काठमाडौं- गुण्डा नाइके समीरमानसिंह बस्नेतकी श्रीमती माया शेरचन बस्नेत ५ लाख रुपैयाँ धरौटीमा रिहा भएकी छिन्।
जिल्ला अदालत काठमाडौंले थुनछेक बहस सकिएपछि शेरचनलाई ५ लाख रुपैयाँ धरौटीमा रिहा गर्न आदेश दिएको हो।
निर्माण व्यवसायी शरदकुमार गाैचन हत्याको आरोपमा पक्राउ परेका अम्मबहादुर राना, लोप्साङ लामालगायतले हत्यामा उनको पनि संलग्नता भएको बताएपछि मायालाई पक्राउ गरिएकाे थियाे।
‘लेडी डन’को रुपमा परिचित मायालाई महानगरीय प्रहरी अपराध महाशाखाको टोलीले कात्तिक १८ गते काठमाडौंकाे सानो भर्याङबाट पक्राउ गरेको थियो।
साविती बयानको आधारमा पक्राउ परेकी माया अन्नत: ५ लाख धरौटीमा रिहा भएकी हुन्।
नेपाल निर्माण व्यवसायी महासंघका तत्कालीन अध्यक्ष शरदकुमार गौचन हत्या, दावा लामामाथि गोली प्रहार लगायतका ३ घटनामा हतियार उपलब्ध गराएको अाराेप उनीमाथि थियाे।
तीन वटा गोलीकाण्डमा संलग्न रहेको आरोपमा पक्राउ परेकी मायालाई संगठित अपराध तथा कर्तव्य ज्यान मुद्दामा म्याद थप गरेर अनुसन्धान भइरहेको थियो।
२०७३ चैत २९ गते दिव्या पार्टी प्यालेस एन्ड हस्पिटालिटी गौरीघाटमा जिम गर्न जाँदै गर्दा गेटमै अर्का गुन्डा नाइके दावा लामामाथि गोली प्रहार भएकाे थियाे। दावालाई गोली हान्नकै लागि मायाले काठमाडौंको सितापाइलामा सुटर अम्बर बहादुर रानालाई पेस्तोल दिएको दाबी प्रहरीको छ।
दावालाई गोली हानेपछि आफूले समीरको श्रीमतीलाई पेस्तोल फिर्ता गरेको अम्बरले बयानका क्रममा भनिसकेका छन्। व्यवसायी गौचनलाई गोली हान्न प्रयाेग भएकाे पेस्तोल पनि मायाले नै उपलब्ध गराएकी थिइन्। जुन प्रहरीले बरामद गरिसकेको छ। उक्त पेस्तोल दरबारको समेत भएको तथा लामालाई गाेली प्रहार गर्दासमेत प्रयाेग भएकाे प्रहरीको दाबी छ।
गत वर्षको असोज २३ गते तत्कालिन नेपाल निर्माण व्यवसायी महासंघका अध्यक्ष गौचनमाथि गाेली प्रहार गरी हत्या भएकाे थियाे।
त्यस्तै युवा संघ रुपन्देहीका तत्कालीन अध्यक्ष दुर्गा तिवारीलाई गोली हान्ने बेलामा पनि काठमाडौंदेखि पेस्तोल गएको र त्यही पेस्तोलले लोप्साङले तिवारीलाई गोली हानेर मारेको प्रहरीले जनाएको छ।
काठमाडौंको बाफलमा समीरमानको पुरानो घर छ। गौचन हत्या गरेर फरार रहेकाहरुलाई सोही घरमा समीरकी श्रीमतीले एक महिनासम्म 'सेल्टर' दिएर राखेको सूचना पक्राउ परेकाबाटै प्रहरीले संकलन गरेको थियाे।
यसअघि नै समीरको घरमा रोशन बुढाथोकी, अम्बरबहादुर राना, श्याम गुम्बे र अजय थापा एक महिनासम्म बसेको अनुसन्धानबाट खुलेको थियो। उनीहरुले आफूलाई चाहिने सामान घरमा ल्याउनका लागि समेत त्यसबेला एक जना युवा सहयोगी राखेका थिए। उनीहरुलाई संरक्षण गरेर राख्न समेत मायाकाे हात रहेको प्रहरीले जनाएको छ।
आफ्नै समूहका गुन्डा नाइके कुमार घैंटे प्रहरी कारबाहीमा मारिएपछि समीरमान भागेर भारत पुगेका थिए। पछि उनले भारतबाटै आपराधिक गिरोहको सञ्जाल विस्तार गर्न सुरु गरे। त्यसका लागि काठमाडौंमा रहेकी आफ्नी श्रीमती मायाले उनलाई भरपुर सहयोग गरेको प्रहरीको भनाइ छ।
काठमाडौंबाट हत्या तथा पैसा उठाउन गुन्डाहरु खटाउने कामको जिम्मा समीरकै श्रीमतीले गरेकी थिइन्। गौचन हत्या, दावा लामाथि गोली प्रहार, दुर्गा तिवारी हत्यामा भारतबाट समीरले काम गरेका थिए भने उनलाई सहयोग गर्दै काठमाडौंबाट सबै काम श्रीमती माया शेरचनले गरेको अनुसन्धानबाट खुलेको छ।
गुन्डा नाइके समीरमान गत मंसिरमा भारतबाट पक्राउ गरी प्रहरीको केन्द्रीय अनुसन्धान ब्यूरो सिआइबीको टोलीले मंसिर १७ गते सार्वजनिक गरेको थियो। त्यसयता उनी जेलमा छन्। समीर जेल गएपछि अपराध सञ्जालको सम्पूर्ण जालो मायाबाट सञ्चालन हुने गरेको प्रहरीको दाबी छ।
अपराध घटनाउन विभिन्न व्यक्तिलाई रकम दिनेदेखि समीरको योजनामा सम्पूर्ण काम श्रीमती मायाले गर्ने गरेको रिपोर्ट प्रहरी हेडक्वाटर पुगेपछि केही समय पहिला समीरलाई मुस्ताङ कारागार सारिएको थियो। अन्य व्यक्तिलाई भेट्ने बाहाना बनाएर दिनहुँ थुपैै मान्छेले समीरलाई भेट्ने गरेको र यसको सम्पूर्ण सेटिङ श्रीमतीबाट हुने गरेको प्रहरीको बुझाई छ।
याे पनि पढ्नुस्:
गुण्डा नाइके समीरमानकी श्रीमती पक्राउ
प्रहरी पासोमा किन र कसरी परिन् ‘लेडी डन’ माया?
गुण्डा नाइके समीरमानकी श्रीमतीलाई १० दिन थुनामा राख्न आदेश
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।