काठमाडौं– नक्कली भ्याट बिल प्रयोग गरेर राज्यको राजस्व छली गरेको अभियोगमा अदालतबाट दोषी ठहर भएका एक व्यापारी पक्राउ परेका छन् । ५३ करोड ८१ लाख रुपैयाँभन्दा बढी जरिवाना र दुई वर्ष कैद सजाय सुनाइए पनि फरार रहँदै आएका रौतहटका गुलसन श्रीवास्तवलाई प्रहरीले पक्राउ गरेको हो ।
३३ वर्षीय श्रीवास्तवलाई नेपाल प्रहरीको केन्द्रीय अनुसन्धान ब्युरो (सीआईबी) ले जिल्ला प्रहरी कार्यालय पर्साको सहयोगमा बुधबार वीरगञ्ज महानगरपालिका–१६, नगुवाबाट नियन्त्रणमा लिएको हो ।
प्रहरीका अनुसार श्रीवास्तवले पाँचवटा व्यापारिक फर्म सञ्चालन गरी झुट्टा तथा नक्कली मूल्य अभिवृद्धि कर (भ्याट) बिजक जारी गर्दै राजस्व छली गरेका थिए । उनी सङ्ग्रिला ट्रेड एण्ड सप्लायर्स, प्रिन्स इन्टरनेशनल, मयङ्क इन्टरप्राइजेज, शुभ लक्ष्मी इन्टरनेशनल र न्यू महादेव इन्टरनेशनलका प्रोप्राइटर रहेको खुलेको छ ।
राजस्व अनुसन्धान विभागका अनुसन्धान अधिकृत प्रेमप्रसाद आचार्यसहितको अनुसन्धान प्रतिवेदनका आधारमा दायर मुद्दामा उच्च अदालत पाटनले २०८१ वैशाख २४ गते उनलाई दोषी ठहर गरेको थियो ।
अदालतले श्रीवास्तवलाई ५३ करोड ८१ लाख ८३ हजार ८१ रुपैयाँ जरिवानासहित दुई वर्ष कैद सजाय सुनाएको थियो । तर, फैसला कार्यान्वयनका लागि उपस्थित नभई उनी फरार रहँदै आएका थिए ।
पक्राउ परेका श्रीवास्तवलाई अदालतको फैसला कार्यान्वयनका लागि काठमाडौं जिल्ला अदालतमा उपस्थित गराइएको सीआईबीका प्रवक्ता एवं सूचना अधिकारी प्रहरी वरिष्ठ उपरीक्षक अनुपमशमशेर जबराले जानकारी दिए ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।