१७ वर्षीय फ्लोइड साम्बाले डेब्यु खेलमै २ गोल गरेपछि म्यानचेस्टर सिटीले लिग कप (काराबाओ कप) को उपाधि रक्षा अभियानमा सानदार सुरुवात गरेको छ।
सिटीले च्याम्पियनसिप क्लब नर्विच सिटीलाई ५-० को फराकिलो अन्तरले पराजित गर्दै प्रतियोगिताको चौथो चरणमा स्थान बनाएको छ।
पूर्व प्रिमियर लिग डिफेन्डर क्रिस्टोफर साम्बाका छोरा फ्लोइडले खेलको दुवै हाफमा गोल गरे। सिटीले चौथो चरणमा म्यानचेस्टर युनाइटेडलाई बुधबार हराएको ब्राइटनसँग प्रतिस्पर्धा गर्नेछ।
नर्विचविरुद्ध सिटीले सुरुवातमा गोलका लागि केही संघर्ष गरेको थियो। रिको लुइसको प्रहार क्रसबारभन्दा थोरै माथिबाट बाहिरिएको थियो। तर सिटीले तीन मिनेटको अन्तरमा दुई गोल गर्दै खेलमा पकड बनायो।
डेब्यु गरिरहेका एलानको क्रसमा साम्बाले हेडमार्फत बललाई फ्लिक गर्दै २९ औं मिनेटमा सिटीलाई अग्रता दिलाए। त्यसपछि ३२ औं मिनेटमा आयुब बुआद्दीको पासमा रायन चेर्कीले उत्कृष्ट फिनिस गर्दै अग्रता दोब्बर बनाए।
दोस्रो हाफको सुरुवातमै एलानले सिटीका लागि तेस्रो गोल थपे। उनले बललाई बायाँ खुट्टामा ल्याउँदै लो शटमार्फत गोल गरेका थिए।
त्यसपछि साम्बाले ५४ औं मिनेटमा उत्कृष्ट कर्लिङ फिनिस गर्दै व्यक्तिगत दोस्रो गोल पूरा गरे। खेलको अन्तिम मिनेटमा रायन म्याकएडुले पाँचौं गोल थपे।
नर्विचका वैकल्पिक खेलाडी मोहम्मद टुरेले सान्त्वना गोल गरेको जस्तो देखिए पनि अफसाइडका कारण उक्त गोल मान्य भएन। यससँगै सिटीका अर्जेन्टिनी गोलरक्षक जेरोनिमो रुल्लीले डेब्यु खेलमै क्लिनसिट कायम गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786360041.jpg)
-1767836232.jpg){kind=logo}
-1786602170.png)
-1789631269.jpg)
