जनकपुरधाम- गुठीको जग्गा कीर्ते गरी बेचेको आरोपमा जनकपुरस्थित एक महन्तलाई पक्राउपूर्जी जारी गरेपछि उनी फरार भएका छन्।
संस्कृत विश्वविद्यालय अन्तर्गत हजारी जनक विद्यापीठको अर्बौं रुपैयाँको जग्गा कीर्ते जालसाजी गरेर बेचेको आरोप लागेका रत्नसागर मठका महन्त वैकुण्ठ दास वैष्णवलाई पक्राउपूर्जी जारी गरिएको हो।
दुई अर्बभन्दा बढी मूल्यको जनकपुरधाम उपमहानगरपालिका ८ को अढाई बिघा जमिनको कीर्ते जालसाजी गरी आफू जग्गाधनी बनेर उनले जनकपुरधाम उपमहानगरपालिका २३ स्थित बसहिया निवासी अशोककुमार शर्मालाई मोही बनाएका थिए।
संस्कृत विश्वविद्यालय स्थापनाका लागि रामचन्द्र साहले जनक हजारी विद्यापीठका लागि दिएको जग्गामध्ये अढाई बिघा महन्त दासले बेच्ने हल्ला चलेपछि स्थानीयस्तरमा निकै विरोध भएको थियो। तर, उनले भित्रभित्रै गुठी संस्थालाई समेत छलेर मालपोत कार्यालय धनुषाबाट नक्कली लालपूर्जा लिन सफल भए।
दासले कलेजको जग्गा कीर्ते जालसाजी गरी बेचेको थाहा पाएपछि आफ्नो जग्गा दाबी गर्दै अशोककुमार शर्माले नै कलेजविरुद्ध अदालतमा मुद्दा दिए।
कीर्ते गरिएको जग्गा बिक्री गर्न जनकपुरका व्यवसायी श्याम डोकानिया र नवल मुरारकासित दासले बैनासमेत लिइसकेको बताइएको छ।
पछि कलेजले गुठी संस्था जनकपुर, महन्त दास र शर्मामाथि समेत ठगी तथा जालसाजीको मुद्दा हाल्यो। महन्तसँग रहेको लालपूर्जा नक्कली रहेको गुठी संस्थाले अदालतमा प्रमाण पेस गरेपछि उनको ठगीबारे खुलासा भएको हो।
सोही मुद्दामा जिल्ला प्रहरी कार्यालय धनुषाले ठगी तथा जालसाजी मुद्दाका लागि अनुसन्धान गर्ने क्रममा दुई साताअघि शर्मालाई पक्राउ गरेको छ।
घटना यस्तो थियो
महन्त दाससित मिलोमतो गरी गुठी संस्थानको नाममा लालपूर्जा रहेको जग्गाको कीर्ते गरी मोही महलमा शर्माले आफ्नो नाम लेखाएका थिए।
प्रहरीलाई गुठी संस्थान र जिल्ला मालपोत कार्यालयले उपलब्ध गराएको स्रेस्तामा जग्गा धनीमा गुठी संस्थान धनुषा मात्र उल्लेख छ।
विद्यापीठका प्राचार्य विजय चौधरीले २०५० सालदेखि क्याम्पसको भोगचलनमा रहेको जनकपुर–८ स्थित सिट नम्बर १३५४ र १४ को कित्ता नम्बर ६२ को २ कठ्ठा ११ धुर र सिट नम्बर १३५४ र १५ को कित्ता नम्बर १, २, २८ तथा ४९ को २ बिघा ८ कठ्ठा १४ धुर जग्गा महन्त दासले फर्जी कागज बनाएर बिक्री गर्न खोजेको आरोप लगाएका छन्।
साबिक नापीमा गुठी संस्थान अधिनस्थ बराही कुटीका नाममा रहेको जमिनसँगै सडक पश्चिमको ६ बिघा ३ कठ्ठा ५ धुर जमिन २०५० जेठ १३ को मन्त्रिपरिषद् बैठकको निर्णयअनुसार केन्द्रीय गुठी संस्थानले विद्यापीठलाई भोगचलन गर्न दिएको थियो।
विद्यापीठ नेपाल संस्कृत विश्वविद्यालय दाङको आंगिक क्याम्पसका रूपमा सञ्चालित छ।
विद्यापीठको भोगचलनमा रहेको सडकपूर्वको अढाई बिघाको विवाद भने नयाँ होइन। २०६८ सालमा पनि दासले गुठी कार्यालयका तत्कालीन प्रमुख राजाबाबु पाण्डे तथा मालपोत कार्यालयको मिलेमतोमा उक्त जमिन आफ्नो नाममा गराएका थिए।
त्यतिबेला मालपोत कार्यालय धनुषाले २४ असोज २०६९ को टिप्पणी आदेशमार्फत रत्नसागर मठका नाममा जारी गरेको लालपूर्जा खारेज गरेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
