काठमाडौं– महिला, बालबालिका, लैंगिक तथा यौनिक अल्पसङ्ख्यक र सामाजिक सुरक्षा मन्त्रालयले आर्थिक वर्ष २०८३-८४ का लागि मन्त्रालयका सचिव, सहसचिव तथा राष्ट्रिय बाल अधिकार परिषद्का सदस्य–सचिवसँग कार्यसम्पादन सम्झौता गरेको छ।
मन्त्रालयले नीति, कार्यक्रम तथा निर्धारित लक्ष्यलाई नतिजामुखी ढंगले कार्यान्वयन गर्न र जिम्मेवार पदाधिकारीलाई कामको परिणामप्रति जवाफदेही बनाउने उद्देश्यले कार्यसम्पादन सम्झौता गरेको जनाएको छ। मन्त्री सिता बादीको उपस्थितिमा भएको सम्झौतामा जिम्मेवारीअनुसार निर्धारित लक्ष्य हासिल गर्ने तथा कार्यक्रमलाई समयमै कार्यान्वयन गर्ने विषयलाई प्राथमिकता दिइएको छ।
सम्झौताअनुसार मन्त्रालयका सचिव तथा सहसचिवले आफूलाई तोकिएको जिम्मेवारी र कार्यक्षेत्रभित्र रहेर मन्त्रालयका नीति तथा कार्यक्रम कार्यान्वयनलाई प्रभावकारी बनाउने प्रतिबद्धता जनाएका छन्।
त्यसैगरी, राष्ट्रिय बाल अधिकार परिषद्का सदस्य–सचिवले बाल अधिकारको संरक्षण, प्रवर्द्धन तथा बालबालिकासँग सम्बन्धित कार्यक्रमलाई अपेक्षित परिणाम हासिल हुने गरी कार्यान्वयन गर्ने प्रतिबद्धता व्यक्त गरेका छन्।
मन्त्रालयले कार्यसम्पादन सम्झौतामार्फत कार्यक्रम सञ्चालनमा समयसीमा र जिम्मेवारी स्पष्ट पार्नुका साथै प्रगतिको नियमित अनुगमन तथा मूल्यांकन गर्ने व्यवस्था अघि सारेको छ। कार्यान्वयनको क्रममा देखिएका समस्या, लक्ष्य प्राप्तिको अवस्था र प्रगतिबारे नियमित समीक्षा गरी आवश्यक सुधारका कदम चालिने मन्त्रालयले जनाएको छ।
मन्त्रालयका अनुसार सम्झौताले नीति तथा कार्यक्रम कार्यान्वयनमा पदाधिकारीको जिम्मेवारी स्पष्ट बनाउने र उपलब्धिको आधारमा कार्यसम्पादनको मूल्यांकन गर्ने आधार तयार गर्नेछ।
मन्त्री बादीको उपस्थितिमा भएको सम्झौताले मन्त्रालयअन्तर्गतका कार्यक्रमलाई थप व्यवस्थित, समयबद्ध र परिणाममुखी बनाउन सहयोग पुग्ने मन्त्रालयको अपेक्षा छ। चालु आर्थिक वर्षका लागि निर्धारित नीति तथा कार्यक्रमको प्रभावकारी कार्यान्वयनसँगै सेवा प्रवाहमा सुधार र संस्थागत जवाफदेहिता बढाउने लक्ष्यसमेत सम्झौताले समेटेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
