काठमाडौं– अन्तर्राष्ट्रिय फुटबलबाट सन्न्यास घोषणा गरिसकेका अर्जेन्टिनाका स्टार खेलाडी लिओनल मेसीलाई अर्जेन्टिनाको राष्ट्रिय टोलीमा समावेश गरिएको छ।
राष्ट्रिय टोलीका प्रशिक्षक लिओनल स्कालोनीले मंगलबार घोषणा गरेको २८ सदस्यीय टोलीमा मेसीलाई पनि राखिएको हो। अर्जेन्टिनाले आगामी मैत्रीपूर्ण खेलअन्तर्गत आफ्नै भूमिमा तीन खेल खेल्दैछ।
मेसीले टोलीमा सहभागी हुने वा नहुनेबारे औपचारिक रूपमा पुष्टि गरेका छैनन्। तर‚ अर्जेन्टिना फुटबल संघका अध्यक्ष क्लाउडियो तापियाका अनुसार मेसीले अक्टोबर ६ मा ब्युनस आयर्समा बेनिनविरुद्ध हुने खेलका लागि निमन्त्रणा स्वीकार गरेका छन्। उक्त खेललाई मेसीको अन्तर्राष्ट्रिय करिअरको विदाइका रूपमा प्रस्तुत गरिएको छ।
‘राष्ट्रिय टोलीका मुख्य प्रशिक्षक स्कालोनीसँगको कुराकानीपछि हामीले विश्वकै उत्कृष्ट खेलाडी, हाम्रा प्रतीक र कप्तान मेसीलाई अक्टोबर ६ मा उनले पाउनुपर्ने विदाइ दिनका लागि निमन्त्रणा गर्ने निर्णय गरेका हौं,’ तापियाले भने।
मेसीले अर्जेन्टिनालाई सन् २०२२ को विश्वकप उपाधि जिताउन नेतृत्व गरेका थिए। त्यसपछि उनले २०२६ को विश्वकपमा पनि अर्जेन्टिनालाई फाइनलसम्म पुर्याउन योगदान दिएका थिए।
तापियाका अनुसार मेसीले निमन्त्रणा स्वीकार गरेपछि सन् २०२२ को विश्वकप विजेता अर्जेन्टिनाका सबै खेलाडीलाई पनि परिवारसहित उक्त कार्यक्रममा सहभागी हुन निमन्त्रणा गरिनेछ। उनले यसलाई विश्वकै उत्कृष्ट खेलाडीको ‘अन्तिम ट्याङ्गो’ का रूपमा उल्लेख गरेका छन्।
यसअघि अर्जेन्टिनाले मेसीको राष्ट्रिय टोलीबाट २१ वर्ष लामो यात्राको अन्त्यपछि पहिलो चरणका मैत्रीपूर्ण खेलमा बोलिभिया, बुर्किना फासो र बेनिनसँग प्रतिस्पर्धा गर्ने घोषणा गरेको थियो।
अर्जेन्टिना फुटबल संघका अनुसार बोलिभियाविरुद्धको घरेलु खेल सेप्टेम्बर ३० मा कोर्डोबास्थित मारियो अल्बेर्तो केम्पेस रंगशालामा हुनेछ।
त्यसपछि बुर्किना फासो र बेनिनविरुद्धका खेल अक्टोबर ३ र ६ मा ब्युनस आयर्सस्थित एस्टाडियो मोनुमेन्टलमा हुनेछन्। अक्टोबर ६ को बेनिनविरुद्धको खेल नै मेसीको सम्भावित विदाइ खेल बन्नेछ।
यसबीच अर्जेन्टिनाको राष्ट्रिय टोलीका प्रशिक्षक स्कालोनीको भविष्यबारे पनि चासो बढेको छ। उनको सम्झौता डिसेम्बरमा सकिँदैछ। जुलाई १९ मा भएको विश्वकप फाइनलमा स्पेनसँग १–० ले पराजित भएपछि स्कालोनीले पदबाट हट्न सक्ने संकेत गरेका थिए।
विश्वकप फाइनलपछि भएको झडपका कारण अर्जेन्टिनाका तीन खेलाडी लियान्द्रो पारेदेस, नाहुएल मोलिना र थियागो अल्माडालाई फिफाले प्रतिबन्ध लगाएको छ। पारेदेसलाई १० खेलको प्रतिबन्ध गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
