले उत्साहमा छ। स्थानीय तहको चुनावमा कांग्रेस र माओवादीले तालमेल गरेर एमालेका उम्मेदवारलाई घाटा पुर्याएको र चुनावी उत्साहमै धक्का दिएका कारण हच्किएको एमालेलाई पछिल्लो तालमेलले उत्साह ल्याउनु स्वाभाविक पनि हो। पार्टी एकताको लक्ष्य समेत बनाएका यी दुई पार्टीको चुनावी सफलता निकै चासोका साथ हेरिएको छ।
प्रदेशसभा र प्रतिनिधिसभाको चुनाव नजिकिँदै जाँदा मुख्य पार्टीका शीर्ष नेताहरु कहाँबाट चुनाव लड्दैछन् भन्ने चासो बढेको छ। पछिल्लो समय वाम गठबन्धन र लोकतान्त्रिक गठबन्धनको चर्चाले पनि आम सर्वसाधारणमा चासो बढेको हो।
केही जोखिमका बाबजुद प्रायः शीर्ष नेताहरु पुरानै निर्वाचन क्षेत्रबाट चुनाव लड्ने तयारीमा देखिन्छन्। पार्टीका स्थानीय कमिटीहरुले पनि सोही अनुसार सिफारिस गरेका छन्।
नेपाल लाइभले पार्टीका शीर्ष नेताहरु कहाँबाट चुनाव लड्दै छन् भनेर सूची बनाउने प्रयास गरेको छ। यसमा मुख्यतः ती पार्टीका स्थानीय कमिटीले सिफारिस गरेको क्षेत्र, संविधानसभामा प्रतिस्पर्धा गरेको क्षेत्र, सम्बन्धित दलमा रहेर टिकट वितरण गर्ने जिम्मा पाएका नेताहरुसँगको कुराकानी र नेताका गृह जिल्लालाई आधार बनाएका छौं।
केपी शर्मा ओली
एमाले अध्यक्ष ओली यसपटक झापा ५ बाट सिफारिस भएका छन्। २०७० सालको चुनावमा उनले झापा ७ बाट जितेका थिए। यसअघि ७ वटा निर्वाचन क्षेत्र रहेको झापामा यसपटक ५ वटा मात्रै छन्। उनलाई सिरहा १ बाट चुनाव लड्न पनि दबाव छ। तर गृहजिल्ला भएका कारण र बढी सुरक्षित क्षेत्र भएका कारण उनको प्रतिस्पर्धा झापा ५ बाटै हुने पक्का छ।
माधवकुमार नेपाल
नेपाल रौतहट र काठमाडौं दुवै जिल्लाबाट सिफारिसमा परेका छन्। पहिलो संविधानसभाको चुनावमा दुवै ठाउँबाट हारे पनि दोस्रो चुनावमा उनी दुवै ठाउँबाट विजयी भएका थिए। दुईमध्ये एक स्थान छाड्नुपर्ने अवस्थामा उनले काठमाडौंलाई छाडेका थिए। तर यसपटकको स्थानीय तहको निर्वाचनमा रौतहटका कुनै पनि स्थानीय तहको नेतृत्व जित्न नसकेका कारण नेपालले काठमाडौं २ बाट प्रतिस्पर्धा गर्ने सम्भावना उच्च छ।
झलनाथ खनाल
खनाल इलाम १ मा सर्वसम्मत सिफारिसमा परेका नेता हुन्। ०७० को चुनावमा सर्लाही १ बाट माओवादी उम्मेदवारसँग पराजित खनाल इलाम १ बाट भने विजयी बनेका थिए।
बामदेव गौतम
गौतम प्युठान र बर्दियाका क्षेत्र नम्बर १ बाट सिफारिसमा परेका छन्। दोस्रो संविधानसभाको चुनावमा यी दुवै क्षेत्र जिते पनि उपनिर्वाचनका लागि बर्दिया छाडेका थिए। प्युठानमा झन्डै ५ हजारको मतान्तरले जितेका गौतमले बर्दियामा पनि ७ हजारको मतान्तरले जितेका थिए। यसका बाबजुद उनले प्युठानबाट चुनाव लड्ने तयारी गरेका छन्। किनकि, यसपटक दुई स्थानबाट चुनाव लड्ने सुविधा नेताहरुलाई छैन।
भीम रावल
अघिल्लो चुनावमा अछाम १ बाट विजयी रावल यसपटक पनि सोही क्षेत्रबाट उठ्ने पक्का जस्तै छ। उनी सो क्षेत्रबाट सर्वसम्मत सिफारिसमा परेका छन्।
ईश्वर पोखरेल
दोस्रो संविधानसभाको चुनावमा काठमाडौं ५ बाट कांग्रेस उम्मेदवार नरहरि आचार्यसँग पराजित पोखरेल यसपटक पनि सोही क्षेत्रका लागि सर्वसम्मत सिफारिसमा परेका छन्। उनले सोही क्षेत्रबाट पुनः चुनाव लड्ने तयारी थालेका छन्।
सुवास नेम्वाङ
नेम्वाङ इलाम २ बाट सिफारिसमा परेका छन्। यसअघि पनि नेम्वाङ सोही क्षेत्रबाट प्रतिनिधित्व गर्थे।
विष्णु पौडेल
पौडेललाई रुपन्देही २ बाट सर्वसम्मत उम्मेदवार सिफारिस गरिएको छ। ०७० सालको चुनावमा उनी क्षेत्र नम्बर ४ का उम्मेदवार थिए। उनी विजयी भएको सो क्षेत्रमा माओवादीका उम्मेदवार डा बाबुराम भट्टराई तेस्रो बनेका थिए। साविकमा ७ वटा निर्वाचन क्षेत्र रहेको रुपन्देहीमा अहिले ५ वटा मात्रै छन्।
घनश्याम भुसाल
भुसाल रुपन्देही १ र ३ बाट सिफारिसमा परेका छन्। उनी ०७० सालको चुनावमा रुपन्देही ३ मा कांग्रेस नेता बालकृष्ण खाँडसँग पराजित भएका थिए। त्यसैले पनि उनले १ नम्बरबाट चुनाव लड्ने मनस्थिति बनाएका छन्।
प्रदीप ज्ञवाली
ज्ञवाली गुल्मी १ बाट सर्वसम्मत सिफारिसमा परेका छन्। ०७० को चुनावमा उनी गुल्मी २ बाट कांग्रेस उम्मेदवार चन्द्र भण्डारीसँग पराजित भएका थिए। त्यतिबेला ३ वटा निर्वाचन क्षेत्र रहेको गुल्मीमा अहिले २ वटा निर्वाचन क्षेत्र मात्रै छन्।
यो पनि पढ्नुस्:
कांग्रेसका शीर्ष नेता को कहाँबाट चुनाव लड्दैछन्?
यी निर्वाचन क्षेत्रबाट चुनाव भिड्दैछन् माओवादीका शीर्ष नेता
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789992067.jpeg)
-1789631269.jpg)
