विराटनगर– जेन–जी आन्दोलनका क्रममा घाइते भएकाहरूले उपचार, क्षतिपूर्ति र दीर्घकालीन व्यवस्थापनको माग गर्दै झापाको बिर्तामोडमा आमरण अनशन सुरु गरेका छन्।
आन्दोलनका क्रममा पेटमा गोली लागेर घाइते भएका अर्जुनधारा नगरपालिका–६ का विवेक दनुवारले आमरण अनशन थालेका हुन्। उनको मागप्रति ऐक्यबद्धता जनाउँदै आन्दोलनका अन्य घाइतेहरू पनि अनशनमा सहभागी भएका छन्।
दनुवारले आन्दोलनका क्रममा घाइते भएकाहरूको निःशुल्क र गुणस्तरीय उपचारको व्यवस्था गर्न सरकारसँग माग गरेका छन्। यसअघि उपचारमा खर्च भएको रकम राज्यले बेहोर्नुपर्ने तथा घाइतेहरूलाई उचित क्षतिपूर्ति उपलब्ध गराउनुपर्ने उनको माग छ।
घाइतेहरूको दीर्घकालीन जीवनयापनका लागि आवश्यक व्यवस्था गर्नुपर्ने माग पनि अनशनकारीहरूले अघि सारेका छन्। उनीहरूले घाइते तथा उनीहरूका परिवार र सहिद परिवारका सदस्यलाई निःशुल्क शिक्षा उपलब्ध गराउनुपर्ने माग गरेका छन्।
त्यस्तै, सार्वजनिक यातायातमा घाइतेहरूलाई विशेष छुटको व्यवस्था गर्नुपर्ने र घाइते तथा सहिद परिवारका माग सम्बोधन गर्न छुट्टै कानुनी व्यवस्था गर्नुपर्ने उनीहरूको माग छ।
जेन–जी आन्दोलनलाई दलगत राजनीतिक उद्देश्यका लागि मात्र प्रयोग गरिएको भन्दै अनशनकारीहरूले असन्तुष्टि जनाएका छन्।
उनीहरूका अनुसार झापामा जेन–जी आन्दोलनका क्रममा १०० जनाभन्दा बढी घाइते भएका थिए। तर, हालसम्म ४३ जनाले मात्रै घाइते परिचयपत्र पाएका छन्।
घाइतेहरूले आफूहरूका माग तत्काल सम्बोधन गरी उपचार, राहत, क्षतिपूर्ति र भविष्यको सुरक्षाका लागि ठोस व्यवस्था गर्न सरकारसँग माग गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791822485.png)
-1786602170.png)
