काठमाडौं– सरकारले सेयर बजारको सुधार तथा पुनरुत्थानका लागि २१ बुँदे ‘पुँजी बजार सुदृढीकरण तथा पुनरुत्थान कार्ययोजना’ जारी गरेको छ।
भोटेकोशी बाढीबाट जलविद्युत् आयोजनासहित भौतिक पूर्वाधारमा अनपेक्षित क्षति भएपछि अर्थतन्त्रमा परेको चाप र त्यसको पुँजी बजारमा परेको असर न्यूनीकरण गर्ने उद्देश्यले कार्ययोजना ल्याइएको हो।
अर्थ मन्त्रालयले सोमबार सार्वजनिक गरेको कार्ययोजनामा प्राथमिक सेयर निष्कासन (आईपीओ)मा छुटदेखि पुँजी बजारका अत्यावश्यक पूर्वाधार निर्माण, नेपाल स्टक एक्सचेन्ज (नेप्से)को पुनःसंरचना र कर छुटसम्मका योजना समेटिएका छन्।
कार्ययोजनाअनुसार आईपीओ निष्कासनका लागि सामान्य योग्यतासम्बन्धी निर्देशिका नेपाल धितोपत्र बोर्डले तत्काल जारी गर्नुपर्नेछ। बजारमुखी मूल्य प्रणालीमा आधारित सार्वजनिक निष्कासनका लागि क्षेत्रगत समूहअनुसार विशिष्ट योग्यता, मूल्य अन्वेषण प्रणाली र धितोपत्र बाँडफाँट प्रणालीलगायत नीतिगत तथा कानुनी सुधार पनि गरिने भएको छ।
जलविद्युत्, उत्पादन तथा प्रशोधन, होटल तथा पर्यटन, कृषि र औषधि उद्योगका लागि आवश्यक विशिष्ट योग्यता तथा अन्य व्यवस्था बोर्डले तर्जुमा गरी २०८३ पुस मसान्तभित्र लागू गर्नुपर्ने कार्ययोजनामा उल्लेख छ।
त्यस्तै, ऋणपत्र बजार, मुद्रा बजारलगायतका वित्तीय उपकरणको विकासका लागि सामूहिक लगानी कोषलाई व्यावसायिक, विविधीकृत, पारदर्शी, जोखिम सचेत र प्रविधिमैत्री बनाउने योजना अघि सारिएको छ।
दीर्घकालीन लगानीको आधारस्तम्भका रूपमा सामूहिक लगानी कोषलाई विकास गर्न बोर्डले सम्बन्धित नीति तत्काल सार्वजनिक गरी २०८३ मंसिर मसान्तभित्र निर्देशिका तथा आवश्यक पूर्वाधारको व्यवस्था गर्नुपर्ने कार्ययोजनामा उल्लेख छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787821306.jpg)
-1786602170.png)
-1789383080.png)
