जयपुर– भारतको राजस्थान र तेलङ्गना राज्यमा शुक्रबार विधानसभाका लागि मतदान भएको छ।
भारतीय सञ्चारमाध्यमले दिएको विवरणअनुसार राजस्थानमा ७२.७ प्रतिशत र तेलङ्गनामा ६७ प्रतिशत मतदाताले मतदान गरेका छन्।
राजस्थान राज्यमा मात्रै एकसय ९९ स्थानका लागि भएको निर्वाचनमा झण्डै दुई हजारभन्दा बढी उम्मेदवार चुनावी मैदानमा थिए।
राज्यका २ सय निर्वाचन क्षेत्रमध्ये १ सय ९९ निर्वाचन क्षेत्रमा मात्र चुनाव भएको हो। बहुजन समाज पार्टीका उम्मेदवारको निधन भएका कारण अल्वार निर्वाचन क्षेत्रको चुनाव स्थगित भएको छ।
निर्वाचनका लागि राज्यभरीमा ५१ हजार ६६७ वटा मतदान केन्द्र राखिएको चुनाव आयोगले जनाएको छ।
शुक्रबार भएको निर्वाचनको मतगणना भने आगामी डिसेम्बर ११ तारिखमा मात्र हुने आयोगले बताएको छ।
निर्वाचनमा भारतीय जनता पार्टी (भाजपा) र कङ्ग्रेसबीच कडा टक्कर हुने अनुमान गरिएको छ। यस चुनावमा दुवै पार्टीले कम्तीमा १ सय १ स्थान जित्ने दाबी गरेका छन्।
सन् २०१३ मा भएको विधानसभा चुनावमा भाजपाले १६३ स्थान जितेर पूर्ण बहुमतको सरकार बनाएको थियो। कङ्ग्रेस २१ स्थानमा खुम्चिएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
