राजनीति

कांग्रेसका शीर्ष नेता को कहाँबाट चुनाव लड्दैछन्?

किशोर दहाल बिहीबार, कात्तिक २, २०७४ १७:५७

काठमाडौं- प्रदेश सभा र प्रतिनिधि सभाको चुनाव नजिकिँदै जाँदा मुख्य पार्टीका शीर्ष नेताहरु कहाँबाट चुनाव लड्दैछन् भन्ने चासो बढेको छ । पछिल्लो समय वाम गठबन्धन र लोकतान्त्रिक गठबन्धनको चर्चाले पनि चासोमा बढोत्तरी ल्याएको छ । कारण, गठबन्धनको सिकार प्रतिस्पर्धी पार्टीका शीर्ष नेता बन्न सक्ने सम्भावना बढेको छ।

केही जोखिमका बाबजुद प्रायः शीर्ष नेताहरु पुरानै निर्वाचन क्षेत्रबाट चुनाव लड्ने तयारीमा देखिन्छन् । पार्टीका स्थानीय कमिटीहरुले पनि सोही अनुसार सिफारिस गरेका छन्।

नेपाल लाइभले कांग्रेसका शीर्ष नेताहरु कहाँबाट चुनाव लड्दै छन् भनेर खोतल्ने प्रयास गरेको छ । यसमा मुख्यतः पार्टीका स्थानीय कमिटीले सिफारिस गरेको क्षेत्र, संविधानसभामा प्रतिस्पर्धा गरेको क्षेत्र, सम्बन्धित दलमा रहेर टिकट वितरण गर्ने जिम्मा पाएका नेताहरुसँगको कुराकानी र नेताका गृहजिल्लालाई आधार बनाएका छौं।

वाम गठबन्धनबाट सुरुताका केही आत्तिएको कांग्रेस पनि अहिले शान्तसँग चुनावी रणनीति बनाइरहेको छ । केही पार्टीसँग मिलेर लोकतान्त्रिक गठबन्धनको प्रयास पनि उसले गरेको छ । चतुर राजनीतिक खेलाडी विजय गच्छदारलाई केही दिनअघि पार्टीमा भित्र्याउँदा सभापति देउवाले भनेका थिए– 'कांग्रेस थप बलियो भयो।'

शेरबहादुर देउवाः शेरबहादुर देउवा यस पटक पनि डडेल्धुराबाटै चुनाव लड्नेछन् । देउवालाई उम्मेदवार बनाउने कुरामा स्थानीय कमिटीमा विवाद छैन । यसअघि पनि उनले २०४८, २०५१, २०५६, २०६४ र २०७० सालमा डडेल्धुराबाट चुनाव जितेका थिए।

रामचन्द्र पौडेलः पौडेल गृहजिल्ला तनहुँको क्षेत्र नम्बर १ बाट चुनाव लड्ने तयारीमा छन् । त्यसो त उनले चुनाव लड्ने तयारी गरिरहेको क्षेत्रमा अर्का नेता गोविन्दराज जोशीसँग किचलोमा फसेका छन् । साविक तीन वटा क्षेत्र रहेको तनहुँमा यस पटक दुई वटा मात्रै क्षेत्र छन् । भ्रष्टाचारको अभियोग लागेका जोशीभन्दा उपसभापति पौडेल नै हावी हुनेछन्।

प्रकाशमान सिंहः सिंह काठमाडौं १ बाट चुनाव लड्ने पक्कापक्की जस्तै छ । यसअघि पनि उनी त्यही क्षेत्रबाट विजयी भएका थिए । ०७० सालको संविधानसभाको चुनावमा उनी अहिले भरतपुर महानगरपालिकाकी मेयर रेणु दाहाललाई दोस्रो बनाउँदै विजयी भएका थिए । काठमाडौं १ का लागि सिफारिसमा परेका अन्यभन्दा सिंह ‘हाइ प्रोफाइल’ छन्।

शशांक कोइरालाः कोइरालाले संविधानसभाको दुवै चुनावमा नवलपरासी १ बाट जितेका थिए । ०७० सालको चुनावमा उनले एमाले उम्मेदवार दीपक अधिकारीलाई ६ हजारभन्दा बढी मतले पराजित गरेका थिए । यस पटक पनि उनी नवलपरासी १ बाटै सिफारिसमा परेका छन् । महामन्त्री कोइराला सो क्षेत्रका लागि सर्वसम्मत सिफारिसमा परेका हुन्।

विजयकुमार गच्छदारः २०७० सालको चुनावमा मधेसी जनाधिकार फोरम, नेपाल (लोकतान्त्रिक) का उम्मेदवारका रुपमा २ ठाउँबाट प्रतिस्पर्धा गरेका गच्छदार एक ठाउँबाट मात्रै विजयी भएका थिए । उनी मोरङ ७ मा कांग्रेस नेता शेखर कोइरालासँग २ हजारभन्दा बढी मतले पराजित भएका थिए । सुनसरी ३ मा पनि एमाले उम्मेदवारलाई झिनो मतान्तरले पछि पार्दै उनी विजयी भएका थिए । यस पटक उनी कांग्रेसको तर्फबाट उम्मेदवार हुनेछन् । सुनसरी ३ नै उनको स्वाभाविक क्षेत्र हो।

अर्जुननरसिंह केसीः ०७० सालको चुनावमा नुवाकोट क्षेत्र नम्बर १ बाट ८ हजारभन्दा बढी मतान्तरले माओवादी उम्मेदवारलाई पछि पार्दै केसी विजयी भएका थिए । यसपटक पनि उनी नुवाकोट १ कै उम्मेदवारका लागि सिफारिस भएका छन् । केसीको अप्ठ्यारो के छ भने, सोही क्षेत्रबाट रामशरण महत पनि सिफारिस भएका छन् । साविकमा तीनवटा निर्वाचन क्षेत्र रहेको नुवाकोटमा यसपटक दुई वटा मात्रै क्षेत्र तोकिएका छन् । यसअघि पनि जितेका कारण उनी प्राथमिकतामा पर्ने अनुमान गर्न सकिन्छ।

रामशरण महतः यसअघि नुवाकोट २ बाट चुनाव जितेका महत यसपटक क्षेत्र नम्बर १ का लागि सिफारिस भएका छन् । उनी चुनावी प्रतिस्पर्धी बन्नुभन्दा अघि नै उम्मेदवार बन्न प्रतिस्पर्धा गर्नुपर्ने भएको छ । तर, नुवाकोटकै अर्को क्षेत्रमा चर्चित तर कम उचाइका नेताहरु सिफारिसमा परेकाले केसी र महतबीच क्षेत्र बाँडफाँट हुनसक्ने अनुमान गर्न सकिन्छ।

गगन थापाः गगन थापा काठमाडौं ४ बाट चुनाव लड्ने पक्कापक्की जस्तै छ । यसअघि पनि सोही क्षेत्रबाट चुनाव जितेका थापाले आफ्नो लोकप्रियता घट्न दिएका छैनन् । उनीसँगै सिफारिसमा परेका अन्य नेताको तुलनामा थापाको लोकप्रियता र प्रभाव बढी भएकाले पनि उनी उम्मेदवार बन्ने पक्का छ।