काठमाडौं । नेपाल पत्रकार महासंघले सञ्चार क्षेत्रका विद्यमान समस्या समाधानका लागि संवाद, वार्ता र सहमतिमार्फत अघि बढ्न प्रधानमन्त्री वालेन्द्र शाह बालेनसँग समय माग गरेको छ ।
बुधबार प्रधानमन्त्री तथा मन्त्रिपरिषद्को कार्यालयलाई पत्र पठाउँदै महासंघले उठाएका सञ्चार क्षेत्रका समस्या र सरोकारका विषयमा प्रधानमन्त्रीसँग प्रत्यक्ष संवाद गर्न समय उपलब्ध गराइदिन आग्रह गरिएको छ ।
पत्रमा सरकारले प्रेस तथा अभिव्यक्ति स्वतन्त्रतालाई अंकुश लगाउने कानुन निर्माण गर्ने, नागरिक हक कुण्ठित गर्ने तथा प्रेस स्वतन्त्रतामाथि असंवैधानिक तवरबाट हस्तक्षेप गर्ने गतिविधि गरिरहेको भन्दै महासंघले चिन्ता व्यक्त गरेको छ ।
यी समस्याको समाधान वार्ता, संवाद र सहमतिमार्फत गर्न सकिने विश्वास व्यक्त गर्दै सञ्चार क्षेत्रका समस्या समाधानका लागि सम्बन्धित विभागीय मन्त्रीलाई पटक–पटक लिखित तथा मौखिक आग्रह गर्दा पनि सरकारका तर्फबाट ठोस पहल नभएको महासंघले जनाएको छ ।
पत्रकारिताको संवैधानिक अधिकारमाथि अतिक्रमण गर्दै समाचारको स्रोत खोज्ने नाममा समाचार कक्षमै प्रहरी प्रवेश गरी पत्रकारमाथि गरिएको पक्राउ तथा धरपकडको निष्पक्ष छानबिन र दोषीमाथि कारबाही नभएकोप्रति पनि महासंघले दुःख व्यक्त गरेको छ ।
त्यस्तै, प्रेस स्वतन्त्रता नियन्त्रण गर्ने मनसाय राखेर प्रेस काउन्सिलसम्बन्धी अध्यादेश जारी गर्ने सरकारी प्रयास, सञ्चारमाध्यममा अनधिकृत हस्तक्षेप तथा दण्डहीनतालाई प्रश्रय दिने गतिविधिप्रति महासंघले आपत्ति जनाएको छ ।
पत्रमा सञ्चारमाध्यमबाट पत्रकारलाई जबर्जस्ती निष्कासन गर्ने, श्रम अधिकारको उल्लंघन गर्ने तथा सरकारी विज्ञापन र सूचनामा सञ्चारमाध्यमबीच विभेद नगरी समान व्यवहार गर्नुपर्ने मागसमेत उठाइएको छ । सर्वोच्च अदालतबाट भएको फैसला कार्यान्वयन गर्दै सबै सञ्चारमाध्यमलाई समान रूपमा सार्वजनिक हितका विज्ञापन उपलब्ध गराउनुपर्नेमा सरकारले त्यसको कार्यान्वयनमा अनिच्छा देखाएको महासंघको भनाइ छ ।
पत्रपत्रिकाले प्राप्त गर्दै आएको रकम प्रेस काउन्सिल नेपालको सिफारिसबमोजिम उपलब्ध गराउनुपर्ने र प्रेस तथा अभिव्यक्ति स्वतन्त्रताको संरक्षण गर्नुपर्ने माग पनि महासंघले अघि सारेको छ ।
महासंघले सरकारबाट प्रेस तथा अभिव्यक्ति स्वतन्त्रताको संरक्षणप्रति पटक–पटक उदासीन व्यवहार देखाइएको भन्दै त्यसको विरोधमा आफूहरू आन्दोलनरत रहेको जनाएको छ ।
विभागीय मन्त्रीसँगै आमसञ्चारमाध्यमले उठाएका र भोगेका समस्या सम्बोधन गर्न ठोस पहल नभइरहेको अवस्थामा प्रधानमन्त्री स्वयंको समक्षमा सरोकारवालासँग वार्ता, संवाद र सहमतिमार्फत निकास खोज्न आग्रह महासंघले गरेको छ ।
सरकारसँग आफ्ना पेसागत सरोकारका विषयमा सकारात्मक वार्ता, संवाद र सहमतिका लागि आफूहरू सधैँ तयार रहेको स्पष्ट पार्दै प्रधानमन्त्रीबाट महासंघले उठाएका एजेन्डामा छलफल गर्न यथाशीघ्र समय उपलब्ध गराइदिन अनुरोध पत्रमा गरिएको छ ।
महासंघकी अध्यक्ष निर्मला शर्माद्वारा हस्ताक्षरित पत्रमा सञ्चार क्षेत्रका समस्या समाधानका लागि सरकार र पत्रकार महासंघबीच संवादको वातावरण निर्माण गर्न प्रधानमन्त्रीको ध्यानाकर्षण गराइएको हो । महासंघले प्रेस तथा अभिव्यक्ति स्वतन्त्रता विरुद्ध सरकारी कदमलाई लिएर घोषणा गरेको आन्दोलनको कार्यक्रम अन्तर्गत प्रधानमन्त्रीलाई पत्राचार गरेको हो ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।